(ពោធិ៍សាត់)៖ អយ្យការអមសាលាដំបូងខេត្តពោធិ៍សាត់ នាថ្ងៃទី១៨ ខែសីហា ឆ្នាំ២០២៤ បានចោទប្រកាន់ និងតុលាការបានចេញដីកាឃុំខ្លួនជនសង្ស័យម្នាក់ឈ្មោះ ថន ចាន់ថាន អាយុ៣៥ឆ្នាំ ក្រោមបទចោទប្រព្រឹត្តបទល្មើសរួមគំនិតក្បត់ ក្រោយចែកចាយវីដេអូតាមហ្វេសប៊ុកពីប្រភពទំព័រហ្វេសប៊ុកផ្សេងៗ ក្នុងចេតនាចូលរួមញុះញង់បំផុសបំផុលឲ្យអ្នកដទៃប្រឆាំងផ្តួលរំលំរាជរដ្ឋាភិបាលស្របច្បាប់ ដែលអាចប្រឈមនឹងជាប់ពន្ធនាគារពី៥ឆ្នាំទៅ១០ឆ្នាំ តាមបញ្ញត្តិមាត្រា៤៥៣នៃក្រមព្រហ្មទណ្ឌ។

បើតាមសេចក្តីប្រកាសព័ត៌មានរបស់អ្នកនាំពាក្យអយ្យការអមសាលាដំបូងខេត្តពោធិ៍សាត់ បានឲ្យដឹងថា នៅថ្ងៃទី១៧ ខែសីហា ឆ្នាំ២០២៤ កម្លាំងអធិការដ្ឋាននគរបាលស្រុកភ្នំក្រវាញ បានចុះប្រតិបត្តិការស្រាវជ្រាវស៊ើបអង្កេតគណនី ហ្វេសប៊ុក (Facebook) ចំនួនពីរគណនី ឈ្មោះ ជាងថា ក្រវាញជាងដែក និងឈ្មោះ ជាងថានសិប្បកម្មដែកកញ្ចក់អីណុក ដែលប្រើប្រាស់និងគ្រប់គ្រងដោយជនសង្ស័យឈ្មោះ ថន ចាន់ថាន អាយុ៣៥ឆ្នាំ។ ដោយនៅថ្ងៃទី០៧ ដល់ថ្ងៃទី១៧ ខែសីហា ឆ្នាំ២០២៤ គណនីហ្វេសប៊ុកឈ្មោះ ជាងថាន ក្រវាញជាងដែក បានចែករំលែកវីដេអូពីផេកហ្វេសប៊ុកមកពីប្រភពផ្សេងៗ ដែលមានឈ្មោះ Davit Davit, ផេកហ្វេសប៊ុកឈ្មោះ Thaverak ថាវរៈ, ផេកហ្វេសប៊ុកឈ្មោះ PATH, ផេកហ្វេសប៊ុក 24K, ផេកហ្វេសប៊ុកឈ្មោះ SAD និងបានសរសេរខ្លឹមសារបន្ថែម ក្នុងន័យបំផុសបំផុល កៀរគរឱ្យមហាជនចូលរួមប្រឆាំងផ្តួលរំលំរាជរដ្ឋាភិបាលស្របច្បាប់។ សកម្មភាពនេះត្រូវបានកម្លាំងសមត្ថកិច្ចឃាត់ខ្លួនជនសង្ស័យឈ្មោះ ថន ចាន់ថាន រស់នៅភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់ និងដកហូតបានទូរស័ព្ទចំនួន២គ្រឿង ដែលជាឧបករណ៍សម្រាប់ប្រើប្រាស់ក្នុងការប្រព្រឹត្តបទល្មើស។

ក្រោយពីទទួលបានសំណុំរឿង ពិនិត្យភស្តុតាងដែលដកហូត និងធ្វើការសួរចម្លើយជនសង្ស័យតាមនីតិវិធីរួចមក តំណាងអយ្យការបានសម្រេចចោទប្រកាន់លើជនសង្ស័យខាងលើ ពីបទរួមគំនិតក្បត់ប្រព្រឹត្តនៅភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់ និងតាមបណ្ដាញទំនាក់ទំនងសង្គមហ្វេសប៊ុក (Facebook) កាលពីថ្ងៃទី០៧ ដល់ថ្ងៃទី១៧ ខែសីហា ឆ្នាំ២០២៤ តាមបញ្ញត្តិមាត្រា ៤៥៣ នៃក្រមព្រហ្មទណ្ឌ ដែលត្រូវផ្តន្ទាទោសដាក់ពន្ធនាគារពី៥ឆ្នាំទៅ១០ឆ្នាំ តាមរយៈដីកាសន្និដ្ឋានបញ្ចូនរឿងឱ្យស៊ើបសួរលេខ៖ ២៦៧១ អ.ក/២៤ ចុះថ្ងៃទី១៨ ខែសីហា ឆ្នាំ២០២៤ ដើម្បីចាត់ការបន្តតាមនីតិវិធី៕