(កំពង់ស្ពឺ)៖ សម្តេចក្រុមព្រះនរោត្តម ចក្រពង្ស ឧត្តមក្រុមប្រឹក្សាផ្ទាល់ព្រះមហាក្សត្រ និងជាសមាជិកឧត្តមក្រុមប្រឹក្សាធម្មនុញ្ញ ព្រះរាជតំណាងដ៏ខ្ពង់ខ្ពស់បំផុតព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងដាំកូនឈើប្រណិតចំនួន២,០០០ដើម និងផ្កាចំនួន២៥០ដើម នៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ឧទ្យានជាតិព្រះសុរាម្រិតកុសមៈគិរីរម្យ ថ្ងៃទី១៣ ខែកក្កដា ឆ្នាំ២០២៤។
សម្តេចក្រុមព្រះនរោត្តម ចក្រពង្ស បានមានព្រះរាជបន្ទូលថា ការដាំដើមឈើនាថ្ងៃនេះគឺក្នុងន័យអបអរសាទរព្រះរាជពិធីរុក្ខទិវា ៩ កក្កដា ឆ្នាំ២០២៤ ដែលប្រារព្ធធ្វើឡើងនៅខេត្តតាកែវ ក្រោមព្រះរាជវត្តមានដ៏ខ្ពង់ខ្ពស់បំផុតរបស់ព្រះមហាក្សត្រនៃកម្ពុជា។
ជាមួយគ្នានោះ សម្តេចក្រុមព្រះ ក៏បានពាំនាំនូវព្រះរាជបណ្តាំផ្តាំផ្ញើសួរសុខទុក្ខពីព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងព្រះមហាក្សត្រីចំពោះកូនចៅ ចៅទួតរបស់ព្រះអង្គដែលបានអញ្ជើញមកនៅទីនេះដោយក្តីនឹករលឹកពីចម្ងាយ។
សម្តេចក្រុមព្រះ បានមានព្រះរាជបន្ទូលក្រើនរំឭកបន្ថែមថា «យើងនាំគ្នាដាំដើមឈើឡើងវិញទុកជាឧត្តមប្រយោជន៍សម្រាប់ជនរួមជាតិនៃយើងយូរអង្វែង ដែលអាចផ្តល់ជាផ្លែផ្កាដ៏ល្អផូរផង់ ក្នុងន័យផ្សារភ្ជាប់គ្នារវាងពលរដ្ឋ ទៅនឹងបរិស្ថាន ទៅវិស័យពុទ្ធសាសនាដែលជាសាសនាដ៏ឧតុង្គឧត្តមរបស់ប្រជាជាតិយើងទាំងមូល»។
អ្នកឧកញ៉ាមហាសទ្ធាបុញ្ញាតិ រ័ត្ន សិរីសីលាភិរ័តព្រឹទ្ធាចរិយានី អគ្គមហាឧបាសិកាធម្មបណ្ឌិត ញ៉ឹក ប៊ុនថា ប្រធានមជ្ឈមណ្ឌលវប្បធម៌ព្រះពុទ្ធសាសនាកម្ពុជា បានលើកឡើងថា មជ្ឈមណ្ឌលវប្បធម៌ព្រះពុទ្ធសាសនាកម្ពុជា បានប្រារព្ធ «រុក្ខទិវា» ក្នុងន័យកាត់បន្ថយជាតិពុលក្នុងបរិយាកាស កាត់បន្ថយការប្រើប្រាស់ថាមពល និងតម្រូវការម៉ាស៊ីនត្រជាក់ បន្ថយសីតុណ្ហភាព ជួយកាត់បន្ថយការហូរច្រោះ កាត់បន្ថយការបំពុលបរិស្ថានកម្រិតអូហ្សូន និងផ្សែងអ័ព្ទ ធ្វើឱ្យបរិស្ថាន និងសុខភាពសាធារណៈមានភាពប្រសើរឡើង ដែលមិនអាចបង្កគ្រោះថ្នាក់ធ្ងន់ធ្ងរផ្សេងៗជាយថាហេតុ។
អ្នកឧកញ៉ាបន្ថែមថា ចាប់ពីពេលនេះតទៅ ឧទ្យានជាតិព្រះសុរាម្រិត-កុសុមៈ (គិរីរម្យ) មិនត្រឹមតែជារមណីយដ្ឋានទេសចរណ៍ធម្មជាតិ ដែលគួរឱ្យទាក់ទាញប៉ុណ្ណោះទេ ក្នុងនោះក៏មានមជ្ឈមណ្ឌលវប្បធម៌ព្រះពុទ្ធសាសនា កម្ពុជាដ៏ធំមួយទៀតជាបូជនីយដ្ឋានសម្រាប់គោរពបូជា នៅពេលដែលបានសាងសង់រួចរាល់ជាស្ថាពរ ដូចជាមានវត្តអារាមសម្រាប់ព្រះសង្ឃគង់នៅ មានព្រះធម៌វិន័យជាម្លប់ដល់មនុស្សគ្រប់វ័យ ដែលមកបំពេញ បុណ្យកុសល និងបានសិក្សាប្រតិបត្តិ តាមពាក្យទូន្មានព្រះពុទ្ធបរមគ្រូ តាមគម្ពីរព្រះត្រៃបិដកដែលចារទុក ក្នុងមហាប្រាសាទជាភស្តុតាងស្រាប់ កំពុងមានការគាំទ្រគ្រប់មជ្ឈដ្ឋានទាំងអស់។
ដូច្នេះទាំងភ្ញៀវទេសចរណ៍ជាតិ-អន្តរជាតិ មិនត្រឹមតែបានមកទស្សនានូវទេសភាពធម្មជាតិប៉ុណ្ណោះទេ ពួកគេអាចចូលមកប្រតិបត្តិអប់រំចិត្ត ក៏ដូចជាគោរពបូជាមហាប្រាសាទព្រះធម្មចេតិយ ព្រះចូឡាមណីចេតិយ ពុទ្ធស្ថានទាំង ៤កន្លែង រួមទាំងបូជណីយដ្ឋាននានា ដូចជាសមថវិបស្សនាជាដើមផងដែរ។
ជាងនេះទៅទៀតវិស័យទេសចរណ៍នៅកម្ពុជា ដែលជា ទេសចរណ៍វប្បធម៌ និងធម្មជាតិ ត្រូវបានផ្សារភ្ជាប់ជាមួយព្រះពុទ្ធសាសនាដែលប្រជាជនកម្ពុជាគោរពបូជាយូរណាស់មកហើយ រាជរដ្ឋាភិបាលបានចាត់ទុកជាវិស័យអាទិភាព មួយនេះដើរតួជា «មាសបៃតង» រួមចំណែកដល់ការអភិវឌ្ឍសេដ្ឋកិច្ច-សង្គមនិងការពារបរិស្ថាន ព្រមទាំងជារមណីយដ្ឋានទេសចរណ៍វប្បធម៌ មានតំលៃជាប្រវត្តិសាស្ត្រ ទុកជាមរតកដល់កូនចៅជំនាន់ក្រោយ៕
