(ភ្នំពេញ)៖ កិច្ចព្រមព្រៀងនៃការយោគយល់គ្នា (MoU) ស្តីអំពីការបណ្តុះបណ្តាលជំនាញ រវាងសភាមុខរបរ និងមីក្រូសហគ្រាសកម្ពុជា (CPMEC) តំណាងដោយ លោកស្រី ឧកញ៉ា បណ្ឌិត កែវ មុំ ប្រធាន CPMEC និងវិទ្យាស្ថានជាតិបណ្តុះបណ្តាលបច្ចេកទេស (NTTI) នៃក្រសួងការងារ និងបណ្ដុះបណ្ដាលវិជ្ជាជីវៈ តំណាងដោយលោកបណ្ឌិត យ៉ោក សុទ្ធី នាយក NTTI ត្រូវបានចុះហត្ថលេខានៅថ្ងៃទី២២ ខែសីហា​ ឆ្នាំ២០២៤។

កិច្ចព្រមព្រៀងនេះធ្វើឡើងក្នុងគោលបំណង ដើម្បីបណ្តុះបណ្តាលជំនាញផ្នែកកម្មករ សំណង់ ដោយមានការព្រមព្រៀងគ្នារវាង CPMEC និង NTTI ដូចខាងក្រោម៖

* CPMEC ទទួលបន្ទុកជ្រើសរើសជំនាញដែលត្រូវការបណ្តុះបណ្តាល, ជ្រើសរើសសិក្ខាកាមមកទទួលការបណ្តុះបណ្តាល, មធ្យោបាយធ្វើដំណើរទៅ-មក ពីកន្លែងស្នាក់នៅរបស់សិក្ខាកាម, ផ្តល់ប្រាក់ឧបត្ថម្ភដល់សិក្ខាកាម, ផ្តល់អាហារសម្រន់ និងអាហារតាមពេលសិក្សា, ផ្តល់លិខិតបញ្ជាក់ការសិក្សារួមពី CPMEC និង NTTI និងសហការជាមួយ NTTI រៀបចំវាយតម្លៃសិក្ខាកាមតាមយន្តការ ដែលបានកំណត់ក្នុងពេលបណ្តុះបណ្តាលដើម្បីសន្មតថា ជាប់ ឬធ្លាក់។

ចំណែកឯ NTTI ទទួលបន្ទុកផ្តល់កន្លែងបណ្តុះបណ្តាលសម្រាប់ដំណើរការវគ្គសិក្សា, រៀបចំកម្មវិធីបណ្តុះបណ្តាល វិធីសាស្ត្របង្រៀននិងរៀន គ្រូបង្គោលមានជំនាញច្បាស់លាស់តាមមុខវិជ្ជាជំនាញនីមួយៗ, ដាក់បទបញ្ជាផ្ទៃក្នុងរបស់វិទ្យាស្ថាន តាមថ្នាលបណ្តុះបណ្តាលជំនាញដែល CPMEC នឹងផ្តល់ជូន ដើម្បីឱ្យសិក្ខាកាមយកចិត្តទុកដាក់រៀនសូត្រ និង ស្រង់វត្តមានសិក្ខាកាម និងរាយការណ៍ដល់ CPMEC រៀងរាល់សប្តាហ៍នូវសិក្ខាកាមណាដែលបោះបង់ការសិក្សា ឬរាយការណ៍បន្ទាប់ពីសិក្ខាកាមណាអវត្តមានចំនួន ០៣ថ្ងៃជាប់គ្នា។

នាឱកាសនោះ លោកស្រី ឧកញ៉ា បណ្ឌិត​ កែវ មុំ តាងនាមជាប្រធាន CPMEC បានបង្ហាញក្តីរីករាយ ដែលបានចុះអនុស្សាណៈយោគយល់គ្នា ជាមួយនឹងនាយកដ្ឋានវិទ្យាស្ថានជាតិបណ្ដុះបណ្ដាលបច្ចេកទេស ក្នុងគោលបំណងធ្វើកិច្ចសហការដ៏សំខាន់។ លោកស្រី ក៏បានស្នើវិទ្យាស្ថាន ផ្ដល់នូវវគ្គបណ្ដុះបណ្ដាលជំនាញជាច្រើនមុខ ទៅតាមតម្រូវការរបស់សមាជិក សមាជិកា CPMEC ផងដែរ៕