(កណ្តាល)៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិ ចុះជួយស្រុកកោះធំ រួមនិងក្រុមការងារ នៅព្រឹកថ្ងៃទី២៤ ខែកញ្ញា ឆ្នាំ២០១៦ ត្រូវនិងថ្ងៃកាន់បិណ្ឌទី៨ បានអញ្ជើញទៅដាក់បិណ្ឌ និងប្រគេនទេយ្យទានមួយចំនួនដល់ព្រះសង្ឃ នៅតាមបណ្តាវត្តនានាក្នុងស្រុកកោះធំ ខេត្តកណ្តាល។
ក្នុងឱកាសអញ្ជើញដាក់បិណ្ឌតាមលំអាន នៃព្រះពុទ្ធសាសនានេះ លោកទេសរដ្ឋមន្រ្តី ស៊ុន ចាន់ថុល បានឧទ្ទិសមគ្គផល កើតចេញពីការប្រគេនទេយ្យទានដល់ព្រះសង្ឃ ដល់ដួងវិញ្ញាណក្ខន្ធបុព្វការីជន ព្រមទាំងវីរជនអ្នកតស៊ូ ដែលបានពលីជីវិតក្នុងបុព្វហេតុជាតិមាតុភូមិទាំងអស់ ឲ្យបានទៅកាន់សុគតិភព និងបានយោនយកកំណើតកើតជាក្នុងទីឋានដ៏សមគួរ។
វត្តដែលលោក ស៊ុន ចាន់ថុល និងក្រុមការងារបានទៅដាក់បិណ្ឌ និងប្រគេនទេយ្យទានដល់ព្រះសង្ឃនាព្រឹកនេះ រួមមាន៖ វត្តសំប៉ាន វត្តព្រែកតាឌួង និងវត្តកំពង់សំបួរ៕
