(ពោធិ៍សាត់​)៖​ យ៉ាងហោចណាស់បុរសម្នាក់បានស្លាប់ ក្នុងហេតុការណ៍គ្រោះថ្នាក់ចរណ៍ បង្កឡើងដោយរថយន្តទីកូមួយគ្រឿង បានបើកទៅបុកនឹងរថយន្ត Lexus 470 របស់សមាជិកគណៈកម្មការទី៧ នៃព្រឹទ្ធសភាព បណ្តាលឲ្យកៀបជាប់រថយន្ត។

ហេតុការណ៍​នេះ​ កើតឡើងនៅវេលាម៉ោង៧៖៣០នាទីយប់ ថ្ងៃទី២៥ ខែកញ្ញា​ ឆ្នាំ​២០១៦​ ត្រង់ចំណុច​បង្គោលគីឡូម៉ែត្រ១៦៨ និង១៦៩​ លើកំណាត់ផ្លូវជាតិលេខ៥​ ស្ថិតក្នុងភូមិ​កណ្តុរស ឃុំ​បឹងកន្ទួត ស្រុកក្រគរ ខេត្តពោធិ៍សាត់​។​

លោក​ ឯម រុន​ អធិការ​នគរបាលស្រុកក្រគរ បានប្រាប់ភ្នាក់ងារ​ Fresh​ News​ ឲ្យដឹងនៅព្រឹកថ្ងៃទី២៦ ខែកញ្ញានេះថា​ សាកសពជនរងគ្រោះ ​ដែលកៀបជាប់រថយន្តទីកូ ត្រូវបានគេស្គាល់ឈ្មោះថា​ ម៉ាត់ តុលលាស់​ ភេទប្រុស​ អាយុ៣៤ឆ្នាំ​ ជនជាតិខ្មែរឥស្លាម រស់នៅភូមិក្រោលក្របី ឃុំត្រពាំងជង ស្រុកបាកាន ខេត្តពោធិ៍សាត់​។​

លោកអធិការបានបន្តថា​ ​មុនពេលកើតហេតុ គេឃើញរថយន្តទីកូមួយគ្រឿង ពណ៌ខៀវ ពាក់ស្លាកលេខ ភ្នំពេញ 2C-3974 បើកបរក្នុងទិសដៅពីកើតទៅលិច បើកបរដោយឈ្មោះ ម៉ាត់ តុលលាស់​ ភេទប្រុស​ អាយុ៣៤ឆ្នាំ​ ជនជាតិខ្មែរឥស្លាម (ស្លាប់) លុះមកដល់ចំណុចកើតហេតុខាងលើ បានបើកចូលទ្រូងផ្លូវខាងត្បូង ក៏ជ្រុលទៅបុកជាមួយរថយន្ត Lexus 470 ពណ៌ខ្មៅ ពាក់ស្លាកលេខព្រឹទ្ធសភា 2-046 ក្នុងទិសដៅបញ្ច្រាស់ទិសគ្មា ពីលិចទៅកើត បើកបរដោយឈ្មោះ យឹម ឃុនឃឿន ភេទប្រុស អាយុ៦០ឆ្នាំ ជនជាតិខ្មែរ ជាសមាជិកព្រឹទ្ធសភា ក្នុងគណៈកម្មការទី៧ (របួសស្រាល) រួមដំណើរជាមួយមនុស្ស៣នាក់ ១-ជា ស៊ីណា ភេទប្រុស អាយុ ៣៤ឆ្នាំ ជនជាតិខ្មែរ ២-ហុង នឿន ភេទប្រុស អាយុ ៣២ឆ្នាំ ជនជាតិខ្មែរ និង៣-កែវ ផាន់ណា ភេទប្រុស អាយុ១៩ឆ្នាំ ជនជាតិខ្មែរ ទាំង៤នាក់ខាងលើមានទីលំនៅ រាជធានីភ្នំពេញ។

បច្ចុប្បន្នសាកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យ តាមប្រពៃណី​ ចំណែកវត្ថុតាងរថយន្ត ត្រូវបានកម្លាំងនគរបាលមូលដ្ឋានស្ទូច ទៅរក្សាទុកនៅអធិការស្រុកក្រគរ រងចាំដោះស្រាយគ្នានៅពេលក្រោយ៕