(ភ្នំពេញ)៖ លោក ដាវ លីឌុច ដែលជាកីឡាករប្រដាល់ក្បាច់គុន រួមនិងដៃគូវិនិយោគ​គឺលោក Andrew Nissembaum ស្ថាបនិក និងជានាយកប្រតិបត្តិក្រុមហ៊ុន MACROFUND បានចូលជួបលោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជា អគ្គ​នាយក​នៃនិយ័តករមូលបត្រកម្ពុជា (ន.ម.ក.)។

ក្នុងជំនួបនោះ ក៏មានការចូលរួមពីសំណាក់ឧកញ៉ា យូ សាម៉េត និងសហការីរបស់ក្រុម​ហ៊ុន MACROFUND មួយចំនួនទៀត។

បើតាមលោក ស៊ូ សុជាតិ បានឱ្យដឹងថា ជំនួបដែលធ្វើឡើងកាលពីថ្ងៃទី៣ ខែកក្កដា ឆ្នាំ២០២៤កន្លងទៅនោះ បានពិភាក្សាអំពីផែនការមួយក្នុង​ការ​អភិវឌ្ឍវិស័យ​មូល​បត្រ​នៅកម្ពុជា និងការធ្វើអាជីវកម្មផ្សេងៗក្នុងវិស័យមូលបត្រ។

លោក ដាវ លីឌុច បានឱ្យដឹងថា ជំនួបជាមួយលោក ស៊ូ សុជាតិ ក្រោយពេលមាន​ចង្អុល​បង្ហាញ និងណែនាំពីលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដើម្បីក្រុមហ៊ុន Macrofund ទទួលបានព័ត៌មាននានាពាក់​ព័ន្ធវិស័យមូលបត្រនៅកម្ពុជា។

ក្នុងជំនួបនោះលោក ដាវ លីឌុច ក៏បានគូសបញ្ជាក់អំពីសារៈសំខាន់​នៃរូបិយប័ណ្ណ​គ្រីបតូ​និងចង់ឱ្យកម្ពុជាពិនិត្យលទ្ធភាពលើការប្រើប្រាស់គ្រីបតូ។

លោក Andrew Nissenbaum បានគូសបញ្ជាក់ថា កិច្ចសហការរវាង Macrofund ជាមួយនិយ័តករមូលបត្រកម្ពុជា គឺជាជំហានដ៏សំខាន់មួយឆ្ពោះទៅរកការបង្កើតទីផ្សារមូលបត្រមួយល្អប្រសើរនៅកម្ពុជា។

លោក Andrew Nissenbaum ក៏បានបង្ហាញយ៉ាងមុតមាំចង់ចូលរួមចំណែក​អភិវឌ្ឍន៍​ទីផ្សារ​មូលបត្រនៅកម្ពុជា ឱ្យទទួលបានការចាប់អារម្មណ៍ និងជោគជ័យ៕