(កំពង់ធំ)៖ កូនឈើចម្រុះប្រមាណ ៤,០០០ដើម ត្រូវបាននាំយកមកដាំនៅក្រោមប្រធានបទ «ពន្លកបៃតង» ក្នុងបរិវេណវត្តពាមមេត្រី ភូមិពោធិ៍ ឃុំត្បែង ស្រុកកំពង់ស្វាយ ខេត្តកំពង់ធំ នៅថ្ងៃទី១៦ ខែកក្កដា ឆ្នាំ២០២៤នេះ។

ពិធីនេះបានធ្វើឡើងក្រោមអធិបតីភាពលោក ខ្វៃ អាទិត្យា អនុរដ្ឋលេខាធិការនិងជាអ្នកនាំពាក្យក្រសួងបរិស្ថាន តំណាងលោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន, ព្រះភិក្ខុរជិរប្បញ្ញោ គូ សុភាព, លោក ជា វ៉ាន់ចាន់ អភិបាលរង ខេត្តកំពង់ធំ , លោក មួងសូនី ប្រធានក្រុមការងារសមាគម ១០០ រាត្រី, ថ្នាក់ដឹកនាំ និងមន្ត្រីរាជការនៃក្រសួងបរិស្ថាន តំណាងក្រសួង-ស្ថាប័នពាក់ព័ន្ធ អាជ្ញាធរមូលដ្ឋាន តំណាងដៃគូ អង្គការសង្គមស៊ីវិល គ្រឹះស្ថានសិក្សា វិស័យឯកជន ភ្ញៀវជាតិ-អន្តរជាតិ ប្រជាសហគមន៍ ប្អូនៗយុវជន និងសិស្សានុសិស្សជាច្រើនរយនាក់។

នាឱកាសនោះដែរ លោក ខ្វៃ អាទិត្យា បានថ្លែងថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ហើយតាមរយៈយុទ្ធសាស្ត្រនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើការណែនាំ និងចង្អុលបង្ហាញដល់ក្រសួង បរិស្ថានឱ្យរៀបចំឡើងនូវយុទ្ធសាស្ត្រចក្រា ដែលមានសរសរស្ដម្ភបី នោះគឺ ភាពស្អាត ភាពបៃតង និងចីរភាព។ សរសរស្ដម្ភទីមួយ ភាពស្អាត គឺសំដៅធ្វើយ៉ាងណាឱ្យផ្ទះយើង សង្គមយើង ប្រទេសយើងមានភាពស្អាត ដើម្បីសុខមាលភាពប្រជាពលរដ្ឋផង ដើម្បីបង្កបរិយាកាសស្រស់ស្រាយស្អាត មាន សណ្តាប់ធ្នាប់ល្អទាក់ទាញភ្ញៀវទេសចរនិងវិនិយោគិនមកកម្ពុជាផងដែរ។

«កាលបើផ្ទះយើង ឬប្រទេសយើងមិនមានភាពស្អាត ពោរពេញដោយសំរាមពាសវាលពាសកាល ច្បាស់ណាស់ថា ប្រជាពលរដ្ឋយើងមិនមានសុខុមាលភាព ហើយក៏មិនមានភ្ញៀវណាម្នាក់ចង់មកលេងផ្ទះយើង ឬប្រទេសយើងនោះដែរ»។ នេះជាការលើកឡើងបន្ថែមរបស់លោក ខ្វៃ អាទិត្យា។

 លោក ខ្វៃ អាទិត្យា បានលើកឡើងថា ក្រសួងបរិស្ថាន បានជំរុញការដាំដើមឈើឱ្យច្រើន ដើម្បីរក្សានូវកំណើន ជាពិសេសការជំរុញ ការដាំស្តារព្រៃឈើ ដែលជាទិសដៅអាទិភាព បង្កើនគម្របព្រៃឈើឱ្យបាន៦០% នៅឆ្នាំ២០៥០ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា និងលើកកម្ពស់ជីវភាពប្រជាពលរដ្ឋ នៅតាមសហគមន៍ រួមទាំងការអភិរក្សជីវចម្រុះដោយចីរភាព។ តាមរយៈនេះ ក្រសួងបរិស្ថានបានដាក់ចេញយុទ្ធនាការថ្ងៃទី១០ តុលា ឆ្នាំ២០២៣ រហូតមកធ្វើការផ្តល់ និងដាំដើមឈើយ៉ាងតិច ១លានដើមក្នុងមួយឆ្នាំ ចាប់ពីឆ្នាំ២០២៤។

ព្រឹត្តិការណ៍ «ពន្លកបៃតង» នឹងប្រារព្ធធ្វើ នាថ្ងៃទី១០-១៦ ខែកក្កដា ឆ្នាំ២០២៤ ដើម្បីផ្សព្វផ្សាយ និងចែកកូនឈើជូនសាធារណជនយកទៅដាំ នៅតាមគេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានា ដោយឥតគិតថ្លៃ និងដើម្បីផ្សព្វផ្សាយលើកកម្ពស់ការយល់ដឹង ស្ដីពីការដាំឈើឱ្យបានច្រើន ដើម្បីបង្កើនគម្របបៃតងនៅកម្ពុជា និងជំរុញការចូលរួមអភិរក្សជីវៈចម្រុះពីគ្រប់ភាគីពាក់ព័ន្ធស្របនឹងយុទ្ធសាស្ត្រចក្រវិស័យបរិស្ថាន ដែលបានដាក់ចេញជាបន្តបន្ទាប់ និងជាជំហានៗ ផ្តោតលើមុំយុទ្ធសាស្ត្រចំនួន៣ គឺស្អាត បៃតង និងចីរភាព ក្នុងគោលបំណងចម្បង គឺលើកកម្ពស់សេដ្ឋកិច្ចជាតិ និងជីវភាពប្រជាំពលរដ្ឋនៅតាមតំបន់ការពារធម្មជាតិ ឱ្យទទួលបានប្រាក់ចំណូលខ្ពស់ តាមរយៈភ្ញៀវទេសចរ អ្នកវិនិយោគជាតិ អន្តរជាតិ ដែលនិយម និងស្រឡាញ់ធនធានធម្មជាតិ។

សម្រាប់ព្រះភិក្ខុរជិរប្បញ្ញោ គូ សុភាព មានសង្ឃដីកាថា ការដាំកូនឈើឡើងវិញនិងការចូលរួមថែរក្សាបរិស្ថាន មិនជាសិទ្ធិផ្តាច់របស់នរណាម្នាក់នោះទេ។ ព្រមទាំងមានសង្ឃដីកាជម្រាបដល់ប្រជាពុទ្ធបរិសិទ ឱ្យស្រឡាញ់ភាពស្អាតទាំងអស់គ្នា។

លោក ជា វ៉ាន់ចាន់ បានណែសិស្សានុសិស្ស ត្រូវបណ្តុះផ្នត់គំនិតស្អាត រួមគ្នាថែរក្សាអនាម័យបរិស្ថាន នៅជុំវិញខ្លួនយើងឱ្យមានភាពស្រស់ស្អាត រួមគ្នាដាំកូនឈើឡើងវិញ និងកម្ចាត់ផ្នត់គំនិតមិនល្អឱ្យអស់នៅក្នុងខ្លួនជាដើម។

លោក មួង សូនី បានថ្លែងថា ការចូលដាំកូនឈើនៅថ្ងៃនេះនឹងផ្តល់ប្រយោជន៍ដល់អ្នកជំនាន់ក្រោយ។ ខណៈរាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត និងមានក្រសួងបរិស្ថានជាសេនាធិការ បានដាក់ចេញយុទ្ធនាការជាច្រើនលើវិស័យបរិស្ថាន ដោយក្នុងនោះការបណ្តុះផ្នត់គំនិតដល់ប្រជាពលរដ្ឋរួមគ្នាដាំកូនឈើឡើងវិញជាដើម។

លោក គោរម្យ ដាឡា ប្រធានសមាគមនិស្សិតសន្តិភាព ដើម្បីប្រជាធិបតេយ្យ បានលើកឡើងថា ការដាំ និងថែរក្សាព្រៃឈើឱ្យនៅគង់វង្ស ដើម្បីមនុស្សជំនាន់ក្រោយ ហើយត្រូវគិតថា ការចូលលើវិស័យបរិស្ថាន គឺជាកាតព្វកិច្ចទាំងអស់គ្នា។ ដូច្នេះ ការបណ្តុះស្មារតីឱ្យរួមគ្នាដាំកូនឈើឡើងវិញ គឺជាយុទ្ធសាស្ត្រដ៏ល្អសម្រាប់បង្កើនគម្របបៃតងនៅកម្ពុជា៕