(កណ្ដាល)៖ លោក នូ សាខន ប្រធានក្រុមប្រឹក្សាខេត្ត និងលោក គួច ចំរើន អភិបាលខេត្ត បានលើកទឹកចិត្តពលរដ្ឋទូទាំងខេត្ត រួមគ្នាដាំដើមឈើឲ្យបានច្រើន ដើម្បីបរិស្ថានយើងល្អ និងមានចីរភាពបរិស្ថានធម្មជាតិ ពិសេសស្នើរដល់លោកគ្រូ អ្នកគ្រូ ជម្រុញឲ្យកូនសិស្សឲ្យចេះស្រលាញ់បរិស្ថាន ព្រៃឈើ និងចូលរួមដាំដើមឈើឲ្យបានច្រើននៅតាមសាលារៀនផងដែរ។
ថ្នាក់ដឹកនាំខេត្តទាំងទ្វេបានលើកទឹកបែបនេះ នៅគ្រាដែលធ្វើជាអធិបតីក្នុងទិវាអបអរសាទរ រុក្ខទិវា ៩ កក្កដា ឆ្នាំ២០២៤ និងដាំដើមឈើ ចំនួន ១,៥៨៣ដើម នៅបរិវេណវិទ្យាល័យ ហ៊ុន សែន ថ្នល់ទទឹង និងលើកំណាត់ផ្លូវជាតិលេខ៤ ស្ថិតនៅស្រុកអង្គស្នួលនាថ្ងៃទី២១ ខែសីហា ឆ្នាំ២០២៤នេះ។ ពិធីនេះក៍មានវត្តមានលោក នូ សុវណ្ណរិទ្ធ អភិបាលស្រុកផងដែរ។
លោក គួច ចំរើន អភិបាលខេត្តកណ្ដាល បានថ្លែងនូវការកោតសរសើរ ចំពោះខណ្ឌរដ្ឋបាលព្រៃឈើកណ្ដាល ដែលបានយកចិត្តទុកដាក់បណ្ដុះកូនឈើ និងដាំកូនឈើនាពេលនេះ និងជម្រុញឲ្យមើលថែ ថែទាំ ស្រោចទឹកឲ្យឈើដែលដាំទាំងអស់នេះ លូតលាស់ធំទៅៗ ចៀសវាងឆ្នាំក្រោយមានតែដីមិនមានដើមឈើដែលយើងបានដាំនៅថ្ងៃនេះ។
អភិបាលខេត្ត ក៏បានស្នើមន្ត្រីរាជការ អាជ្ញាធរគ្រប់លំដាប់ថ្នាក់ និងប្រជាពលរដ្ឋទាំងអស់ ត្រូវគិតគូ ដើម្បីអនាគតកូនចៅយើងជំនាន់ក្រោយ ក្រៅពីសាលារៀន វត្តអារ៉ាម និងទីសាធារណៈ អោយតែមានដីទំនេរសូមនាំគ្នាដាំដើមឈើទាំងអស់គ្នា។
ក្នុងឱកាសនោះ លោកអភិបាលខេត្ត បានជម្រាប និងពន្យល់អំពីស្ថានភាពនយោបាយក្នុងប្រទេសបច្ចុប្បន្ន ដែលក្រុមទុច្ចរិត អគតិកំពុងញុះញង់បង្កចលាចលលើបញ្ហាកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (DTA)។ លោកបន្ថែមថា កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម មិនបានធ្វើឱ្យយើងបាត់បង់ទឹកដីដូចក្រុមទុច្ចរឹតកំពុងញុះញង់នោះឡើយ តែបានផ្តល់ផលប្រយោជន៍ផ្នែកសេដ្ឋកិច្ច ពាណិជ្ជកម្ម កសិផលរបស់ប្រជាពលរដ្ឋ ការអភិវឌ្ឍជាហេដ្ឋារចនាសម្ព័ន្ធ ផ្តល់ការងារជូនពលរដ្ឋ កំណើនមនុស្សរស់នៅតំបន់នោះ និងទេសចរណ៍ នោះទើបជាការការពារបូរណភាពទឹកដីពិតប្រាកដ។
លោកអភិបាលខេត្ត បញ្ជាក់បន្ថែមថា អតីតកាលដែលយើងមិនទាន់មានការអភិវឌ្ឍន៍ យើងពិបាកធ្វើដំណើរ ទៅតំបន់នោះតាមផ្លូវគោកណាស់ តែបន្ទាប់ពីមានការអភិវឌ្ឍន៍យើងមានផ្លូវជាច្រើនខ្សែ ពិសេសយើងមានផ្លូវក្រវ៉ាត់ព្រំដែន ហើយយើង និងមានប្រជាពលរដ្ឋរស់នៅទីនោះច្រើន ក្នុងករណីមានការឈ្លានពានណាមួយប្រជាពលរដ្ឋនៅទីនោះនឹងរាយការណ៍អោយយើងដឹង ដែលនេះជាផ្លែផ្កានៃការអភិវឌ្ឍន៍នៅទីនោះ។
លោកអភិបាលខេត្ត ស្នើឱ្យយុវជន ប្រជាពលរដ្ឋខ្មែរទាំងអស់គ្នា សូមថែរក្សាការពារសន្តិភាព ស្ថេរភាព ដែលជាឱកាសក្នុងការអភិវឌ្ឍប្រទេស ដើម្បីភាពថ្កុំថ្កើងយូរអង្វែងតទៅរបស់យើងទាំងអស់គ្នា។
ជាមួយគ្នានេះ លោក អំ ចាន់បូរិត នាយខណ្ឌរដ្ឋបាលព្រៃឈើកណ្តាល បានឱ្យដឹងថា៖ ក្នុងឆ្នាំ២០២៤នេះ ខណ្ឌរដ្ឋបាលព្រៃឈើធ្វើការបណ្តុះកូនឈើបានចំនួន ៦០,២១៨ដើម ហើយបានធ្វើការផ្តល់ជូនក្រុង ស្រុក ឃុំ សង្កាត់យកទៅ ដាំតាមទីសាធារណៈក្នុងមូលដ្ឋាន អង្គភាពនានា និងប្រជាពលរដ្ឋសរុបចំនួន ៥២,៦៩៥ដើម ហើយការដាំដើមឈើ រុក្ខទិវា ឆ្នាំ២០២៤នេះ បានកំណត់យកទីតាំងបរិវេណវិទ្យាល័យ ហ៊ុន សែន ថ្នល់ទទឹង និងនៅលើកំណាត់ផ្លូវជាតិលេខ៤ ស្ថិតនៅឃុំឆក់ឈើនាង ឃុំពើក ឃុំលំហាច ឃុំដំណាក់អំពិល ស្រុកអង្គស្នួល ខេត្តកណ្តាល ដោយដាំ សងខាងផ្លូវ មានប្រវែង ១៤ ៦៧៣ ម៉ែត្រ បានដាំកូនឈើក្ងោកចំនួន ១៥៨៣ដើម ហើយក្នុងពិធីនេះដែរក៏បានត្រៀមកូនឈើ ចំនួន ៥ ០០០ដើមទៀត សម្រាប់ផ្តល់ជូនរដ្ឋបាលស្រុក ឃុំ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ ដែលបានអញ្ជើញមកចូលរួមដើម្បីយកទៅដាំនៅតាមទីសាធារណៈ និងភូមិឋានផងដែរ៕
