(ភ្នំពេញ)៖ សម្តេច​តេជោ ហ៊ុន សែន ប្រធានព្រឹទ្ធសភា​កម្ពុជា​ បានបង្ហាញការ​គាំទ្រចំពោះការអនុវត្តកម្មវិធីចលនាភូមិថ្មី (Saemaul Undong) ដែលជាចលនាអភិវឌ្ឍន៍ជនបទដ៏ល្បីល្បាញរបស់អតីតប្រធានាធិបតី Park Chung Hee ដើម្បីជំរុញការអភិវឌ្ឍន៍វិស័យកសិកម្មនៅកម្ពុជា​ ខណៈគម្រោងនេះបាន និងកំពុងអនុវត្តនៅខេត្តកំពង់ស្ពឺ។

ការគាំទ្រចំពោះការអនុវត្តកម្មវិធីចលនាភូមិថ្មី​នេះ ធ្វើឡើងក្នុងឱកាសដែលសម្ដេចតេជោ ហ៊ុន សែន ​ជួបពិភាក្សាការងារជាមួយលោក លី ឈូលវ៉ូ (LEE CHEOL-WOO) អភិបាលខេត្តឃ្យុងសាងបុកដូនៃសាធារណរដ្ឋកូរ៉េ នាថ្ងៃទី២៩ ខែកក្កដា ឆ្នាំ២០២៤នេះ។ ​

ជំនួបនោះ​លោក ​លី ឈូលវ៉ូ បានលើកឡើងពីជោគជ័យរបស់ប្រទេសកូរ៉េ ក្នុងការអភិវឌ្ឍន៍វិស័យ​កសិកម្ម និងជនបទ តាមរយៈការអនុវត្តកម្មវិធីចលនាភូមិថ្មី (Saemaul Undong) ដែលជាចលនាអភិវឌ្ឍន៍ជនបទដ៏ល្បីល្បាញរបស់អតីតប្រធានាធិបតី Park Chung Hee ដែលធ្វើឱ្យ GDP របស់ប្រជាជនកូរ៉េ កាន់តែប្រសើរមកដល់បច្ចុប្បន្ននេះ។

អភិបាលខេត្តឃ្យុងសាងបុកដូ មានប្រសាសន៍​​បញ្ជាក់ជូន សម្តេចតេជោថា ក្នុងឆ្នាំ១៩៦១ GDP របស់ប្រជាជនកូរ៉េម្នាក់ត្រឹម ៦០ដុល្លារតែប៉ុណ្ណោះ ប៉ុន្តែក្រោយពីការធ្វើបរិវត្តកម្មវិស័យកសិកម្ម ឧស្សាហូបនីយកម្ម និងកំណែទម្រង់វិស័យអប់រំ ដោយប្រើយុទ្ធសាស្រ្ត Saemaul Undong ក្រោមការដឹកនាំរបស់ប្រធានាធិបតី Park Chung Hee ធ្វើឱ្យប្រទេសកូរ៉េមានការអភិវឌ្ឍជឿនលឿនយ៉ាងឆាប់រហ័ស។

ក្នុងស្មារតីនេះ លោកជឿជាក់ថា ការបន្តបើកសាកលវិទ្យាល័យ ដើម្បីបង្រៀនពីចលនាភូមិថ្មី និងឧស្សាហកម្មកែច្នៃនៅប្រទេសកម្ពុជា ដោយសហប្រតិបត្តិការជាមួយខេត្តឃ្យុងសាងប៊ុកដូ ក៏នឹងជួយជំរុញការអភិវឌ្ឍនៅកម្ពុជាដូចគ្នាទៅនឹងកូរ៉េផងដែរ។​

​ជាមួយគ្នានេះ លោកលើកឡើងផងដែរថា ទោះបីជាប្រទេសកូរ៉េមានការអភិវឌ្ឍដោយពឹងផ្អែកខ្លាំងលើវិស័យកសិ-ឧស្សាហកម្ម ប៉ុន្តែកូរ៉េនៅតែមានកង្វល់ ចំពោះបញ្ហាអសន្តិសុខស្បៀង ដែលត្រូវគិតគូរជំរុញផលិតភាពកសិកម្ម និងការកែច្នៃ។ ក្នុងបញ្ហានេះ ​លោក យល់ឃើញថា ប្រសិនបើកូរ៉េ និងកម្ពុជាជំរុញកិច្ចសហប្រតិបត្តិការផលិតកម្មកសិកម្ម និងកែច្នៃស្បៀង គឺជាកត្តាល្អប្រសើរផ្តល់ផលប្រយោជន៍ឱ្យគ្នាទៅវិញទៅមក។​

សម្តេចតេជោ ហ៊ុន សែន បានបង្ហាញការគាំទ្រយ៉ាងខ្លាំង និងពេញចិត្តចំពោះកិច្ចសហប្រតិបត្តិការអនុវត្តកម្មវិធីចលនាភូមិថ្មី (Saemaul Undong) របស់ប្រទេសកូរ៉េ ដែលកន្លងមកសម្តេចបានចូលរួមសម្ពោធការអនុវត្តគម្រោងនៃកម្មវិធីនេះ នៅខេត្តកំពង់ស្ពឺ ដែលទទួលបន្ទុកដោយក្រុមប្រឹក្សាអភិវឌ្ឍន៍វិស័យកសិកម្ម និងជនបទ។

សម្តេចមានប្រសាសន៍ថា ម្រោងចលនាភូមិថ្មី​របស់កូរ៉េនេះ គឺស័ក្តិសមសម្រាប់ប្រទេសកម្ពុជា ដោយសារនៅពេលសម្តេច ធ្វើទស្សនកិច្ចទៅកាន់ប្រទេសកូរ៉េក្នុងឆ្នាំ១៩៩៦ សម្តេចបានសង្កេតឃើញថា ស្ថានភាពកសិកម្មនៅកូរ៉េ និងកម្ពុជា មានការជីកប្រឡាយ និងបូមទឹកដូចគ្នា។

សម្តេចតេជោបានបង្ហាញ គាំទ្រការធ្វើបរិវត្តវិស័យកសិកម្ម និងឧស្សាហូបនីយកម្ម ដើម្បីធ្វើឱ្យកំណើននៃវិស័យឧស្សាហកម្ម និងសេវាកម្មកើនឡើង ហើយចំណែកវិស័យ​កសិកម្មធ្លាក់ចុះ ដែលជាសូចនាករបង្ហាញពីការរីកចម្រើនទាំងសេដ្ឋកិច្ច និងជីវភាពប្រជាពលរដ្ឋ។​

សម្តេចតេជោបានលើកឡើងថា កម្ពុជា និង កូរ៉េ មានមេរៀនដែលត្រូវរៀនពីគ្នា ដោយសារកូរ៉េធ្លាប់ជួបការលំបាក និងមានស្ថានភាពដូចកម្ពុជា ជាពិសេស នៅសម័យក្រោយសង្គ្រាមកូរ៉េ។

​ខេត្តឃ្យុងសាងប៊ុកដូ គឺជាខេត្តដែលធំជាងគេបង្អស់ នៅក្នុងប្រទេសកូរ៉េ និងមានសក្តានុពលខ្លាំងក្នុងវិស័យឧស្សាហកម្ម កសិកម្ម និងវប្បធម៌។ ​ ក្នុងនាមជាខេត្ត ដែលចងសម្ព័ន្ធមេត្រីភាពជាមួយកម្ពុជា​ លោក ​លី ឈូលវ៉ូ បានត្រៀមលក្ខណៈរួចហើយ​ដើម្បីជំរុញកិច្ចសហប្រតិបត្តការជាមួយកម្ពុជា ទាំងលើវិស័យឧស្សាហកម្ម កសិកម្ម វេជ្ជសាស្រ្ត វប្បធម៌ និងទេសចរណ៍​៕