(អាមេរិក)៖ បន្ទាប់ពីលោក Brad Pitt ត្រូវបានគេចោទប្រកាន់ថា​ មានស្នេហាលួចលាក់ជាមួយនឹង តារាសម្ដែងស្រីជាតិបារំាងនាង Marion Cotillard និង បានប្រើហិង្សាលើកូន នៅពេលនេះ​ដល់វេននាង Angelina Jolie វិញម្ដង​ ដែលត្រូវបានគេចោទបកវិញថា មហិច្ឆិតារបស់នាងដែល ចង់ក្លាយជាប្រមុខ ដឹកនំាអង្គការសហប្រជាជាតិហ្នឹងហើយ ទើបជាមូលហេតុពិតប្រាកដ ដែលធ្វើឱ្យអ្នកទំាងពីរចែកផ្លូវគ្នា។ នេះបើតាមការចុះផ្សាយរបស់គេហទំព័រ TMZ​​ នៅថ្ងៃ ចន្ទ ទី២៦ ខែកញ្ញា ឆ្នាំ២០១៦។

គេហទំព័រ TMZ​​ បានឱ្យដឹងថា បើតាមប្រភពស្និតនឹងប្ដីប្រពន្ធទំាងពីរនាក់នេះ លោក Brad Pitt បានសម្តែងក្តីខឹងយ៉ាងខ្លាំង ចំពោះមហិច្ឆិតានយោបាយរបស់នាង Angelina Jolie ដោយលោកធ្លាប់ប្រាប់ ប្រពន្ធលោកថា ក្ដីស្រម៉ៃដែលចង់ក្លាយទៅជាមន្ត្រីកំពូលអង្គការសហប្រជាជាតិ មិនអាចទៅរួចឡើយ ហើយមិនតែប៉ុណ្ណោះ លោក Brad Pitt ក៏បានអន់ចិត្តផងដែរ រឿងប្រពន្ធរបស់ខ្លួនយកកូនៗទៅជាមួយ ពេលធ្វើដំណើរទៅកាន់ប្រទេស លីបង់ និង អ៊ីរ៉ាក់ ជាពិសេសនោះគឺ ភាពតានតឹងបានកើតឡើង កាន់តែខ្លាំងនៅពេលអ្នកទំាងពីរ នំាកូនទៅប្រទេសស៊ីរី ក្នុងគោលបំណងធ្វើបេសកម្មមនុស្សធម៌។   

គួរបញ្ជាក់ថា បើតាមប្រភពខាងលើដដែល លោក Brad Pitt​ តែងតែបានគំាទ្រយ៉ាងពេញទំហឹង ចំពោះការងារមនុស្សធម៌ របស់នាង Angelina Jolie ក៏ប៉ុន្តែការនំាកូនទៅជាមួយគ្រប់ទីកន្លែង បានក្លាយជាបញ្ហារវាងអ្នកទំាងពីរ អស់រយៈពេលជាច្រើនឆ្នាំមកនេះ៕