(ស្វាយរៀង)៖ ព្រះតេជគុណ នី សុវណ្ណមុនីរ៉េត និងពុទ្ធបរិស័ទជាច្រើនទៀត បានធ្វើដំណើររួមគ្នា នាំយកទេយ្យទាន និងបច្ច័យមួយចំនួន ទៅប្រគេនព្រះសង្ឃក្នុងឱកាសបុណ្យភ្ជុំបិណ្ឌ និងកាន់បិណ្ឌ ចំនួន១២វត្តក្នុងថ្ងៃតែមួយ ដើម្បីចូលរួមធ្វើមហាកុសលដ៏ធំស្របតាម ប្រពៃណីព្រះពុទ្ធសាសនា។ ចាត់ទុកថា ជាឱកាសពិសេសរហូតអាចថា ជាយុទ្ធនាការបិណ្ឌកម្របានជួប ព្រោះតែ១ថ្ងៃ បានចូលដាក់បិណ្ឌដល់ទៅ១២វត្ត ធ្វើឲ្យម្ចាស់ទាន មានទឹកចិត្តជ្រះថ្លា ជាពន់ពេក ។
ក្នុងពិធីនោះ អ្វីដែលបានបង្ហាញពីសភាពពិសេសប្លែក គឺក្នុងរយៈពេលតែមួយថ្ងៃ កម្មវិធីបានរៀបចំសម្រេចគោលដៅដាក់បិណ្ឌតាមវត្ត នៅតាមភូមិ-ឃុំនានា រហូតបានដល់ចំនួន១២វត្ត សមតាមគោលដៅមិនឲ្យបងប្អូនពុទ្ធបរិស័ទ មានភាពខ្វះខាត និងចន្លោះចង្ហាន់ឡើយ ។
លើសពីនេះ យើងសង្កេតឃើញថា ទាំង១២វត្តនាខេត្តស្វាយរៀង មានវត្តខ្លះទ្រុឌទ្រោម តាមផ្នែកខ្លះ និងខ្លះខ្វះអណ្តូងទឹក ក៏ត្រូវបានម្ចាស់ទានជួយឧបត្ថម្ភ តាមសទ្ធាជ្រះថ្លា ចេញពីចិត្តជួយកសាងធ្វើឲ្យព្រះសង្ឃ មានចិត្តត្រេកអរផងដែរ ក្រោយម្ចាស់ជំនួយបើកចិត្តទូលាយ ។
ព្រះតេជគុណ នី សុវណ្ណមុនីរ៉េត គង់នៅកុដិលេខ២៤ នៃវត្តនាគវ័ន្តរាជធានីភ្នំពេញ ដែលបានរៀបចំកម្មវិធីបិណ្ឌទី៦ នាខេត្តស្វាយរៀង បានមានសង្ឃដីកាថា ថ្ងៃនេះព្រះអង្គ និងលោកស្រី សៀង ចាន់ ហេង បានរៀបចំបណ្តាចង្ហាន់ជាច្រើន និងទេយ្យវត្ថុមានជាគ្រឿង ឧបភោគបរិភោគមួយចំនួន យកមកវេប្រគេនជូនព្រះសង្ឃយាយជីតាជី គង់តាមបណ្តាវត្តជាច្រើន នាខេត្តស្វាយរៀង ។
តាមទិសដៅក្រុមការងារ បានដាក់ចិត្តដាក់កាយធ្វើយ៉ាងណា ខិតខំសម្រេចគោលដៅដាក់បិណ្ឌឲ្យបាន១២វត្ត នៅតំបន់នេះ យោងលើផ្លូវឆ្ងាយ និងមានចំនួនពុទ្ធបរិស័ទ ទៅមិនបានច្រើនគ្នា ។ ម៉្លោះហើយ គួបផ្សំនៅខេត្តស្វាយរៀងនេះ ជាទឹកដីកំណើតរបស់ព្រះអង្គផង ទើបរៀបចំក្នុងឱកាសថ្ងៃកាន់បិណ្ឌ នារដូវភ្ជុំបិណ្ឌនេះតែម្តង។
ព្រះគ្រូដែលតែងតែរំលេច ការចែកទានមិនប្រកាន់ជនទីទ័លក្រ បានបន្តទៀតថា ជាលទ្ធផល គឺយើងទទួលបានជោគជ័យ ជាស្ថាពរតាមគោលដៅ ហើយញាតិញោម ក៏ពេញចិត្តទាំងអស់គ្នា គ្រាអំណោយជាច្រើនបាន ទៅដល់ដៃប្រជាជន និងព្រះសង្ឃទោះផ្លូវលំបាកពីភូមិមួយ ទៅភូមិមួយ ។ អ្វីកាន់តែពិសេស គឺអាកាសធាតុ គឺអំណោយផលណាស់ ដូចបុណ្យជួយវិញ គឺមិនមានភ្លៀងរហូតទាល់ តែអស់កម្មវិធី ទើបព្រះភិរុណបង្អុរមកយ៉ាង ជោគជាំតែម្តង។
គួរបញ្ជាក់ថា វត្តទាំង១២ ក្នុងខេត្តស្វាយរៀង ដែលពុទ្ធបិស័ទទាំងអស់រួមគ្នា ចូលរួមមានវត្តស្វាយជ្រំ, វត្តស្វាយព្រហូត , វត្តចារ, វត្តស្វាយផ្អែម, វត្តស្វាតសណ្តោត, វត្តសូរ, វត្តបល្ល័ងជា, វត្តប្រាសាទ (ក្តីស្លា), វត្តព្រៃបន្ទាយ, វត្តអង្គរស, វត្តឈូកមាស និងវត្តស្វាយយាជាដើម៕
