(ភ្នំពេញ)៖ រហូតដល់ម៉ោងជាង១១៖០០ព្រឹក ថ្ងៃទី២៦ ខែកញ្ញា ឆ្នាំ២០១៦នេះ តំណាងអយ្យការអមសាលាដំបូងរាជធានីភ្នំពេញ បានបញ្ចប់ការសាកសួរលើ លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យហើយ ចំពោះករណីដែលលោកបានដាក់ពាក្យប្តឹង ព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ពីបទបរិហារកេរ្តិ៍។

លោក ម៉ម សូណង់ដូ បានចូលបំភ្លឺជូនដំណឹងអយ្យការអស់រយៈពេលប្រមាណ៣ម៉ោង ដើម្បីបង្ហាញភស្តុតាងជូន ព្រះ​រាជ​អាជ្ញា​រង​ លោក​ ស្រី​ ម៉ាក​នី។ លោកធ្លាប់បានប្រាប់ Fresh News ឲ្យដឹងថា ចំពោះករណីនេះ លោកប្តឹងទាមទារសំណងជំងឺចិត្ត១ម៉ឺនរៀល ពីព្រះតេជគុណ ប៊ុត ប៊ុនតិញ ហើយលោក ម៉ូម សូណង់ដូ ក៏ចង់សំណូមពរតុលាការ ជំរុញឲ្យមានការផ្សឹកព្រះតេជគុណ ប៊ុត ប៊ុនតិញ។

សូមបញ្ជាក់ថា​ លោក ម៉ម សូណង់ដូ បានចោទព្រះតេជគុណ ប៊ុត ប៊ុនតិញថា បានមានសង្ឃដីកាវាយប្រហារលើរូបលោកថាបានទៅសុំ លោក សម រង្ស៊ី ដើម្បីយកតំណែងតំណាងរាស្រ្តក្រោយបោះឆ្នោត ប៉ុន្តែលោក សម រង្ស៊ី មិនឱ្យ ទើបមកបង្កើតគណបក្សថ្មី។ ទោះជាយ៉ាងណាចំពោះរឿងនេះ ព្រះតេជគុណ ប៊ុត ប៊ុនតិញ ពុំបានបំភ្លឺនោះទេថែមទទួលទទួលស្គាល់នូវសង្ឃដីការបស់ព្រះអង្គទៀតផង។

នាពេលកន្លងទៅ ព្រះតេជគុណ ប៊ុត ប៊ុនតិញ បានមានសង្ឃដីកាថា ព្រះតេជគុណមិនចាប់អារម្មណ៍ នឹងការគំរាមប្តឹងរបស់ លោក ម៉ម សូណង់ដូនោះ ទេ ហើយថា អ្វីដែលព្រះអង្គធ្លាប់លើកឡើងនោះ គឺជាការបញ្ចេញមតិតែប៉ុណ្ណោះ៕