(ភ្នំពេញ)៖ ឆ្លៀតក្នុងឱកាសសេចក្ដីថ្លែងការណ៍ពិសេសពីវឌ្ឍនភាព១ឆ្នាំ របស់រាជរដ្ឋាភិបាលអាណត្តិទី៧ កាលពីថ្ងៃទី២២ ខែសីហា ឆ្នាំ២០២៤កន្លងទៅ, សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសម្រេចប្រកាសបង្កើតនូវ «មូលនិធិកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណងដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធតាមបណ្ដោយព្រំដែន ដោយផ្ដោតលើការកសាងផ្លូវក្រវាត់ព្រំដែន ព្រមទាំងបានផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍនៅតាមតំបន់ព្រំដែន ឱ្យបានកាន់តែរឹងមាំនិងប្រកបដោយចីរភាព។

លោកបណ្ឌិត ដៀប សុផល អ្នកស្រាវជ្រាវប្រវត្តិសាស្រ្ត និងទំនាក់ទំនងអន្តរជាតិ បានលើកឡើងថាមូលនិធិនេះបង្ហាញពីការចូលរួមរបស់ប្រជាជនខ្មែរ ដើម្បីធ្វើខណ្ឌសីម៉ារបស់ជាតិខ្លួនឱ្យបានកាន់តែល្អ មិនត្រឹមតែផ្លូវប៉ុណ្ណោះទេ តែអាចធ្វើតំបន់អភិវឌ្ឍន៍ទៀត ដែលអាចឱ្យតំបន់នៅតាមព្រំប្រទល់ក្លាយជារមណីយដ្ឋាន ទេសចរណ៍ កន្លែងកសិដ្ឋានផ្សេងៗបន្ថែមទៀត

ជាមួយគ្នានេះ លោកបណ្ឌិតបានគូសបញ្ជាក់ថា «មូលនិធិកសាងហេដ្ឋារចនាសម្ព័ន្ធតាមព្រំដែន» មិនមែនបង្កើតឡើងដើម្បីគណបក្សនយោបាយនោះទេ គឺជាមូលនិធិសម្រាប់ខ្មែរទាំងអស់គ្នា​ ជាពិសេសលោកបានលើកឡើងអំពីគុណប្រយោជន៍ជាច្រើន នៃការមានក្រវាត់ផ្លូវដ៏រឹងមាំធ្វើជាខែលការពារដែនអធិបតេយ្យភាពជាតិខ្មែរ៕

សូមស្ដាប់ការលើកឡើងរបស់ លោកបណ្ឌិត ដៀប សុផល៖