(ភ្នំពេញ)៖ កត្តាសុខសន្តិភាពបានធ្វើឲ្យវិស័យជាច្រើននៅក្នុងប្រទេសកម្ពុជារីកចម្រើនលូតលាស់ជាបន្តបន្ទាប់ ដូចជាវិស័យអប់រំជាដើម ដែលជំរុញឲ្យសិស្សានុសិស្ស និងយុវជន អាចចាប់យកឱកាសទៅសិក្សានៅក្រៅប្រទេសបានយ៉ាងទូលំទូលាយ។

ជាក់ស្តែង លោក លីវ សុខសាន អតីតសិស្សនិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) កាលពីអំឡុងឆ្នាំ២០១៨ នោះ បានជាប់អាហារូបករណ៍ទៅសិក្សានៅក្រៅប្រទេសរហូតដល់ទៅ២លើកជាប់ៗគ្នា។ បច្ចុប្បន្នលោកបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់មកពីប្រទេសរុស្ស៉ី ហើយគ្រោងនឹងបន្តការសិក្សាថ្នាក់បណ្ឌិតនៅប្រទេសចិនក្នុងពេលឆាប់ៗខាងមុខនេះ ក្នុងវ័យត្រឹមតែ២៣ឆ្នាំប៉ុណ្ណោះ លើមុខជំនាញសេដ្ឋកិច្ច។

និស្សិតអាហារូបករណ៍មកពីរុស្ស៉ីរូបនេះ បានលើកឡើងថា កត្តាចម្បងដែលធ្វើឲ្យលោកក្លាយជាសិស្ស និងនិស្សិតឆ្នើមនោះគឺ គឺកំណត់កាលវិភាគរៀនមួយឲ្យសមស្រប ហើយដាក់វិន័យខ្លួនឯងឲ្យអនុវត្តទៅតាមកាលវិភាគនោះឲ្យបានម៉ឺងម៉ាត់បំផុត បើកំណត់ថា មួយថ្ងៃត្រូវរៀន៣ម៉ោង ត្រូវរៀនឲ្យបានជាកំហិត ខណៈគ្មានជោគជ័យណាមួយកើតឡើងដោយមិនមានការប្រឹងប្រែងនោះទេ។

ពាក់ព័ន្ធទៅនឹងការដាក់អាហារូបករណ៍ទៅសិក្សានៅក្រៅប្រទេសវិញ លោកបានបញ្ចាក់ថា ដើម្បីជាប់អាហារូបករណ៍នីមួយៗ ជំហានដំបូងតម្រូវឲ្យមានការស្រាវជ្រាវទៅលើអាហារូបករណ៍សិន តាមរយៈការតាមដានតាមបណ្តាញសង្គមពាក់ព័ន្ធអាហារូបករណ៍ ជាពិសេសគេហទំព័រផ្លូវការរបស់ក្រសួងអប់រំកម្ពុជា រួមជាមួយគេហទំព័រសមាគមនិស្សិតខ្មែរដែលកំពុងសិក្សានៅក្រៅប្រទេស ដើម្បីកំណត់ថាប្រភេទអាហារូបករណ៍មួយណាដែលស័ក្តិសមជាមួយខ្លួនយើងបំផុត ។

លោកបានលើកឡើងថា អារូបករណ៍ខ្លះតម្រូវឲ្យប្រឡង ដូចេ្នះត្រូវខិតខំប្រឹងប្រែងរៀនសូត្រដើម្បីជោគជ័យក្នុងការប្រឡង ប៉ុន្តែអាហារូបករណ៍ខ្លះតម្រូវឲ្យមានការសម្ភាសផ្ទាល់ ឬតាមប្រព័ន្ធអនឡាញ ដូច្នេះយុវជនមិនត្រឹមតែត្រូវមានចំណេះដឹងខ្លាំងប៉ុណ្ណោះទេ តែក៏តម្រូវឲ្យមានសិល្បៈនៅក្នុងការនិយាយផងដែរ ដើម្បីទាក់ទាញចិត្តពីគណៈកម្មការ។

ការទៅសិក្សានៅក្រៅប្រទេសពិតជាបានផ្តល់បទពិសោធល្អៗជាច្រើន ប៉ុន្តែទន្ទឹមនោះក៏មាននូវផលវិបាកមួយចំនួនផងដែរ ដែលយុវជនគួរដឹង ដោយលោកបានបញ្ជាក់ថា កត្តាទី១៖ គឺភាសាបើទោះបីត្រូវសិក្សាជាភាសាអង់គ្លេសក្តី តែក៏តម្រូវឲ្យចេះភាសារបស់ប្រទេសដែលយើងត្រូវរៀននោះខ្លះដែរ ព្រោះគ្រូមួយចំនួនអាចបង្រៀនជាភាសារប្រទេសខ្លួន ការសម្របខ្លួនជាមួយប្រព័ន្ធអប់រំថ្មី ហើយសម្រាប់កិច្ចការស្រាវជ្រាវហាក់មានច្រើនជាងការសិក្សានៅក្នុងស្រុកផងដែរ៕