(ភ្នំពេញ)៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានលើកឡើងថា អ្នកវិភាគខ្លះមិនបានទៅដល់ទីតាំងពិតប្រាកដនៃព្រំដែនមុមបីរវាងប្រទេសកម្ពុជា-ឡាវ-វៀតណាមទេ ប៉ុន្តែតែងតែបំផុសបំផុលរឿងព្រំដែនថា រដ្ឋាភិបាលកាត់ដីឱ្យទៅប្រទេសជិតខាង ដោយគ្មានមូលដ្ឋាននៃការសិក្សាស្រាវជ្រាវទាល់តែសោះ។
ថ្លែងក្នុងវេទិកាតុមូលជជែកពិភាក្សា ស្ដីពី «តំបន់ត្រីកោណអភិវឌ្ឍន៍ កម្ពុជា ឡាវ វៀតណាម» នៅព្រឹកថ្ងៃទី០២ ខែសីហា ឆ្នាំ២០២៤នេះ លោកបណ្ឌិត សុខ ទូច បានលើកឡើងថា៖ «ការធ្វើដំណើរទៅកាន់ព្រំដែនកន្ទុយនាគរវាងប្រទេសទាំងបី គឺយកជីវិតធ្វើដើមទុន ហើយអ្នកខ្លះមិនបានទៅដល់ទេ បង្កើតរឿងបំផុសនយោបាយដើម្បីអង្រួនអំណាច ខ្មែរបាត់បង់ទឹកដីតែខ្មែរមិនដឹងប្រវត្តិសាស្រ្តដោយសារអី? ដោយសារខ្មែរឈ្លោះផ្ទៃក្នុង ហើយសត្រូវចាប់ផ្ដើមគាប់ចូលក្នុងប្រព័ន្ធឈាមខ្មែរ ហើយពេលហ្នឹងទើបដឹងថាខ្មែរយ៉ាងដូចម្ដេច...ខ្ញុំដើរឡើងទៅទីនោះ ដោយសារខ្ញុំមិនចង់ឱ្យជាន់ប្រវត្តិសាស្រ្តដូចកោះត្រាល់...»។
លើសពីនេះ លោកបណ្ឌិត សុខ ទូច បានបញ្ជាក់ថា ព្រំដែនកម្ពុជា វៀតណាម មានប្រវែង១,២៧០គីឡូម៉ែត្រ និងមាន០៩ខេត្ត ហើយអ្នកវិភាគរឿងសង្គមជាតិត្រូវតែនិយាយការពិត ទៅឱ្យដល់ទីតាំងពិតប្រាកដ បង្ហាញភាពឆ្ងល់ដល់ប្រជាជនហើយវែកញែកឱ្យបាត់ចម្ងល់ ព្រោះគ្មានអ្វីដែលត្រូវលាក់បាំងខ្មែរដូចគ្នានោះទេ ហើយក៏មិនឱ្យជាន់ប្រវត្តិសាស្រ្តបុរាណដាច់ខាត។
ទន្ទឹមនឹងនេះ លោកបានបញ្ជាក់ថា រាជបណ្ឌិត្យសភាកម្ពុជា បានរៀបចំចងក្រងនិយាមការច្បាស់លាស់អំពីខេត្តនៅតំបន់ត្រីកោណទាំងនោះ។ លោកបន្តថា បើសិនជាសម្តេចតេជោមានគំនិតចង់កាត់ទឹកដីបែបនោះមែន សម្តេចតេជោនឹងមិនផ្ដល់ឱកាសដល់រាជបណ្ឌិត្យសភាចងក្រងឯកសារទាំងនេះទេ៕
សូមស្ដាប់ការលើកឡើងរបស់លោកបណ្ឌិតសភាចារ្យ សុខ ទូច៖
