(វៀងច័ន្ទ)៖ សារព័ត៌មានរដ្ឋឡាវ Vientiane Times បានរាយការណ៍ថា រដ្ឋាភិបាលប្រទេសឡាវ នឹងបន្តសហការជាមួយបណ្តាប្រទេសអាស៊ាន ដើម្បីត្រួតពិនិត្យតាមដានស្ថាន​ការណ៍​ក្នុងតំបន់ក៏ដូចជា ទូទាំងសកលលោកជុំវិញការឆ្លងវីរុស Zika។ នេះបើតាមការផ្សាយដោយសារព័ត៌មាន Channel News Asia នាល្ងាចថ្ងៃពុធ ទី២១ ខែកញ្ញា ឆ្នាំ២០១៦។

រដ្ឋមន្រ្តីក្រសួងសុខាភិបាលឡាវលោក Bounkong Syhavong បានថ្លែងក្នុងសន្និសីទសារព័ត៌មានមួយថា លោកបានពិភាក្សាបញ្ហាវីរុស Zika នៅក្នុងអំឡុងពេលកិច្ចប្រជុំតាមវីដេអូ ជាមួយនឹង​រដ្ឋមន្រ្តី ក្រសួងសុខាភិបាលរបស់បណ្តាប្រទេសអាស៊ាន លើបញ្ហាគំរាមកំហែងដែលបង្កដោយការឆ្លងវីរុស Zika នៅក្នុងតំបន់។ លោក Bounkong បាននិយាយក្នុងនាមជារដ្ឋាភិបាលឡាវថា លោកបានប្តេជ្ញា នឹងធ្វើកិច្ចសហប្រតិបត្តិការយ៉ាងជិតស្និត ជាមួយបណ្តាប្រទេសដែលជាសមាជិកអាស៊ាន ក្នុងការទប់ស្កាត់វីរុសនេះ។

គួរបញ្ជាក់ថា ករណីឆ្លងនៃវីរុស Zika ចំនួន១៨ករណី ត្រូវបានរកឃើញនៅចន្លោះឆ្នាំ២០១៣ ដល់២០១៥ ប៉ុន្តែចាប់ពីដើមឆ្នាំ២០១៦ រហូតមកដល់ពេលនេះ គ្មានករណីឆ្លងនៃវីរុស Zika ណាមួយត្រូវ​គេបានរាយការណ៍ថាបានកើត​មានឡើងបន្ថែមទៀតនៅ​ប្រទេសឡាវ​នោះឡើយ។ សម្រាប់ប្រទេសអាស៊ាន ដែលវីរុស Zika កំពុងវាយលុកខ្លាំងជាងគេនោះ គឺ សិង្ហបុរី និងថៃ៕