(ភ្នំពេញ)៖ នៅក្នុងពិធីសម្ពោធមន្ទីរពេទ្យជំប៉ុនទី១ នៅក្នុងប្រទេសកម្ពុជានៅព្រឹកមិញនេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានស្នើឱ្យក្រសួងសុខាភិបាល និងស្ថាប័នពាក់ព័ន្ធបង្កើនទប់ស្កាត់ជំងឺឆ្លង Zika កុំឱ្យរាលដាលមកដល់ប្រទេសកម្ពុជា ខណៈដែលជំងឺនេះ​បានកើតឡើងនៅប្រទេសជិតខាងកម្ពុជា។

ការអំពាវនាវជាថ្មីរបស់ សម្តេចតេជោ ហ៊ុន សែន បានធ្វើឡើងបន្ទាប់ពីជំងឺ Zika កំពុងវាយប្រហារជាថ្មីនៅក្នុងប្រទេសមួយចំនួន នៅតំបន់អាស៊ីអាគ្នេយនេះ។ ប្រទេសវៀតណាម និងប្រទេសថៃ ដែលនៅជាប់ព្រំដែនខាងកើតប្រទេសកម្ពុជា នាថ្មីៗនេះ បានប្រកាសអំពីវត្តមានវីរុស Zika នៅក្នុងប្រទេសរបស់ខ្លួន ខណៈដែលសិង្ហបុរីបានរកឃើញវីរុស Zika ជាង៣០០ករណី។

ទោះជាយ៉ាងណា ដើម្បីទប់ស្កាត់ការចម្លងជំងឺនេះមកដល់ប្រទេសកម្ពុជា ក្រសួងសុខាភិបាល ក៏បានបំពាក់ម៉ាស៊ីនស្ទង់កម្តៅខ្លួនមនុស្ស នៅអាកាសយានដ្ឋានអន្តរជាតិភ្នំពេញ និងច្រកអន្តរជាតិមួយចំនួនទៀតក្នុងប្រទេសកម្ពុជាផងដែរ ដើម្បីឃ្លាំមើលអ្នកដំណើរ ដែលមានសីតុណ្ហភាពក្នុងខ្លួនខុសធម្មតា និងករណីសង្ស័យលើការផ្ទុកវីរុស Zika នេះផងដែរ៕