(ក្រចេះ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ដឹកនាំការចែកអំណោយជាសម្ភារសិក្សាដល់សិស្សានុសិស្សជាង ៣០០នាក់ នៅក្នុងស្រុកចិត្របុរី ខេត្តក្រចេះ។

ពិធីនេះបានធ្វើឡើងនាថ្ងៃទី៧ ខែសីហា ឆ្នាំ២០២៤ ដោយមានការអញ្ជើញចូលរួមពីសមាគមនារីកម្ពុជា ដើម្បីសន្តិភាព និងអភិវឌ្ឍន៍សាខាក្រសួងព័ត៌មាន អាជ្ញាធរមូលដ្ឋានខេត្តក្រចេះ រួមនឹងមូលនិធិសប្បុរសធម៌វ័នរ៉ូដ។

នាឱកាសនោះដែរ លោករដ្ឋមន្ត្រី នេត្រ ភក្ត្រា បានថ្លែងថា យើងទាំងគ្នាខិតខំប្រឹងប្រែងដើម្បីផ្តល់ស្នាមញញឹមកាន់តែច្រើនដល់សិស្សានុសិស្សនៅតាមទីជនបទតាមរយៈការផ្តល់ការគាំទ្រជាសម្ភារសម្រាប់សិក្សា។

នៅចំពោះមុខមាតាបិតាអាជ្ញាធរមូលដ្ឋាន និងសិស្សានុសិស្ស, លោករដ្ឋមន្ត្រី នេត្រ ភក្ត្រា បានលើកឡើងថា៖ «កុមារតំណាងឱ្យធនធានសក្តានុពលរបស់ប្រទេសជាតិ ដែលនឹងត្រូវបន្តវេននាពេលអនាគត។ ដូច្នេះ យើងទាំងអស់ត្រូវចូលរួមផ្តល់ក្តីស្រឡាញ់ ភាពសប្បាយរីករាយ និងក្តីសង្ឃឹមសម្រាប់កុមារទាំងអស់ ព្រមទាំងចូលរួមអប់រំបណ្តុះបណ្តាលចំណេះដឹងដល់ពួកគេដើម្បីពួកគេក្លាយខ្លួនជាកូនល្អ សិស្សល្អ និងជាប្រជាពលរដ្ឋល្អសម្រាប់សង្គមជាតិ។ កុមារកម្ពុជាទទួលបានភាពសុខសាន្ត និងការបីបាច់ថែក្សា ដោយក្តីអាណិតស្រលាញ់គ្រប់ៗគ្នា»។

អំណោយដែលត្រូវចែកជូនដល់សិស្សានុសិស្សជាង ៣០០នាក់ នៅក្នុងស្រុកចិត្របុរីនេះ ដោយក្នុងម្នាក់ៗទទួលបានកាតាប១ ដបដាក់ទឹក១ រួមទាំងនំ និងសម្ភារៈសិក្សាជាច្រើនមុខទៀត ដែលជាអំណោយរបស់ ក្រុមហ៊ុន GWM , One Road Group អង្គការមូលនិធិសប្បុរសធម៌ វ័នរ៉ូដ។

ឆ្លៀតក្នុងឱកាសនោះដែរ លោករដ្ឋមន្ដ្រី នេត្រ ភក្ត្រា បានសម្តែងនូវអំណរគុណយ៉ាងជ្រាលជ្រៅដល់ក្រុមហ៊ុន Great Wall Motor (GWM) និងអង្គការមូលនិធិសប្បុរសធម៌ វ័នរ៉ូដ ដែលបានផ្តល់សម្ភារសិស្សដល់ក្រសួងព័ត៌មាន ដើម្បីចែកជូនដល់កុមារា កុមារីសិស្សានុសិស្ស៕