(ភ្នំពេញ)៖ លោក ស្តេហ្វេន មេសសេរឺ (STEFAN MESSERER) ឯកអគ្គរដ្ឋទូត​អាល្លឺ​ម៉ង់ប្រចាំនៅកម្ពុជា បានឱ្យដឹងថា ក្រុមហ៊ុនអាល្លឺម៉ង់មួយទៀត កំពុងពិនិត្យលទ្ធភាព​ពង្រីកការវិនិយោគនៅកម្ពុជា បន្ថែមពីលើការវិនិយោគនៅប្រទេសវៀតណាម។

លោកឯកអគ្គរដ្ឋទូត បានបញ្ជាក់បែបនេះក្នុងជំនួបជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃព្រហស្បតិ៍ ទី៤ ខែកក្កដា ឆ្នាំ២០២៤នេះ។

បើតាមលោកឯកអគ្គរដ្ឋទូត ក្រុមហ៊ុនអាល្លឺម៉ង់មួយនេះ កំពុង​សិក្សា​បន្ថែមទៀត លើបរិយាកាសសម្រាប់ការវិនិយោគ រួមទាំង​នីតិវិធីពន្ធដារជាដើម។

សម្ដេចតេជោ ហ៊ុន សែន បានគាំទ្រការវិនិយោគតាមរូបមន្ត១បូកនេះ ហើយសម្តេចក៏ចង់បាន​ផងដែរ។ សម្ដេចតេជោ បានលើកករណីក្រុមហ៊ុនជប៉ុនមីនីបៀ ដែល​វិនិយោគនៅប្រទេសជិតខាងរបស់កម្ពុជា ក៏បានពង្រីកការវិនិយោគនៅកម្ពុជា ធ្វើ​ឱ្យ​ច្រវាក់ផ្គត់ផ្គង់មានភាពរលូនមិនរអាក់រអួល។

ទាក់ទងនឹងបរិយាកាសវិនិយោគនៅកម្ពុជានេះដែរ សម្ដេចតេជោប្រធានព្រឹទ្ធសភា បានអះអាង​ថា រាជរដ្ឋាភិបាលថ្មីក្រោមការដឹកនាំរបស់សម្ដេចធិបតីនាយករដ្ឋមន្រ្តី កំពុងបន្តខិតខំ​យ៉ាង​សកម្មក្នុងការសម្របសម្រួលធ្វើឱ្យបរិយាកាសវិនិយោគ​កាន់តែ​ប្រសើរ​ឡើង។

សម្តេចតេជោ បានបញ្ជាក់ផងដែរថា កម្ពុជា កំពុងតែជំរុញការនាំចេញទៅកាន់បណ្ដា​ប្រទេស​ផ្សេងៗ នៅអឺរ៉ុប នៅអាមេរិក និងប្រទេសជប៉ុន កូរ៉េ ចិន ឱ្យកាន់តែធំថែមទៀត នៅក្នុងក្របខ័ណ្ឌ នៃ RCEP ដែលបានចូលជាធរមាន AFTA កិច្ចព្រមព្រៀងផ្លាស់ប្តូរ​សេដ្ឋ​កិច្ចសេរី ជាមួយ ចិន កូរ៉េ អេមីរ៉ាតអារ៉ាប់រួម...។ ជាមួយគ្នានេះ កម្ពុជា កំពុងតែ​ខិត​ខំ​ស្វែង​រកបង្កើតនូវកិច្ចព្រ​ម​ព្រៀង​ពាណិជ្ជកម្មសេរីជាមួយនឹងបណ្ដាប្រទេសផ្សេងៗ​ទៀតផងដែរ៕