(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា វត្ថុបុរាណដែលកម្ពុជាទទួលបានមកវិញនាពេលនេះ គឺជាមរតកវប្បធម៌ជាតិ ដែលមានតម្លៃពុំអាចកាត់ថ្លៃបាន សម្រាប់ប្រជាជនកម្ពុជា ដែលជាម្ចាស់ដើមដ៏ពិតប្រាកដនៃសម្បត្តិវប្បធម៌ទាំងនេះ។

​សម្តេចធិបតី ថ្លែងបែបនេះ ធ្វើឡើងឱកាសដែលសម្ដេច​អញ្ជើញជាអធិបតីពិធីទទួលស្វាគមន៍​នៃការវិលត្រឡប់មកវិញនូវសម្បត្តិបេតិកភណ្ឌ វប្បធម៌ជាតិសរុបចំនួន ៧០ រូប នាព្រឹកថ្ងៃទី២២​ ខែសីហា ឆ្នាំ២០២៤​ នៅវិមានសន្តិភាព។ វត្ថុបុរាណ​ ទាំងនោះរួម វត្ថុចំនួន ១៤ រូប បានប្រគល់មកវិញពីសារមន្ទីរ Metropolitan Museum of Art នៅទីក្រុងញូវយ៉ក និង៥៦ រូប ទៀត បានប្រគល់មកវិញពីអ្នកប្រមូល សមុច្ច័យឯកជននានា នៅសហរដ្ឋអាមេរិក​ ដែលសុទ្ធសឹងតែជាវត្ថុបុរាណខ្មែរដ៏ពិចិត្រ។ ​

សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះថា «វត្ថុបុរាណដែលយើងទទួលបានមកវិញនាពេលនេះ ជាមរតកវប្បធម៌ជាតិ ដែលមានតម្លៃពុំអាច កាត់ថ្លៃបាន សម្រាប់ប្រជាជនកម្ពុជា ដែលជាម្ចាស់ដើមដ៏ពិតប្រាកដនៃសម្បត្តិវប្បធម៌ទាំងនេះ។ ការទទួលបានវត្ថុបុរាណទាំងនេះជានិមិត្តរូបនៃការជួបជុំគ្នាឡើងវិញនៃព្រលឹងបុព្វបុរសខ្មែរដែលតែងតែស្ថិតនៅជាប់ជាមួយប្រជាជាតិ និងប្រជាជនកម្ពុជាគ្រប់ពេលវេលា។ ការយាងត្រឡប់មកវិញនៃព្រលឹងដូនតាគឺជាបុគ្គលរបស់ជាតិ ដែលជួយប្រោះព្រំ និងព្យាបាលស្នាមរបួសផ្លូវចិត្តរបស់កម្ពុជា និងរបស់ប្រជាជនកម្ពុជាដែលបានរងគ្រោះឈឺចាប់នៅក្នុងអំឡុងសង្រ្គាមស៊ីវិលរាប់ទស្សវត្ស និងសោកនាថកម្មនៃអំពើប្រល័យពូជសាសន៍ខ្មែរក្រហម»។

សម្តេចធិបតីមានប្រសាសន៍ថា សមិទ្ធផលនាពេលនេះ បានឆ្លុះបញ្ចាំងឱ្យឃើញពីការប្ដេជ្ញាចិត្តខ្ពស់របស់រាជរដ្ឋាភិបាលកម្ពុជា និងពីសារៈសំខាន់នៃកិច្ចសហប្រតិបត្តិការ ដ៏ល្អជាមួយបណ្តាប្រទេសនានា និង សហគមន៍អន្តរជាតិ នៅក្នុងយុទ្ធនាការសកល ដើម្បីប្រយុទ្ធប្រឆាំងអំពើចោរកម្ម​ ការចរាចរ និង ការជួញដូរខុសច្បាប់នៃសម្បត្តិវប្បធម៌។

សម្តេចធិបតីបន្ថែមថា ​ក្រសួងវប្បធម៌ និង វិចិត្រសិល្បៈ ដែលជាសេនាធិការរបស់រាជរដ្ឋាភិបាលនៅក្នុងយុទ្ធនាការនេះ បានបំពេញការងារយ៉ាងយកចិត្តទុកដាក់បំផុត មួយជំហានម្តងៗក្នុងការស្រាវជ្រាវ ការប្រមូលភស្តុតាង ការសម្របសម្រួល ការច​ចារកិច្ចសហការជាមួយភាគីនានា ក៏ដូចជាភាគីពាក់ព័ន្ធជាច្រើន ក្នុងការទាមទារការបញ្ជូនត្រឡប់មកវិញនូវរតនសម្បត្តិដែលបានបាត់បង់ដើម្បីទុកជាកេរ្តិ៍ដំណែលវប្បធម៌ និងអត្តសញ្ញាណជាតិ សម្រាប់ឱ្យកូនខ្មែរជំនាន់ក្រោយសិក្សាឈ្វេងយល់ពីប្រវត្តិសាស្រ្តនិងគុណតម្លៃនៃវប្បធម៌ អរិយធម៌ដ៏ខ្ពង់ខ្ពស់របស់បុព្វបុរសយើង និងដើម្បីជាឧត្តមប្រយោជន៍សម្រាប់មនុស្សជាតិទូទៅ។

​សូមជម្រាបថា​ គិតចាប់ពីឆ្នាំ ១៩៩៦ រហូតដល់ខែកក្កដា ឆ្នាំ២០២៤​ មានវត្ថុសិល្បៈខ្មែរសរុបចំនួន១០៩៨ វត្ថុ​ ក្នុងនោះ ៥៧១ វត្ថុ ប្រគល់ដោយសប្បុរជន និង ៥២៧ វត្ថុ ប្រគល់ដោយរដ្ឋាភិបាល ឬ ស្ថាប័ននានា​ បានប្រគល់ត្រឡប់មកកម្ពុជាវិញពីប្រទេសចំនួន ១៥ ដូចជា៖ សហរដ្ឋអាមេរិក, បារាំង, អូស្ត្រាលី, អង់គ្លេស, ថៃ, ជប៉ុន, ឥណ្ឌូនេស៊ី, ហូឡង់, ស្វីស, កាណាដា, ដាណឺម៉ាក, អាល្លឺម៉ង់, ហុងគ្រី, ស្ទ័រវេស និងចិន​៕