(សៀមរាប)៖ ព្រះសង្ឃ និងពុទ្ធបរិស័ទ មកពីស្រុកប្រាសាទ ខេត្តសុរិន្ទ ប្រទេសថៃ នាំទៀនព្រះវស្សា និងទ័យវត្ថុរបស់ព្រះសង្ឃ វេរប្រគេនដល់ព្រះសង្ឃគង់នៅវត្តចំនួន១១នៅក្នុងក្រុងសៀមរាប ខេត្តសៀមរាប ទៀនព្រះវស្សា និងទ័យវត្ថុរបស់ព្រះគ្រូ កាន ព្រីឆា (ហៅលោកតាប៉ិក) នារសៀលថ្ងៃទី១៤ ខែកក្កដា ឆ្នាំ២០២៤ ក្នុងឱកាសថ្ងៃបុណ្យចូលព្រះវស្សា។ ពិធីវេរប្រគេននេះដែរ បានធ្វើឡើងនៅវត្តស្វាយរមៀត។
ព្រះសច្ចានុបាល នឿម វុទ្ធី ព្រះរាជាគណកិត្តិយសនិងជា ព្រះគ្រូចៅអធិការវត្តស្វាយរមៀត មានសង្ឃដីកាថា ទំនៀមក្នុងសង្គមខ្មែរព្រះសង្ឃតែងនិមន្ត"ចូលព្រះវស្សា” ឬ "គង់ចាំព្រះវស្សា” រយៈពេលបីខែដោយកំណត់ពីថ្ងៃ១រោច ខែអាសាឍ (រវាងខែកក្កដា) ដល់ថ្ងៃ១៥កើត ខែអស្សុជ (រវាងខែតុលា)។
ព្រះសច្ចានុបាល នឿម វុទ្ធី មានសង្ឃដីកាបន្តថា ទំនៀមទំលាប់នេះ បានជាប់ជាប្រពៃណីប្រតិបត្តិរហូតមក ហើយទាំងព្រះមហាក្សត្រ និងរាស្ត្រសាមញ្ញទូទៅ តែងទំនុកបម្រុងគ្រឿងបរិក្ខាបូជាផ្សេងៗចំពោះព្រះសង្ឃដែលគង់ចាំព្រះវស្សា ដើម្បីបានអានិសង្សដល់ជាតិមុខ។ នៅក្នុងបណ្តាគ្រឿងបូជាទាំងឡាយនោះ គេឃើញមាន "ទៀនវស្សា” ជាវត្ថុសំខាន់ដែលពុំមានជា បញ្ញត្តិក្នុង គម្ពីរពុទ្ធសាសនា តែខ្មែរប្រតិបត្តិជាទំនៀមដល់សព្វថ្ងៃ។
ព្រះសច្ចានុបាល នឿម វុទ្ធី មានសង្ឃដីកាបន្តទៀតថា ការដុតទៀន ឬប្រទីបសម្រាប់ថ្ងៃចូលព្រះវស្សា ដើម្បីជាប្រយោជន៍ដល់ ព្រះភិក្ខុសង្ឃ ដែលចាំបាច់ត្រូវស្វាធ្យាយធម៌ និងធ្វើឧបោសថកម្មនៅវេលាយប់ ក្នុងពេលចូលព្រះវស្សា។ ពន្លឺភ្លើងដែលដុតក្នុងពេលចូលព្រះវស្សានេះ ក៏ស្ថិតក្នុងការពិចារណាដល់ពន្លឺភ្លើងដែលភ្លឹបភ្លែតៗ ទៅដល់រូបខណ្ឌមនុស្សដែលកើតស្លាប់នោះផងដែរ។
ចំពោះទៀនព្រះវស្សាដែលយកមកវេរប្រគេន ដោយក្នុង១វត្តៗប្រគេនទៀតវស្សា២គូរនិង បច្ច័យ១.៥០០បាត។ដោយឡែក សម្រាប់វត្តស្វាយរមៀត ប្រគេនបច្ច័យចំនួន១២.០០០បាត ដើម្បីទ្រទ្រង់ចង្ហាន់ព្រះសង្ឃសមណះសិស្សដែលកំពុងគង់សិក្សានូវសាលាពុទ្ធិកបឋមសិក្សាវត្តស្វាយរមៀតផងដែរ៕
