(ភ្នំពេញ)៖ លោក ណុប រ័ត្ននិមល ជំនួយការសម្តេចធិបតីនាយករដ្ឋមន្ត្រី និងជាអនុប្រធានក្រុមការងាររាជរដ្ឋាភិបាលចុះមូលដ្ឋាន ស្រុកកណ្ដាលស្ទឹង បានថ្លែងអំណរអរគុណផងដែរចំពោះមន្ត្រីរាជការ អាជ្ញាធរដែនដី និងប្រជាពលរដ្ឋ ខេត្តកណ្តាល ក៏ដូចជាប្រជាពលរដ្ឋនៅទូទាំងប្រទេស ដែលបានគាំទ្រដល់គម្រោងព្រែកជីកហ្វូណនតេជោ ដែលគ្រោងនឹងបើកការដ្ឋានសាងសង់នៅថ្ងៃទី០៥ ខែសីហា ឆ្នាំ២០២៤ ខាងមុខនេះ ដែលនឹងផ្តល់ផលប្រយោជន៍យ៉ាងច្រើនដល់សេដ្ឋកិច្ចជាតិ និងប្រជាជនកម្ពុជា នាពេលអនាគត់។

ការថ្លែងអំណរគុណបែបនេះរបស់លោក ណុប រ័ត្ននិមល បានធ្វើឡើងនៅក្នុងឱកាសលោកអញ្ជើញជាតំណាងលោកកិត្តិសង្គហបណ្ឌិត ហ៊ីង ប៊ុនហៀង និងលោកស្រី ប៉ែន ចន្នី អញ្ជើញជួបសំណេះសំណាល និងចែកអំណោយជូនប្រជាពលរដ្ឋ ៥៥៩គ្រួសារ ស្ថិតនៅក្នុងឃុំដើមឬ ស្រុកកណ្កាលស្ទឹង ខេត្តកណ្តាល នាព្រឹកថ្ងៃទី១៥ ខែកក្កដា ឆ្នាំ២០២៤នេះ។

ក្នុងឱកាសនោះ លោក ណុប រ័ត្ននិមល បានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត សម្តេចធិបតីនាយករដ្ឋមន្ត្រី និងលោកជំទាវបណ្ឌិត ព្រមទាំងពីសំណាក់កិត្តិសង្គហបណ្ឌិត ហ៊ីង ប៊ុនហៀង និងលោកស្រី ជូនប្រជាពលរដ្ឋ ស្រុកកណ្ដាលស្ទឹង ខេត្តកណ្កាល។

លោក ណុប រ័ត្ននិមល បានគូសបញ្ជាក់ថា នៅក្រោមការដឹកនាំដ៏ឈ្លាសវៃ និងដ៏ប៉ិនប្រសប់របស់គណបក្សប្រជាជនកម្ពុជា និងរបស់រាជរដ្ឋាភិបាល សម្តេចតេជោ ហ៊ុន សែន ជាប្រមុខនាពេលកន្លងមកនេះ បានខិតខំកសាងស្តារ និងអភិវឌ្ឍន៍ជាតិចេញពីបាតដៃទទេ និងចេញពីគំនរផេះផង់សន្សល់ពីរបបប្រល័យពូជសាសន៍ ប៉ុលពត ហើយធ្វើឱ្យសង្គមជាតិមានរីកចំរើនលើគ្រប់វិស័យ។ ដោយឡែកក្រោមការដឹកនាំរបស់រាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រី អាណត្តិទី៧នេះ បានខិតខំបន្តក្នុងការកសាង អភិវឌ្ឍន៍សេដ្ឋកិច្ច និងការការពារបូរណភាពទឹកដី ពិសេសការពារថែរក្សានូវសុខសន្តិភាព ដើម្បីកំណើនការងារ សេដ្ឋកិច្ច និងការរស់នៅរបស់ប្រជាពលរដ្ឋប្រកបដោយសុខដុមរមនា។ ក្នុងនោះ សម្តេចតេជោ សម្តេចកិត្តិព្រឹទ្ធបណ្ឌិត និងសម្តេចធិបតី ប្រមុខរាជរដ្ឋាភិបាល តែងបានយកចិត្តទុកដាក់យ៉ាងខ្លាំងចំពោះសុខទុក្ខ និងការលំបាកខ្វះខាតរបស់បងប្អូនប្រជាពលរដ្ឋ ហើយបានចាត់ទុកថា ទុក្ខលំបាករបស់ប្រជាពលរដ្ឋ គឺជាទុក្ខលំបាករបស់សម្តេចផងដែរ។

លោកបានបន្តថា ជាការពិតណាស់ អី្វៗដែលកំពុងកើតមាន និងការជួបជុំគ្នា នាថ្ងៃនេះ គឺដោយសារកត្តាសុខសន្តិភាព ប្រសិនបើប្រទេសជាតិរបស់យើងនៅមានសង្គ្រាម យើងក៏មិនអាចមានឪកាសធ្វើការកសាង និងអភិវឌ្ឍន៍ប្រទេសជាតិកម្ពុជាយើងបាននោះទ។

ក្នុងនាមនាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងលោកជំទាវ ប៉ែន ចន្នី, លោក ណុប រ័ត្ននិមល បាននាំយកអំណោយមនុស្សធម៌ដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនប្រជាពលរដ្ឋក្នុងស្រកកណ្កាលស្ទឹងចំនួន ៥៥៨គ្រួសារ ក្នុង១គ្រួសារមាន៖ អង្ករចំនួន ២៥គីឡូក្រាម, មីចំនួន ០២កេសតូច, ត្រីខ ចំនួន ០២យួរ និងថវិកា ៣០,០០០រៀល ព្រមទាំងបានឧបត្ថម្ភសាលាស្រុកថវិកា ២លានរៀល និងកងកម្លាំងមានសមត្ថកិច្ចផងដែរ៕