(ស្វាយរៀង)៖ លោក ញ៉ែម សារី អភិបាលរងខេត្តស្វាយរៀង និងជាប្រធានការិយាល័យទំនាក់ទំនងព្រំដែន BLO បាវិត តំណាងលោក ប៉េង ពោធិ៍សា អភិបាលខេត្ត និងលោកឧត្តមសេនីយ៍ឯក នាក់ យុទ្ធា អគ្គលេខាធិការរងនៃអគ្គលេខាធិការដ្ឋាន អ.ជ.ប.គ.ញ បានដឹកនាំកិច្ចប្រជុំពិភាក្សាស្តីពីការអនុវត្តសកម្មភាព ត្រួតពិនិត្យ ឆែកឆេរ និងប្រយុទ្ធប្រឆាំងគ្រឿងញៀនខុសច្បាប់ និងសារធាតុគីមីផ្សំ។

ដែលកិច្ចប្រជុំនេះធ្វើឡើងនាថ្ងៃទី២០ ខែសីហា ឆ្នាំ២០២៤ សាលប្រជុំប៉ុស្តិ៍នគរបាលច្រកទ្វារព្រំដែនអន្តរជាតិបាវិត ក្រុងបាវិត ខេត្តស្វាយរៀង។

លោក ញ៉ែម សារី អភិបាលរងខេត្តស្វាយរៀង បានថ្លែងថា សម្រាប់ខេត្តស្វាយរៀងបានរៀបចំលំហាត់អនុវត្តល្បាតចល័តតាមព្រំដែនបែបនេះម្តងរួចមកហើយ កាលពីឆ្នាំ២០២៣កន្លងទៅ ក្នុងគោលបំណងសំខាន់ គឺដាក់សម្ពាធដល់ក្រុមឧក្រិដ្ឋជន តាមរយៈការពង្រឹងការងារគ្រប់គ្រង ត្រួតពិនិត្យ ឆែកឆេរ ស្វែងរក និងបង្ក្រាបបទល្មើសគ្រឿងញៀនខុសច្បាប់ និងសារធាតុគីមីផ្សំ ដោយកម្លាំងសមត្ថកិច្ចជំនាញបានយកចិត្តទុកដាក់ ត្រួតពិនិត្យ ឆែកឆេក លើមធ្យោបាយដឹកជញ្ជូន រថយន្តដឹកទំនិញ អ្នកធ្វើដំណើរ (ចេញ-ចូល) ឆ្លងកាត់ព្រំដែន ទទួលបានលទ្ធផលគួរជាទីមោទនៈ។

លោកថា សមិទ្ធផលទាំងនេះ កើតចេញពីការខិតខំប្រឹងប្រែងរួមគ្នាពីគ្រប់សមាសភាពពាក់ព័ន្ធ នៅក្នុងការប្រយុទ្ធប្រឆាំងគ្រឿងញៀន ហើយក៏ជាកត្តាលីករ ដែលជំរុញឲ្យបន្តប្រមូលផ្ដុំ កម្លាំង សំដៅបង្កើនប្រសិទ្ធភាពក្នុងការបង្ការ ទប់ស្កាត់ ប្រយុទ្ធ ប្រឆាំង និងលុបបំបាត់ការជួញដូរ ការ ចែកចាយ និងការប្រើប្រាស់គ្រឿងញៀនឲ្យឈានទៅសម្រេច បាននូវវឌ្ឍនភាព និងសមិទ្ធផល ថ្មីៗថែមទៀតជូនដល់សង្គមជាតិ ក៏ដូចជាខេត្តស្វាយរៀងផងដែរ។

សូមបញ្ជាក់ថា បន្ទាប់ពីចប់កិច្ចប្រជុំលោក ញ៉ែម សារី និងលោកឧត្តមសេនីយ៍ឯក នាក់ យុទ្ធា ព្រមទាំងលោក លោកស្រី ក្រុមការងារបានចេញល្បាតចល័តត្រួតពិនិត្យតាមបណ្តោយព្រំដែន (កម្ពុជា-វៀតណាម)ដើម្បីពង្រឹងការដឹកនាំការផ្លាស់ប្តូរពត៌មានចារកម្ម និងការស៉ើបអង្កេតប្រត្តិបត្តិការបទល្មើសឆ្លងដែន ព្រមទាំងត្រួតពិនិត្យយានយន្ត មធ្យោបាយធ្វើដំណើរ និងអ្នកដំណើរឆ្លងដែន និងនៅទីតាំងភូមិសាស្ត្រ ស្លាបឆ្វេង-ស្លាបស្តាំ ស្ថិតនៅក្នុងក្រុងបាវិត ខេត្តស្វាយរៀង៕