(ព្រះវិហារ)៖ រដ្ឋបាលខេត្តព្រះវិហារ នៅព្រឹកថ្ងៃទី១២ ខែសីហា ឆ្នាំ២០២៤ បានរៀបចំពិធីអបអរសាទរទិវាអន្តរជាតិ ជនជាតិដើមភាគតិចពិភពលោកលើកទី៣០ និងលើកទី២០ នៅកម្ពុជា ក្រោមប្រធានបទ «ការពារសិទ្ទិរស់នៅ និងប្រាស្រ័យទាក់ទងតាមបែបប្រពៃណីជនជាតិដើមភាគតិចដោយស្ម័គ្រចិត្ត»។

ពិធីនេះបានធ្វើឡើងក្រោមវត្តមានលោក គីម រិទ្ធី អភិបាលខេត្តព្រះវិហារ ដោយមានការចូលរួមពីតំណាងក្រសួងអភិវឌ្ឍន៍ជនបទ ក្រសួងមហាផ្ទៃ តំណាងអង្គការសម្ព័ន្ធជនជាតិដើមភាគតិចកម្ពុជា អង្គការជាតិ អន្តរជាតិ ដៃគូរអភិវឌ្ឍន៍ ថ្នាក់ដឹកនាំ មន្ត្រីរាជការ កម្លាំងប្រដាប់អាវុធ អាជ្ញាធរមូលដ្ឋាន និងប្រជាពលរដ្ឋជាច្រើនរូបទៀត។

លោក គីម រិទ្ធី បានថ្លែងថា ការរៀបចំពិធីអបអរសាទរទិវាអន្តរជាតិជនជាតិដើមភាគតិចពិភពលោកលើកទី៣០ និងលើកទី២០ នៅកម្ពុជា ក្រោមប្រធានបទ«ការពារសិទ្ធិរស់នៅ និងប្រាស្រ័យទាក់ទងតាមបែបប្រពៃណីជនជាតិដើមភាគតិចដោយស្ម័គ្រចិត្ត» នាឱកាសនេះ គឺស្ថិតក្រោមម្លប់នៃសុខសន្តិភាព និងការអភិវឌ្ឍន៍រីកចម្រើនលើគ្រប់វិស័យ និងជាសក្ខីភាពមួយបង្ហាញឱ្យឃើញថា រាជរដ្ឋាភិបាលកម្ពុជាបាននិងកំពុងបន្តយកចិត្តទុកដាក់ ដល់បងប្អូនជនជាតិដើមភាគតិច ដោយផ្តល់ឱកាស និងសិទ្ធសេរីភាព ក្នុងការបញ្ចេញមតិយោបល់ក្នុងការអភិវឌ្ឍលើគ្រប់វិស័យ តាមរយះការអភិវឌ្ឍគម្រោងនានា ស្របតាមយុទ្ធសាស្ត្រកាត់បន្ថយភាពក្រីក្រនៅកម្ពុជា។

លោកអភិបាលខេត្តព្រះវិហារ បានថ្លែងទៀតថា ដោយយោងតាមគោលនយោបាយ ច្បាប់ អនុក្រឹត លិខិតុបករណ៍ ក្នុងការទទួលស្គាល់ និងការពារសិទ្ធិជនជាតិដើមភាគតិច និងយោងសេចក្តីសម្រេចរបស់មហាសន្និបាតអង្គការសហប្រជាជាតិ ដែលបានសម្រេចឱ្យមានទិវាអន្តរជាតិ នៃជនជាតិដើមភាគតិចពិភពលោកនៅថ្ងៃទី៩ ខែសីហា នេះឡើង ក្នុងគោលបំណងដើម្បីពង្រឹងបន្ថែមទៀត នូវកិច្ចសហប្រតិបត្តិការអន្តរជាតិ សម្រាប់ដោះស្រាយបញ្ហានានាដែលប្រឈមចំពោះជនជាតិដើមភាគតិច ក្នុងវិស័យមួយចំនួនដូចជា អប់រំ សុខភាព សិទ្ធិ មនុស្ស បរិស្ថាន និងការអភិវឌ្ឍន៍សង្គម សេដ្ឋកិច្ច ចូលរួមថែរក្សាវប្បធម៍ ប្រពៃណី ទំនៀមទំលាប់ និងភាសាជនជាតិដើមភាគតិច ស្របតាមការប្តេជ្ញាចិត្តរបស់រាជរដ្ឋាភិបាលកម្ពុជា។

លោក គីម រិទ្ធី ក៏បានថ្លែងបញ្ជាក់ប្រាប់ប្រជាពលរដ្ឋ ពិសេសបងប្អូនប្រជាពលរដ្ឋជនជាតិដើមភាគតិច អំពីសមិទ្ធិផលធំៗជាប្រវត្តិសាស្ត្ររបស់កម្ពុជា ក្នុងចំណោមសមិទ្ធិផលជាច្រើន ដែលបានដាក់ចេញដោយរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការប្រែក្លាយកម្ពុជា ជាប្រទេសមានចំណូលខ្ពស់នៅឆ្នាំ២០៥០ នោះគឺ៖

* «ព្រែកជីកហ្វូណនតេជោ»ដែលជាគំនិតផ្តួចផ្តើមប្រកបដោយចក្ខុវិស័យវែងឆ្ងាយ របស់សម្តេចតេជោ ហ៊ុន សែន អតីតនាយករដ្ឋមន្ត្រី ដែលបានបើកការដ្ឋានសាងសង់នាថ្ងៃទី៥ ខែសីហា ឆ្នាំ២០២៤ ក្នុងការបម្រើផលប្រយោជន៍វិស័យសេដ្ឋកិច្ច សង្គម ការដឹកជញ្ជូនវិស័យកសិកម្ម វិស័យទេសចរណ៍ និងវិស័យជាច្រៀនទៀត ព្រមទាំងបានបន្សល់ជាកេរមរតកប្រវត្តិសាស្ត្រសម្រាប់កូនចៅជំនាន់ក្រោយរាប់ពាន់ឆ្នាំតទៅមុខ។

* កិច្ចសហការតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV_DTA)ដើម្បីតភ្ជាប់នូវពាណិជ្ជកម្ម និងបង្កើននូវកសិ-ពាណិជ្ជកម្ម ត្រីភាគី សំដៅលើកកម្ពស់ការអភិវឌ្ឍន៍សេដ្ឋកិច្ច និងជាពិសេសគឺកាត់បន្ថយកម្លាតសេដ្ឋកិច្ច និងពាណិជ្ជកម្ម រវាងខេត្តតំបន់ដាច់ស្រយ៉ាល និងរាជធានីភ្នំពេញ ខេត្តនៅទីប្រជុំជន៕