(ពោធិ៍សាត់)៖ សម្ដេចព្រះពុទ្ធជ័យមុនីបណ្ឌិត ឃឹម សន ព្រះប្រធានលេខាធិការដ្ឋានគណៈសង្ឃនាយកតំណាងដ៏ខ្ពង់ខ្ពស់ សម្ដេចព្រះពោធិវ័ង្ស កិត្តិបណ្ឌិត អំ លីមហេង សម្ដេចព្រះសង្ឃនាយកស្ដីទី នៃព្រះរាជាណាចក្រកម្ពុជា និងសម្ដេចព្រះមហាអរិយវង្សបណ្ឌិត យ៉ន សេងយៀត ព្រះអនុប្រធានលេខាធិការដ្ឋានគណៈសង្ឃនាយក និងលោក ថោ គឿន រដ្ឋលេខាធិការតំណាងលោក ចាយ បូរិន រដ្ឋមន្ត្រីក្រសួងធម្មការ និងសាសនា លោកអភិបាលរង តំណាងលោក ខូយ រីដា អភិបាលខេត្តពោធិ៍សាត់ នៅរសៀលថ្ងៃទី២៩ ខែសីហា ឆ្នាំ២០២៤ បាននិមន្តព្រះមន្រ្តីសង្ឃ និងព្រះសង្ឃ ដែលកំពុងគង់ចាំព្រះវស្សា ដើម្បីសួរសុខទុក្ខព្រះមន្រ្តីសង្ឃ និងភិក្ខុសាមណេរ ដែលគង់នៅតាមបណ្ដាវត្តនានា ក្នុងខេត្តពោធិ៍សាត់ទាំងមូល។
ក្នុងពិធីនេះ មានការនិមន្តចូលរួមពីព្រះមន្រ្តីសង្ឃសាលាគណខេត្ត សាលាអនុគណក្រុង ស្រុក និងព្រះចៅអធិការសរុប ៦២០អង្គ។
សម្ដេចព្រះពុទ្ធជ័យមុនី បានក្រើនរំលឹកដល់ព្រះសង្ឃគ្រប់អង្គ ជាពិសេសព្រះមន្រ្តីសង្ឃ ដែលជាថ្នាក់ដឹកនាំវត្តទាំងអស់ ឲ្យយកព្រះទ័យទុកដាក់ចំពោះ៖
* ត្រូវពង្រឹងពុទ្ធិកសិក្សាឲ្យបានល្អ ព្រះសង្ឃគ្រប់ព្រះអង្គត្រូវប្រឹងឲ្យអស់លទ្ធភាព ដើម្បីធ្វើកិច្ចការមនុស្សធម៌ ចេះជួយព្រះសង្ឃផងគ្នា ឬពុទ្ធបរិស័ទដែលជាចំណុះជើងវត្ត ដែលជួបគ្រោះធម្មជាតិ ឬវិបត្តិណាមួយដែលបានកើតឡើងជាយថាហេតុ។ ចំពោះព្រះសង្ឃណា ដែលបានធ្វើកិច្ចការនេះមកហើយ សូមព្រះអង្គបន្តធ្វើកិច្ចការនេះ បន្ថែមទៀត ដោយសហការជាមួយកាកបាទក្រហម ឬអាជ្ញាធរតាមមូលដ្ឋានរបស់ខ្លួន ឲ្យបានល្អ។
* ព្រះសង្ឃគ្រប់ព្រះអង្គ ដែលជាស្រែបុណ្យរបស់ពុទ្ធបរិស័ទ ត្រូវបដិបត្តិខ្លួនទៅតាមធម៌វិន័យ របស់ព្រះសម្មាសម្ពុទ្ធជាម្ចាស់ឲ្យបានខ្ជាប់ខ្ជួន មិនត្រូវធ្វើខ្លួនឲ្យក្លាយជាអ្នកដែលគេប្រដៅក្រ ឬ ធ្វើសកម្មភាពណាមួយ ដែលអាចបង្កផលលំបាកដល់រាជរដ្ឋាភិបាល ឬបង្កហេតុភេទណាមួយ ដែលធ្វើឲ្យប៉ះពាល់នូវសន្តិសុខសង្គម ឬបង្កអរិយភាពណាមួយ ដែលនាំឲ្យពុទ្ធបរិស័ទ បែកបាក់សាមគ្គីឡើយ។
មុននឹងបញ្ចប់ សម្ដេចព្រះពុទ្ធជ័យមុនី បានប្រគេន និងអំពាវនាវ ដល់ព្រះមន្ត្រីសង្ឃសាលាគណ សាលាអនុគណក្រុង ស្រុក ព្រះចៅអធិការគ្រប់វត្ត ព្រះសង្ឃ និងពុទ្ធបរិស័ទ ឲ្យចូលរួមនូវវិភាគទានស្ម័គ្រចិត្ត «មូលនិធិកសាងហេដ្ឋារចនាសម្ព័ន្ធតាមព្រំដែន» ជាមួយរាជរដ្ឋាភិបាល ដែលត្រូវបានបង្កើតឡើងដោយឈរលើបុព្វហេតុរួម នៃការកសាង និងការពារជាតិ មាតុភូមិកម្ពុជា ដើម្បីបញ្ជាក់អំពីសាមគ្គី និងស្មារតីជាតិខ្មែរតែមួយ និងដើម្បីសុខសន្តិភាព អធិបតេយ្យភាពជាតិ និងបូរណភាពទឹកដី រួមទាំងការអភិវឌ្ឍនៅតាមតំបន់ព្រំដែន ឲ្យបានកាន់តែរឹងមាំ ប្រកបដោយចីរភាព។
ព្រះករុណាគ្រប់អង្គ ត្រូវចូលរួមគាំទ្រជាមួយរាជរដ្ឋាភិបាល ដោយកុំងាករេ នឹងចូរកុំធ្វើសកម្មភាពណាមួយនាំឲ្យមានការលំបាកដល់រាជរដ្ឋាភិបាលកម្ពុជាឡើយ។
សម្ដេចព្រះមហាអរិយវង្ស បណ្ឌិត យ៉ន សេង យៀត បានណែនាំដល់ព្រះសង្ឃឲ្យស្វែងយល់អំពីប្រយោជន៍នៃការប្រើប្រាស់ប្រព័ន្ធបច្ចេកវិទ្យាឌីជីថល ដើម្បីកាត់បន្ថយការប្រើប្រាស់ខុស គោលដៅដែលនាំឲ្យធ្លាក់ចុះនៅតម្លៃ ព្រះពុទ្ធសាសនាក្នុងសង្គម។ សូមព្រះករុណាគ្រប់អង្គ ត្រូវចូលរួមថេរក្សាសម្បត្តិបេតិកភ័ណ្ឌជាតិ ក្នុងព្រះពុទ្ធសាសនា ដែលតាំងនៅក្នុងវត្តអារាមយើង មានអាយុកាលរាប់រយឆ្នាំមកហើយ។ ចូរភ្ញាក់រលឹកឡើងវិញ នូវស្មារតីជាតិ ស្មារតីអ្នកស្រឡាញ់ ជាតិ សាសនា ព្រះមហាក្សត្រ ចូលរួមជាមួយរាជរដ្ឋាភិបាល ដើម្បីការអភិវឌ្ឍប្រទេស ឲ្យបានរឹងមាំ ជាសសរស្ដម្ភដល់សង្គមជាតិយើង។
លោក ថោ គឿន រដ្ឋលេខាធិការបាននាំនូវការផ្តាំផ្ញើ និងសួរសុខទុក្ខថ្វាយបង្គំប្រគេនពរពីលោក ចាយ បូរិន រដ្ឋមន្រ្តីក្រសួងធម្មការ និងសាសនា ដល់ព្រះមន្រ្តីសង្ឃគ្រប់ព្រះអង្គ។ សូមព្រះមន្រ្តីសង្ឃ និងព្រះចៅអធិការវត្តគ្រប់ព្រះអង្គត្រូវធ្វើការគ្រប់គ្រងវត្តឲ្យបានល្អ ស្របទៅតាមតួនាទីភារកិច្ចរបស់ព្រះមន្រ្តីសង្ឃវត្ត ពិសេសការគ្រប់គ្រងព្រះសង្ឃ អាចារ្យ គណៈកម្មការ ក្មេងវត្តនីមួយៗ ឲ្យបានច្បាស់លាស់ជៀសវាងនូវអធិករណ៍ ឬបញ្ហាផ្សេងៗដែលនាំឲ្យប៉ះពាល់តម្លៃព្រះពុទ្ធសាសនា និងតម្លៃជាតិយើង៕
