(ភ្នំពេញ)៖ លោក សាយ​ សំអាល់​ រដ្ឋមន្ត្រី​ក្រសួង​បរិស្ថាន​ នៅថ្ងៃទី២២ ខែកញ្ញា ឆ្នាំ២០១៦នេះ បាន​អនុញ្ញាត​ឱ្យ​លោក Yuji Kumamaru ឯកអគ្គ​រាជ​ទូត​នៃប្រទេស​ជប៉ុន​ ចូលជួបពិភាក្សា និងជម្រាប​លាក្នុង​ខណៈដែលលោកនឹងត្រូវ​បញ្ចប់​បេសកកម្មការទូត​នៅ​កម្ពុជា។

ក្នុងជំនួបនេះផងដែរ លោករដ្ឋមន្រ្តី​បាន​ថ្លែង​អំណរគុណ​ចំពោះ​រដ្ឋាភិបាល​ និង​ប្រជាជន​ជប៉ុន​ តាម​រយៈ​លោក​ឯកអគ្គរាជទូត​ ដែល​បាន​ផ្តល់​កិច្ច​សហការ​យ៉ាង​ជិត​ស្និទ្ធ​ និង​រួម​ចំណែក​យ៉ាង​សំខាន់​ដល់​ដំណើរការ​ស្តារ​​កសាង​ ​និង​អភិវឌ្ឍ​សង្គម​ជាតិ​កម្ពុជាជារួម​។

​ដោយ​ឡែក​ ក្នុង​ក្របខ័ណ្ឌ​ការងារ​គ្រប់​គ្រង​បរិស្ថាន ​និង​ធនធាន​ធម្មជាតិ​ លោក​រដ្ឋមន្ត្រី​បាន​ជម្រាប​ជូន​ភ្ញៀវ​អំពី​ភាព​ចាំ​បាច់ ​ក្នុង​ការ​ធ្វើ​ទំនើបកម្ម​ស្ថាប័ន​ ​និង​ការ​កែ​ទម្រង់​ស៊ីជម្រៅ​ ដើម្បី​វឌ្ឍនភាព​សង្គម។

ជាមួយគ្នានេះ លោកឯកអគ្គ​រាជ​ទូត​ ក៏បាន​សម្ដែង​នូវការ​កោត​សរសើរ​ និង​សមានចិត្តគាំទ្រ​ចំពោះ​ការ​ដឹកនាំ​របស់​រាជ​រដ្ឋាភិបាល​កម្ពុជា​ ដែល​​ធានា​រក្សា​បាន​នូវ​សុខសន្តិភាព​ ស្ថិរភាព​នយោបាយ​ និង​ការ​អភិវឌ្ឍ​លើ​គ្រប់​វិស័យ​។ ភាគី​ទាំងពីរ​បាន​សម្ដែង​នូវ​បំណង​​ពង្រឹង ​និង​ពង្រីក​កិច្ច​សហប្រតិបត្តិការ​រវាង​ប្រជាជន​ និង​រដ្ឋាភិបាល​នៃ​ប្រទេស​ទាំង​ពីរ​លើ​គ្រប់​វិស័យ​៕