(ភ្នំពេញ)៖ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានដឹកនាំកិច្ចប្រជុំពិភាក្សាការងារស្តីពីការវិភាគមុខងាររបស់ទីស្តីការគណៈរដ្ឋមន្ត្រី ដោយមានការចូលរួមពីថ្នាក់ដឹកនាំនៃទីស្តីការគណៈរដ្ឋមន្ត្រីជាច្រើនរូប។

កិច្ចប្រជុំនេះធ្វើឡើងនាព្រឹកថ្ងៃទី៤ ខែកក្កដា ឆ្នាំ២០២៤។ ក្នុងកិច្ចប្រជុំដ៏មានសារៈសំខាន់នេះ លោកឧបនាយករដ្ឋមន្ត្រីប្រចាំការបានមានឱ្យដឹងថា ការវិភាគមុខងារគឺជាកិច្ចការសំខាន់មួយដែលត្រូវអនុវត្តនៅគ្រប់ក្រសួង ស្ថាប័នទាំងអស់របស់រាជរដ្ឋាភិបាល ដូចមានកំណត់ក្នុងស្នូលនៃយុទ្ធសាស្ត្របញ្ចកោណដំណាក់កាលទី១ និងជាមុខសញ្ញានិងជាវិធានការសំខាន់មួយក្នុងចំណោមវិធានការគន្លឹះទាំង៥ របស់រាជរដ្ឋាភិបាលពោលគឺការកែទម្រង់វិស័យរដ្ឋបាលសាធារណៈ ជាពិសេសចូលរួមសម្រេចបាននូវចក្ខុវិស័យ និងបេសកកម្មរបស់ទីស្តីការគណៈរដ្ឋមន្ត្រី។

លោក វង្សី វិស្សុត បានសង្កត់ធ្ងន់ថា កិច្ចការនេះក៏ជាកិច្ចការបន្ទាន់ដែលមានចរិតយុទ្ធសាស្ត្រ និងមានភាពពាក់ព័ន្ធទៅនឹងប្រសិទ្ធភាព គុណភាព និងសមិទ្ធកម្មការងាររបស់ទីស្តីការគណៈរដ្ឋមន្ត្រី ក៏ដូចជារាជរដ្ឋាភិបាលទាំងមូល និងទាមទារឱ្យមានការយកចិត្តទុក្ខដាក់ពីសំណាក់ថ្នាក់ដឹកនាំ និងមន្ត្រីរាជការក្រោមឱវាទ ដើម្បីឱ្យចេញជាលទ្ធផលការងារ និងជាកម្លាំងការងាររួម។

លោកឧបនាយករដ្ឋមន្ត្រីប្រចាំការ បានផ្តល់ការណែនាំលម្អិតអំពីបេសកកម្មសំខាន់ៗចំនួន៤ ដែលមានកន្សោមមុខងារចំនួន៣សំខាន់ៗ រួមមាន៖

១. មុខងារស្នូលចំនួន៧ ដូចជា ការរៀបចំកិច្ចដំណើរការរបស់គណៈរដ្ឋមន្រ្តី និងការរៀបចំកិច្ចប្រជុំគណៈរដ្ឋមន្រ្តី, ការសិក្សាស្រាវជ្រាវ ពិនិត្យ និងផ្តល់យោបល់លើសំណើ/ឯកសាររបស់ក្រសួងស្ថាប័ន និងលិខិតបទដ្ឋានគតិយុត្ត, ការសម្របសម្រួលកិច្ចការអន្តរក្រសួងនិងមុខងារពិសេសរបស់រាជរដ្ឋាភិបាល, ការតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្រ្តបញ្ចកោណដំណាក់កាលទី១ ការអនុវត្តគោលនយោបាយនិងការសម្រេចរបស់
គណៈរដ្ឋមន្រ្តី និងរាជរដ្ឋាភិបាល, បណ្ណាសារ, ការងារឥស្សរិយយស និងឯកសណ្ឋាន និងកិច្ចការទំនាក់ទំនងព្រឹទ្ធសភា និងរដ្ឋសភា។
២. មុខងារសម្របសម្រួលជាមួយស្ថាប័នដែលជាអាជ្ញាធរ ក្រុមប្រឹក្សា ឬគណៈកម្មាធិការដែលនៅក្រោមអាណាបក្សដើមខ្សែនៃទីស្តីការគណៈរដ្ឋមន្ត្រី
៣. មុខងារគាំទ្រនានារបស់ទីស្តីការគណៈរដ្ឋមន្ត្រី រួមមាន៖ រដ្ឋបាល, បុគ្គលិក, ហិរញ្ញវត្ថុ, ឡូជីស្ទីក និងបរិវត្តកម្មឌីជីថល ដែលទាំងអស់នេះ គឺជាធាតុចូលបន្ថែមជូនក្រុមការងារ និងបានគូសរំលេចអំពីអភិក្រមការងារសំខាន់ៗក្នុងការអនុវត្តកិច្ចការនេះ ដោយធ្វើយ៉ាងណាធានាការប្រើប្រាស់ធនធានដែលមានស្រាប់ឱ្យអស់លទ្ធភាព ស្របតាមការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ជាមួយគ្នានេះ ឧបនាយករដ្ឋមន្ត្រីប្រចាំការក៏បានណែនាំជូនអង្គប្រជុំឱ្យចាត់ទុកកិច្ចការនេះជាកាតព្វកិច្ច និងជាឱកាសផង ដោយម្ខាងទីស្តីការគណៈរដ្ឋមន្ត្រីត្រូវសម្របខ្លួនទៅនឹងតម្រូវការចាំបាច់ក្នុងការវិភាគមុខងារ និងការកែទម្រង់រចនាសម្ព័ន្ធរដ្ឋបាលសាធារណៈ ដូចមានកំណត់នៅក្នុងយុទ្ធសាស្ត្របញ្ចកោណដំណាក់កាលទី១ និងម្ខាងទៀតជាឱកាសក្នុងការបញ្ចូលទស្សនៈ និងការគិតគូរនានា ដែលបានសិក្សា គិតគូរ និងរៀបចំជាហូរហែរពីដើមនីតិកាលទី៧ មកក្នុងក្របខណ្ឌនៃការកែទម្រង់រចនាសម្ព័ន្ធរដ្ឋបាលសាធារណៈតែម្តង។

លោកឧបនាយករដ្ឋមន្ត្រីប្រចាំការ បានណែនាំឱ្យមានការរៀបចំក្រុមការងារទទួលបន្ទុកដឹកនាំវិភាគមុខងាររបស់ទីស្តីការគណៈរដ្ឋមន្ត្រី ដែលឧបនាយករដ្ឋមន្ត្រីប្រចាំការនឹងដឹកនាំផ្ទាល់ និងមានការចូលរួមពីសំណាក់ថ្នាក់ដឹកនាំនៃបណ្តាអង្គភាពក្រោមឱវាទ ព្រមទាំងបានណែនាំឱ្យមានការបង្កើតក្រុមការងារបច្ចេកទេសមួយដែលនឹងទទួលបន្ទុកជួយប្រតិបត្តិកិច្ចការដ៏សំខាន់នេះ៕