(ភ្នំពេញ)៖ ស្របពេលដែល​បានប្រកាសឱ្យអនុវត្តន៍យន្តការសម្រួលការចាយប្រាក់ដុល្លារចាស់ ទក់ ប្រឡាក់ និងរហែកតិចតួចនៅទូទាំងប្រទេសនៅល្ងាចថ្ងៃទី២ ខែសីហា ឆ្នាំ២០២៤, សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានថ្លែងលើកទឹកចិត្តប្រជាពលរដ្ឋ, អ្នកធ្វើធុរកិច្ច និងលោកអ្នកឧកញ៉ា អ្នកឧកញ៉ា ឧកញ៉ា ដែលជាម្ចាស់ក្រុមហ៊ុន ជួយជំរុញការប្រើប្រាស់ប្រាក់រៀលរបស់ជាតិ ឱ្យបានច្រើន។

បើតាមការបញ្ជាក់របស់សម្តេចធិបតី ការចាយវាយ ឬប្រើប្រាស់ប្រាក់រៀលរបស់ជាតិ គឺមិនបារម្ភលើការខាតបង់ដោយគេកាត់ទឹកនោះឡើយ ហើយថែមទាំងជួយលើកកម្ពស់អត្តសញ្ញាណជាតិ។

ការថ្លែងរបស់សម្តេចធិបតី ធ្វើឡើងក្នុងឱកាសអញ្ជើញជាអធិបតី ក្នុងពិធី​សំណេះ​សំណាល និងពិសាភោជនាហារ រៀបចំឡើងដោយសមាគមឧកញ៉ាកម្ពុជា និងសមាគមអ្នកអភិវឌ្ឍន៍លំនៅ​ឋាន​​កម្ពុជា នៅល្ងាចថ្ងៃទី២ ខែសីហា ឆ្នាំ២០២៤នេះ។

សម្តេចបានថ្លែងដូច្នេះថា «ខ្ញុំសូមលើកទឹកចិត្ត ឱ្យមានការប្រើប្រាស់លុយរៀល ឱ្យបានច្រើ​ន ព្រោះយើងចាយលុយរៀលអត់មានបញ្ហាទេ មួយទៀតក៏ជាអត្តសញ្ញាណរបស់យើងដែរ។ អីចឹងខ្ញុំលើកទឹកចិត្ត ហើយថ្ងៃនេះនៅទីនោះសុទ្ធតែឧកញ៉ា អ្នកដែលមានធុរកិច្ច សូមជួនលើកទឹកចិត្តប្រាក់រៀលឱ្យបានច្រើន»។

សម្តេចនាយករដ្ឋមន្ត្រីបានបន្ថែមទៀតថា យន្តការនៃការប្រើប្រាស់ប្រព័ន្ធទូទាត់ឌីជីថល (QR Code) ក៏កំពុងរួមចំណែកបានយ៉ាងច្រើន ក្នុងការជំរុញការប្រើប្រាស់ប្រាក់រៀលជាតិ ហើយការទូទាត់តាមប្រព័ន្ធ QR Code ក៏នឹងផ្តល់ភាពងាយស្រួលដល់ភ្ញៀវទេសចរផងដែរ៕

<div cla