(បាត់ដំបង)៖ លោកទេសរដ្ឋមន្រ្តី ញឹម វណ្ណដា អនុប្រធានប្រចាំការ និងជាប្រធានប្រតិបត្តិគណៈកម្មាធិការជាតិ គ្រប់គ្រងគ្រោះមហន្តរាយ បានប្រគល់ម៉ាស៊ីនបូមទឹក៦គ្រឿង ដល់សាលាខេត្តបាត់ដំបង នាព្រឹកថ្ងៃទី២០ ខែកញ្ញា ឆ្នាំ២០១៦នេះ សម្រាប់យកទៅប្រគល់បន្ត នៅតាមស្រុកគោលដៅនានា ហើយម៉ាស៊ីនបូមទឹកនេះ ដែលជាអំណោយរបស់អង្គការការីតាស់កម្ពុជាខេត្ត។ ក្នុងនោះក៏មានការចូលរួមពី លោក ច័ន្ទ សុផល អភិបាលខេត្ត តំណាងជាអ្នកទទួល និងលោកប្រធានមន្ទីរជំនាញពាក់ព័ន្ធនានា ចូលរួមផងដែរ។
លោកទេសរដ្ឋមន្រ្តី ញឹម វណ្ណដា បានលើកឡើងថា ក្នុងនាមគណៈកម្មាធិការគ្រប់គ្រងគ្រោះមហន្តរាយ គឺតែងតែបានសហការជាមួយ ដៃគូរអភិវឌ្ឍន៍នានា និងសប្បុរសជន បានប្រគល់អំណោយផ្សេងៗ ដើម្បីជួយសង្គ្រោះ ដល់ប្រជាពលរដ្ឋទូទៅ ដែលប្រទះគ្រោះធម្មជាតិផ្សេងៗកន្លងមក ហើយលោកទេសរដ្ឋមន្ដ្រី សូមថ្លែងអំណរគុណ ដល់លោកប្រធានអង្គការការីតាស់កម្ពុជា តែងតែជួយជាអំណោយសង្រ្គោះបន្ទាន់ ដល់រដ្ឋបាលខេត្តបាត់ដំបង មិនដែលខានឡើយ។
ជាមួយគ្នានោះដែរ លោក ច័ន្ទ សុផល អភិបាលខេត្ត មានក្តីរំភើបណាស់ ដែលថ្ងៃនេះអង្គការការីតាស់កម្ពុជា បានប្រគល់ម៉ាស៊ីនបូមទឹក៦គ្រឿង តាមរយៈលោកទេសរដ្ឋមន្រ្តី និងជាកិត្តិយស ដល់ប្រជាពលរដ្ឋក្នុងខេត្តផងដែរ ដែលមានថ្នាក់ដឹកនាំគ្រប់ជាន់ថ្នាក់បានយកចិត្តទុកដាក់ គិតគូរ ពីជីវភាពរស់នៅរបស់ប្រជាពលរដ្ឋ រហូតមកផងដែរ លោកក៏សូមថ្លែងអំណរគុណ ដល់អង្គការការីតាស់កម្ពុជាផងដែរ។
សូមជំរាបថា អង្គការការីតាស់កម្ពុជាខេត្ត បានការចូលរួមកិច្ចការសង្គម ជាហូរហែរកន្លងមក ជាក់ស្តែងថ្ងៃនេះ អង្គការបានប្រគល់ម៉ាស៊ីនបូមទឹក ៦គ្រឿង តាមរយៈលោកទេសរដ្ឋមន្រ្តី ញឹម វណ្ណដា ជូនលោកអភិបាលខេត្តបាត់ដំបង ដើម្បីប្រគល់បន្តជូនស្រុកគោលដៅ ដែលទទួលរងគ្រោះរាំងស្ងួតកន្លងមក៕
