(ភ្នំពេញ)៖ នៅល្ងាចថ្ងៃទី០៧ ខែកក្កដា ឆ្នាំ២០២៤ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានអញ្ជើញជាអធិបតីភាពក្នុងពិធីបិទការប្រកួតកីឡាបាល់ទាត់ពានរង្វាន់ កងរាជអាវុធហត្ថរាជធានីភ្នំពេញ ឆ្នាំ២០២៤ ដើម្បីអបអរសាទរ ខួបលើកទី៣១ ទិវាបង្កើតកងរាជអាវុធហត្ថ ១៤ កក្កដា ១៩៩៣ - ១៤ កក្កដា ២០២៤។

ពិធីនេះ មានការចូលរួមពីតំណាងមន្ទីរអប់រំយុវជន និងកីឡា រាជធានីភ្នំពេញ, តំណាងស.ស.យ.ក រាជធានីភ្នំពេញ, តំណាងសហព័ន្ធកីឡាបាល់ទាត់កម្ពុជា, តំណាងក្លឹបបាល់ទាត់ភ្នំពេញក្រោន, លោក លោកស្រី អតីតលោកគ្រូ អ្នកគ្រូ និងអតីតសិស្សសាលាបាក់ទូក ព្រមទាំង នាយទាហាន នាយទាហានរង អាវុធហត្ថរាជធានីភ្នំពេញ ប្រតិភូក្រុមកីឡាករទាំងអស់ចូលរួមយ៉ាងច្រើនកុះករ នៅទីលានបាល់ទាត់ SMART RSN Stadium (ភ្នំពេញក្រោន)។

ការប្រកួតដណ្តើមពានរង្វាន់ កងរាជអាវុធហត្ថរាជធានីភ្នំពេញឆ្នាំ២០២៤ គឺចាប់ផ្តើមដំណើរការឡើង ចាប់តាំងពីខែមករា រហូតដល់ខែកក្កដា ឆ្នាំ២០២៤ ដោយមានមន្ទីរចំនួន៧ វរអន្តរាគមន៍ចំនួន១ និងមូលដ្ឋានអាវុធហត្ថខណ្ឌចំនួន១៤ ត្រូវបង្កើតក្រុមដោយជ្រើសរើសកីឡាករចេញពីអង្គភាពខ្លួនឯងផ្ទាល់ ដើម្បីចូលរួមធ្វើការប្រកួតដោយប្រើរូបមន្ត ប្រកួតជម្រុះក្នុងពូល និងជ្រើសរើសយកក្រុមដែលឈ្នះក្នុងពូលនីមួយៗ មកធ្វើការប្រកួតក្នុងវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។

លោកឧត្ដមសេនីយ៍ឯក រ័ត្ន ស្រ៊ាង ក៏បានថ្លែងកោតសសើរដល់ក្រុមកីឡាករ រួមនិងក្រុមការងារ ដែលបានរៀបចំការប្រកួត តាំងពីវគ្គដំបូង រហូតដល់វគ្គផ្តាច់ព្រ័ត្រនៅថ្ងៃនេះ បានបញ្ចប់ទៅដោយរលូន និងជោគជ័យ។ លោកបន្តថា តាំងពីលោកនៅជាមេបញ្ជាការ កងរាជអាវុធហត្ថខេត្តបន្ទាយមានជ័យ រហូតមកដល់លោកធ្វើជាមេបញ្ជាការ កងរាជអាវុធហត្ថរាជធានីភ្នំពេញ លោកតែងតែបំផុសស្មារតីចូលរួមគាំទ្រ និងលេងកីឡាដើម្បីនាំមកនូវសុខភាព មិត្តភាព សាមគ្គីភាព និងជៀសវាងឲ្យឆ្ងាយពីគ្រឿងញៀន ស្របតាមគំរូដឹកនាំរបស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថរាជលើផ្ទៃប្រទេស និងជាប្រធានសហព័ន្ធបាល់ទាត់កម្ពុជា។

លោកឧត្ដមសេនីយ៍ឯក រ័ត្ន ស្រ៊ាង ក៏បានសម្តែងនូវមោទកភាព ចំពោះការរីកចម្រើន លើវិស័យកីឡាបាល់ទាត់កម្ពុជា បន្ទាប់ពីបាន រលាយបាត់ទាំងស្រុង ក្នុងរបប ប៉ុលពត ៣ឆ្នាំ ០៨ខែ និង២០ថ្ងៃ តែអាចងើបរស់ឡើងវិញ ដោយចាប់ផ្តើមពីបាតដៃទទេ ក្រោយការដឹកនាំដ៏ឈ្លាសវៀងវៃរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ជាប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នាពេលបច្ចុប្បន្ន ហើយសម្តេចគឺជាវីរបុរសឆ្នើមដែលហ៊ានយកជីវិតធ្វើជាដើមទុន ដើម្បីស្វែងរកការសង្គ្រោះជាតិ រហូតអាចជួយប្រជាជនកម្ពុជា ឲ្យរួចជីវិតផុតពីរបបខ្មៅងងឹត ប៉ុល ពត ក្នុងថ្ងៃ៧ មករា ១៩៧៩។

សម្តេចជាស្ថាបនិក នយោបាយ ឈ្នះ ឈ្នះ និងជាមគ្គុទ្ទេសក៍ឯក ដែលបាននាំមកនូវសន្តិភាព និងការឯកភាពជាតិពេញលេញ ជាពិសេសក្នុងកាលៈទេសៈប្រឈមជាមួយ សភាពការណ៍រាតត្បាត នៃជំងឺឆ្លងកូវីដ១៩ សម្តេចតេជោបានដាក់ចេញនូវវិធានការ អន្តរាគមន៍ជាច្រើន និងមានប្រសិទ្ធភាពក្នុងការប្រឆាំងកូវីដ១៩ បានស្តារនូវស្ថានភាពកម្ពុជា ឲ្យវិលមករកភាពប្រក្រតីយ៉ាងឆាប់រហ័សជួយសង្គ្រោះ អាយុជីវិតប្រជាជនកម្ពុជាទូទាំងប្រទេសជាលើកទី២ បន្ទាប់ពីថ្ងៃ៧មករា ១៩៧៩។

លោកឧត្ដមសេនីយ៍ឯក រ័ត្ន ស្រ៊ាង ក៏បានសម្តែងនូវការគាំទ្រពេញទំហឹង ចំពោះរាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានបន្តអនុវត្ត នូវគោលនយោបាយ រាជរដ្ឋាភិបាលក្នុងអណត្តិ សម្តេចតេជោ រក្សាបាននូវសន្តិភាព និងការអភិវឌ្ឍន៍កាន់តែរីកចម្រើន ហើយកីឡានេះក៏ជាផ្នែកមួយជួយឲ្យយុវជនជៀសឆ្ងាយ ពីគ្រឿងញៀន និងអំពើឧបាយមុខផ្សេងៗ ដែលអាចចាត់ទុកថា ជាការចូលរួមអនុវត្តនូវអនុសាសន៍ណែនាំរបស់សម្តេចមហាបវរធិបតី ហ៊ុន ម៉ាណែត ក្នុងការបោសសម្អាត ការជួញដូរគ្រឿងញៀន ជាអាទិភាពទី១ និងត្រូវរឹតបន្តឹងចាត់វិធានការឲ្យបានម៉ឺងម៉ាត់បំផុតចំពោះក្រុមក្មេងទំនើង ដើម្បីការពារសណ្តាប់ធ្នាប់សាធារណៈ និងសន្តិសុខសង្គម។

លោកឧត្តមសេនីយ៍ឯក រ័ត្ន ស្រ៊ាង បានប្រគល់ពានរង្វាន់ជូនដល់ក្រុមទាំង៤ ដែលទទួលបានជ័យលាភីផ្តាច់ព្រ័ត្រ ដោយចំណាត់លេខ១ ទទួលបានពាន១ ទង់ជ័យលាភី មេដាយមាសចំនួន២៧ ទឹកប្រាក់ចំនួន ៤លានរៀល, ចំណាត់ថ្នាក់លេខ២ ទទួលបានទង់ជ័យលាភី មេដាយប្រាក់ចំនួន២៧ ទឹកប្រាក់ចំនួន ៣លានរៀល, ចំណាត់ថ្នាក់លេខ៣ ទទួលបានទង់ជ័យលាភី មេដាយសំរឹទ្ធ ចំនួន២៧ ទឹកប្រាក់ចំនួន ២លានរៀល, ចំណាត់ថ្នាក់លេខ៤ ទទួល ទឹកប្រាក់ចំនួន ១លានរៀល ព្រមទាំងបានថតរូបទុកជាអនុស្សាវរីយ៍ ក្រោមបរិយាកាសសប្បាយរីករាយអធិកអធមបំផុត៕