(ភ្នំពេញ)៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា កម្ពុជានៅតែរក្សាបានកំណើនសេដ្ឋកិច្ចជាមធ្យម ជាង៧ភាគរយក្នុងមួយឆ្នាំ ហើយផលិតផលក្នុងស្រុក​សម្រាប់មនុស្ស​ម្នាក់ (GDP) អាចនឹងកើនឡើងដល់ ជាង១,៣០០ដុល្លារ នៅឆ្នាំ២០១៦នេះ។

ការបញ្ជាក់បែបនេះ ធ្វើឡើងតាមរយៈសារលិខិតចូលរួមក្នុងឱកាសទិវាសន្តិភាពអន្តរជាតិ សម្រាប់ថ្ងៃទី២១ ខែកញ្ញា ស្អែកនេះក្នុងនោះ សម្ដេចតេជោ នាយករដ្ឋមន្រ្តីបានឱ្យដឹងថា រយៈពេលជាង២​ទស្សវត្សមកនេះ កម្ពុជាសម្រេចបានជោគជ័យ ក្នុងការរក្សាស្ថិរភាពម៉ាក្រូសេដ្ឋកិច្ច និងរក្សាកំណើនសេដ្ឋកិច្ចជាមធ្យម ៧ភាគរយ ក្នុងមួយឆ្នាំ។

ប្រមុខរាជរដ្ឋាភិបាលបានបន្តថា ផលិតផលក្នុងស្រុកសរុបសម្រាប់មនុស្សម្នាក់ៗ (GDP) បានកើនឡើងពី ៧៦០ដុល្លារ ក្នុងមួយឆ្នាំ នៅឆ្នាំ២០០៨ រហូតដល់ ១,១៥៨ដុល្លារ នៅឆ្នាំ២០១៥ ហើយអាចបន្តកើន​ឡើងដល់ ជាង១,៣០០ដុល្លារ នៅឆ្នាំ២០១៦ ដែលធ្វើឱ្យកម្ពុជាបានប្រែខ្លួនពីប្រទេសមានចំណូលទាប មកជាប្រទេសមានចំណូលមធ្យមកម្រិតទាប។

សម្ដេចតេជោ ហ៊ុន សែន បានបន្ថែមទៀតថា អត្រានៃភាពក្រីក្រត្រូវកាត់បន្ថយយ៉ាងឆាប់រហ័សពី ៥៣.២ភាគរយ ក្នុងឆ្នាំ២០០៤ មកត្រឹម ១៣.៥ភាគរយ ក្នុងឆ្នាំ២០១៤។ ប្រជាពលរដ្ឋមានជីវភាពកាន់​តែប្រសើរឡើង និងរស់នៅក្នុងសង្គមមួយដែលការរីកចម្រើនពីមួយថ្ងៃទៅមួយថ្ងៃ។

ទោះជាយ៉ាងណា រហូតដល់ពេលនេះ អង្គការអន្តរជាតិខាងការងារ (ILO) បានចេញរបាយការណ៍មួយថា អត្រាគ្មានការងារធ្វើក្នុងប្រទេសកម្ពុជា នៅសល់ត្រឹមតែ ០.៧ភាគរយ ប៉ុណ្ណោះ ពោលគឺអត្រាមានការងារធ្វើរបស់ប្រជាពលរដ្ឋកម្ពុជាមានដល់ទៅ៩៩.៣ភាគរយ នៅឆ្នាំ២០១៦នេះ៕