(អាមេរិក)៖ កំពូលតារាសម្ដែងស្រីនាង Angelina Jolie​ និងស្វាមី លោក Brad Pitt បានសម្រេចចិត្តផ្ដាច់ចំណងអាពាហ៍ពិពាហ៍​ របស់ពួកគេហើយ ដោយខាង នាង Angelina Jolie ជាអ្នកដាក់ពាក្យបណ្ដឹង សុំលែងលះ។ នេះបើតាមការចុះផ្សាយរបស់ស្ថានីទូរទស្សន៍ CNN នៅមុននេះបន្តិច នាយប់ថ្ងៃអង្គារ៍ ទី២០ ខែកញ្ញា ឆ្នាំ២០១៦។

នៅក្នុងសេចក្ដីថ្លៃងការណ៍មួយ ដែលសារព័ត៌មាន Reuters ទទួលបានមេធាវីរបស់ Angelina Jolie លោក Robert Offer បាននិយាយថា «ការសម្រេចចិត្តនេះ ធ្វើឡើងដើម្បីសុភមង្គលគ្រួសារ ហើយគាត់ក៏មិនធ្វើអត្ថាធិប្បាយអ្វីដែរ ក្រៅតែពីស្នើឱ្យគ្រួសារផ្ដល់ជីវិតឯកជននៅពេលនេះ»។​ ដោយឡែកបើយោងតាម TMZ reports នៅក្នុងពាក្យបណ្ដឹងសុំលែងលះនាង Angelina Jolie ក៏បានរៀបរាប់ផងដែរ ពីការរស់នៅមិនចុះសម្រុងគ្នា ជាមួយនឹងស្វាមី ព្រមទំាងមិនបានស្នើថែរក្សាកូន៦នាក់ ជារូបវ័ន្តបុគ្គលនោះទេ ក៏ប៉ុន្តែត្រូវមើលថែរួមគ្នាដោយស្របច្បាប់។ មិនតែប៉ុណ្ណោះនាង ក៏មិនបានទាមទារអាហាររូបត្ថម្ភដែរ ហើយបានបញ្ជាក់ថា កាលបរិច្ឆេទនៃការចែកផ្លូវគ្នាគឺនៅថ្ងៃទី១៥ ខែកញ្ញា ឆ្នាំ២០១៦។

សូមជំរាបថា នាង Angelina Jolie​ និងស្វាមី លោក Brad Pitt បានរៀបការនឹងគ្នា​ បន្ទាប់ពីចំណាយពេលទាក់​ទងគ្នាយ៉ាងយូរ នៅក្នុងខែសីហា ឆ្នាំ២០១៤៕