(ភ្នំពេញ)៖ កញ្ញា អ៊ុក ស៊ីរីណា យុវតីខ្មែរដំបូងគេដែលបានបញ្ចប់ការសិក្សាពីសាកលវិទ្យាលំដាប់ពិភពលោក EHL Hospitality Business School បានប្តេជ្ញាត្រៀមនាំចេញជំនាញ​បដិសណ្ឋារកិច្ចកម្រិតពិភពលោក មកអភិវឌ្ឍវិស័យសេវាកម្មនៅកម្ពុជា ខណៈកម្ពុជាកំពុងត្រូវការធនធានមនុស្ស ដើម្បីពង្រឹងវិស័យសេវាកម្ម។

ស្ថិតក្នុងវ័យ២៣ឆ្នាំ កញ្ញា អ៊ុក ស៊ីរីណា បានចូលរៀនជំនាញឧស្សាហកម្មបដិសណ្ឋារកិច្ច សាកលវិទ្យាល័យ EHL Hospitality Business School កាលពីខែកុម្ភៈ ឆ្នាំ២០២០​ និងបានបញ្ចប់ការសិក្សា​ដោយជោគជ័យ ​ព្រមទាំងទទួលសញ្ញាបត្រ​នៅទីក្រុង Lausanne ​នាថ្ងៃទី៩ ខែកក្កដា ឆ្នាំ២០២៤។

EHL ដែលជាគ្រឹះស្ថានឧត្តមសិក្សាដ៏មានកិត្យានុភាពមួយ របស់ប្រទេសស្វីស និងមានភាពល្បីល្បាញ ដោយសារស្តង់ដារនៃសិក្សា មានភាពម៉ត់ចត់ តឹងរឹង​ និងមានកម្មវិធីសិក្សារបដិសណ្ឋារកិច្ចលំដាប់ពិភពលោក។ មានប្រវត្តិជាង ១២៥ឆ្នាំ EHL ត្រូវបានគេចាត់ទុកថា ជាសាលាផ្តល់ការត្រួសត្រាយការអប់រំផ្នែកបដិសណ្ឋាកិច្ច និងសេវាកម្មល្បីជាមួយគេនៅលើពិភពលោក។ ក្នុងការសិក្សានៅសាកលវិទ្យាល័យមួយនេះ ត្រូវចំណាយការសិក្សាយ៉ាងហោចណាស់ ៥០ម៉ឺនដុល្លារ។

កញ្ញា អ៊ុក ស៊ីរីណា បានឱ្យដឹងថា ការដែលនាងទៅសិក្សាជំនាញគ្រប់គ្រងបដិសណ្ឋារកិច្ច​នៅប្រទេសស្វីស ដោយសារតែចំណង់ចំណូលចិត្ត​ និងចង់យកជំនាញនេះ មកជួយអភិវឌ្ឍន៍ប្រទេសជាតិ ខណៈបច្ចុប្បន្ននេះ វិស័យនេះកំពុងតែប្រកួតប្រជែង​ជាមួយប្រទេសជិតខាង។ សមិទ្ធិផលនេះបង្ហាញពីការប្តេជ្ញាចិត្តរបស់​នាងទៅកាន់ឧត្តមភាព និងការជំរុញរបស់នាងក្នុងការធ្វើឱ្យមានការសម្គាល់នៅក្នុងឧស្សាហកម្មបដិសណ្ឋារកិច្ចកម្រិតពិភពលោក។

កញ្ញាបានលើកឡើងថា «សមិទ្ធិផលនេះមិនត្រឹមតែជា​ជោគជ័យផ្ទាល់ខ្លួនប៉ុណ្ណោះទេ ថែមទាំងជាការលើកទឹកចិត្តដល់យុវជនកម្ពុជាជាច្រើន ដែលប្រាថ្នាចង់បន្តការសិក្សាថ្នាក់ឧត្តមសិក្សា និងរួមចំណែកយ៉ាងសំខាន់ក្នុងវិស័យដែលពួកគេជ្រើសរើស»។

​ក្រោយទទួលបានសមិទ្ធិផលដ៏អស្ចារ្យនេះ​ កញ្ញា អ៊ុក ស៊ីរីណា ​នឹងត្រឡប់មកកម្ពុជាវិញ និងបានត្រៀមខ្លួនរួចជាស្រេចក្នុងការនាំយកនូវជំនាញ និងទស្សនៈវិស័យពិសេសរបស់នាង​មកចូលរួមចំណែកអភិវឌ្ឍន៍ឧស្សាហកម្មបដិសណ្ឋារកិច្ចនៅកម្ពុជា ដែលធ្វើឱ្យមាតុភូមិរបស់នាងមានមោទនភាព និងធ្វើជាគំរូដ៏រឹងមាំសម្រាប់មនុស្សជំនាន់ក្រោយ​៕