(បន្ទាយមានជ័យ)៖ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿង និងជាប្រធានក្រុមការងារថ្នាក់ជាតិចុះជួយ ខេត្តបន្ទាយមានជ័យ និងភរិយា ព្រមទាំងមន្ត្រីរាជការ នៅព្រឹកថ្ងៃទី១៩ ខែកញ្ញា ឆ្នាំ២០១៦នេះ ចូលរួមកាន់បិណ្ឌវេនទី៣ នៅវត្តពោធិវាលថ្មពួក ស្ថិតនៅក្នុងឃុំថ្មពួក ស្រុកថ្មពួក ខេត្តបន្ទាយមានជ័យ។
បន្ទាប់ពីការគោរពថ្វាយភួងផ្កា បូជាទៀនធូប ចំពោះព្រះពុទ្ធរូបព្រះសម្មាសម្ពុទ្ធ និងនម្សការព្រះរតនៈត្រៃ តាមគន្លងព្រះពុទ្ធសាសនា និងពិធីរាប់បាតរួចមក ឧបនាយករដ្ឋមន្ត្រី កែ គឹមយ៉ាន បានសំណេះសំណាល ទៅកាន់ព្រះសង្ឍ តាជីយាយជី ប្រជា ពុទ្ធបរិស័ទ្ធ ជិតឆ្ងាយដែលបានចូលរួមផងដែរ ហើយឧបនាយករដ្ឋមន្ត្រី លើកឡើងថា ការគោរពធ្វើបុណ្យភ្ជុំបិណ្ឌនេះ ឡើង ដើម្បីឧទ្ទិសកុសលផលបុណ្យ ជូនដល់វិញ្ញាណក្ខន្ធ មាតាបិតា ជីដូនជីតា ញាតិការទាំងប្រាំពីរសណ្តាន បុព្វការីជន ដែលបានចែកឋាន ទៅកាន់លោកខាងមុខ និងដួងវិញ្ញាណក្ខន្ធ័កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិមាតុភូមិ និងការពារអភិវឌ្ឍប្រទេសជាតិ។
ឧបនាយករដ្ឋមន្ត្រីបន្តថា «ប្រជាពុទ្ធបរិស័ទទាំងអស់បានជួបជុំគ្នា មានឱកាសបាន ធ្វើបុណ្យទាន យ៉ាងសប្បាយនាពេលនេះ ក៏ដោយសារតែប្រទេសជាតិ របស់យើងមានសុខ សន្តិភាព ពេញលេញ មានកាអភិវឌ្ឍរីកចម្រើ សម្បូរសប្បាយ គ្មានការពួយបារម្ម ក្នុងការរស់នៅ ក្រោយការដឹកនាំរបស់រាជរដ្ឋាភិបាល ដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ចប់សង្គ្រាមទាំស្រុង ដឹកនាំកសាងប្រទេសជាតិ ឆ្ពោះទៅរកសុខសន្តិភាព និងអភិវឌ្ឍលើគ្រប់វិស័យ ទាំងវិស័យពុទ្ធចក្រ និងអាណាចក្រ» ។
ជាមួយគ្នានោះដែរ ឧបនាយករដ្ឋមន្ដ្រី និងភរិយា បានប្រគេនបច្ច័យជាង១០លានរៀល និងជូនអំណោយប្រជាពលរដ្ឋជាង៤០០នាក់ ក្នុងម្នាក់បានសារុង១ ថវិកា១០,០០០រៀលផងដែរ៕
