(ភ្នំពេញ)៖ LINE ជាកម្មវិធី Chat មួយដ៏ពេញនិយមសម្រាប់បណ្ដាប្រទេសអាស៊ី ហើយក៏មានបណ្ដាប្រទេសមួយចំនួននៅ​អឺរ៉ុបក៏ប្រើប្រាស់កម្មវិធីនេះផងដែរ។ នៅក្នុងប្រទេសជប៉ុន LINE បានក្លាយជាកម្មវិធី Chat និងបណ្ដាញសង្គមមួយដែលពេញនិយមបំផុត និងជាប់ចំណាត់ថ្នាក់លេខ១ ជាមួយតួលេខនៃអ្នកប្រើប្រាស់រហូតដល់ ៩៦លាននាក់ ស្មើនឹងជិត ៩២% នៃចំនួនអ្នកប្រើប្រាស់អ៊ីនធើណែតក្នុងស្រុក និងជាង ៧៨% នៃប្រជាជនជប៉ុនសរុប។

តើហេតុអ្វីបានជា LINE ជាប់ចំណាត់ថ្នាក់លេខ១នៅជប៉ុន?
LINE ជាកម្មវិធីផ្ញើសារទំនាក់ទំនងមួយដែលអនុញ្ញាតឱ្យអ្នកប្រើប្រាស់ធ្វើការផ្ញើសារជាអក្សរ រូបភាព សំឡេង វីដេអូ ព្រមទាំង Video Call។ LINE ត្រូវបានបង្កើតឡើង និងដាក់ឱ្យប្រើប្រាស់ជាលើដំបូងនៅក្នុងប្រទេសជប៉ុនកាលពីឆ្នាំ ២០១១ ហើយបច្ចុប្បន្ន វាស្ថិតក្រោមការគ្រប់គ្រងដោយក្រុមហ៊ុនជប៉ុនមួយដែលមានឈ្មោះថា​Naver ដែលជាបុត្រសម្ព័ន្ធរបស់ក្រុមហ៊ុនសម្ព័ន្ធអ៊ីនធើណែតយក្ស Naver Corporation។

ភាពជោគជ័យរបស់ LINE នៅក្នុងប្រទេសជប៉ុនគឺដោយសារកត្តាជាច្រើន ជាពិសេសគឺ​សេវាកម្ម​​ជាច្រើនដែលត្រូវបានរួមបញ្ចូលគ្នា។ វាមិនដូច WhatsApp ​ដែល​បច្ចុប្បន្នជា Meta ដែលជាក្រុមហ៊ុនយក្សរបស់លោកខាងលិចឡើយ, LINE ត្រូវបានប្រជាជនជប៉ុន​ដាក់​
ឈ្មោះឱ្យវាថាជា «Super App» ព្រោះវាមានអ្វីៗស្ទើតែគ្រប់យ៉ាងដែលជាតម្រូវការសម្រាប់​ការប្រើប្រាស់នៅលើអ៊ីនធើណែត សូម្បីតែការផ្សព្វផ្សាយពាណិជ្ជកម្មផលិតផលក៏មានផងដែរ។

LINE វាមិនមែនពេញនិយមតែនៅក្នុងប្រទេសជប៉ុនមួយប៉ុណ្ណោះទេ បើយោងតាមរបាយការណ៍ពី​ Data Reports បានឱ្យដឹងថា គិតត្រឹមឆ្នាំ២០២១ LINE ត្រូវបានគេប្រើប្រាស់ច្រើនបំផុត​នៅក្នុងនៅជប៉ុន តៃវ៉ាន់ ថៃ និងឥណ្ឌូនេស៊ី ដោយមានអ្នកប្រើប្រចាំថ្ងៃបូកបញ្ចូលគ្នាប្រមាណ ១៧៨លាននាក់ និងនៅជុំវិញពិភពលោកប្រមាណជា ២២៤លាននាក់។ ក្រោយពីឆ្នាំ២០២១ គឺក្រុមហ៊ុន Never មិនបានបង្ហាញពីតួលេខនៃអ្នកប្រើប្រាស់ LINE ទៀតឡើយ ខណៈដែលរបាយការណ៍ចុងក្រោយ​បានបង្ហាញថា មានអ្នកចុះឈ្មោះប្រើប្រាស់ LINE រហូតដល់ ៧០០លាននាក់។

តើហេតុអ្វីបានជាក្រុមហ៊ុន Never បង្កើតកម្មវិធីទំនាក់ទំនង LINE ឡើង?
បច្ចុប្បន្នយើងឃើញថា LINE បានក្លាយជាកម្មវិធីទំនាក់ទំនងមួយដ៏ពេញនិយម និង​មានប្រជាប្រិយភាព ប៉ុន្តែលោកអ្នកមានដឹងទេថា តើកម្មវិធីមួយនេះ វាបានចាប់ផ្ដើមកំណើតឡើង​នៅពេលណា និងដោយសារអ្វី? តាមពិតទៅ ក្រុមហ៊ុនយក្ស Never បានបង្កើត LINE ដំបូងឡើយ​ដើម្បីធ្វើការទំនាក់ទំនងសម្រាប់បុគ្គលិកដែលបម្រើការងារនៅក្នុងប្រទេសជប៉ុន​ក្នុងអំឡុងពេលមានគ្រោះមហន្តរាយរញ្ជួយដី និងរលកយក្សស៊ូណាមិ Tohoku ឆ្នាំ ២០១១។ អំឡុងពេលនោះហេដ្ឋារចនាសម្ព័ន្ធជាច្រើនត្រូវបានកាត់ផ្ដាច់ ហើយដោយមើលឃើញថា LINE ជាកម្មវិធីមួយដែលប្រើប្រាស់ត្រឹមតែអ៊ីនធើណែតក្នុងការទំនាក់ទំនងនោះ Never ក៏ដាក់ឱ្យប្រើប្រាស់ LINE ជាសាធារណៈ ហើយជាលទ្ធផល ក្នុងរយៈពេល ១៨ខែ មានអ្នកប្រើច្រើនជាង ១០០លាននាក់។

មិនមានរបាយការណ៍បង្ហាញពីប្រាក់ចំណូលច្បាស់លាស់សម្រាប់កម្មវិធីមួយនេះឡើយ ប៉ុន្តែកាលពីឆ្នាំ២០២១ LINE រកចំណូលបានប្រមាណជា ២,៣៦ពាន់លានដុល្លារអាមេរិក ដោយក្នុងនោះ ប្រាក់ចំណូលស្ទើតែទាំងអស់បានមកពីការផ្សាយពាណិជ្ជកម្ម។ ចំណែកនៅក្នុងប្រទេសជប៉ុន នៅក្នុងខែធ្នូ ឆ្នាំ២០២៣ LINE រកចំណូលប្រចាំខែបានប្រមាណ ១៤,៧លានដុល្លារអាមេរិក៕