(ភ្នំពេញ)៖ កម្ពុជា និងគុយបា បានសង្កត់ធ្ងន់លើកិច្ចខិតខំប្រឹងប្រែងបន្ថែមទៀត ដើម្បីពង្រឹងកិច្ចសហប្រតិបត្តិការលើវិស័យពាណិជ្ជកម្ម ដោយផ្តោតលើសារៈសំខាន់នៃការពង្រីកទំនាក់ទំនងរវាងក្រសួងជំនាញ សភាពាណិជ្ជកម្ម និងវិស័យឯកជន តាមរយៈកិច្ចប្រជុំតាមអនឡាញ និងការផ្លាស់ប្តូរគណៈប្រតិភូ។
កិច្ចពិភាក្សានេះ បានធ្វើឡើងនៅក្នុងឱកាស លោក ជុំ សុន្ទរី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានដឹកនាំគណៈប្រតិភូទៅបំពេញទស្សនកិច្ចការងារនៅប្រទេសគុយបា ចាប់ពីថ្ងៃទី២៤ ដល់ថ្ងៃទី២៨ ខែមិថុនា ឆ្នាំ២០២៤ ដើម្បីស្វែងរកឱកាសពង្រីកកិច្ចសហប្រតិបត្តិការរវាងប្រទេសទាំងពីរ។ កិច្ចពិគ្រោះយោបល់ទ្វេភាគី លើកទី៣។
នៅក្នុងដំណើរទស្សនកិច្ចនេះ លោក ជុំ សុន្ទរី បានធ្វើជាសហប្រធាននៃកិច្ចពិគ្រោះយោបល់ទ្វេភាគីលើកទី៣ ជាមួយ លោក អាណាយ៉ាន់ស៊ី រ៉ូឌ្រីហ្គេស កាម៉េហូ (Anayansi Rodríguez Camejo) អនុរដ្ឋមន្ត្រីការបរទេសគុយបា នៅទីក្រុងហាវ៉ាណា នាថ្ងៃទី២៦ ខែមិថុនា ឆ្នាំ២០២៤។ កិច្ចប្រជុំបានបញ្ជាក់ជាថ្មី អំពីទំនាក់ទំនងមិត្តភាពដ៏យូរអង្វែងរវាងកម្ពុជា និងគុយបា និងបានពិនិត្យវឌ្ឍនភាពក្នុងកិច្ចសហប្រតិបត្តិការទ្វេភាគី ដោយផ្តោតលើវិស័យពាណិជ្ជកម្ម កសិកម្ម សុខាភិបាល កីឡា អប់រំ វប្បធម៌ និងព័ត៌មាន។
លោករដ្ឋលេខាធិការក្រសួងការបរទេស និងលោកអនុរដ្ឋមន្ត្រីការបរទេសគុយបា បានបញ្ជាក់យ៉ាងោដូច្នេះថា៖ «ភាគីទាំងពីរបានសង្កត់ធ្ងន់លើកិច្ចខិតខំ ប្រឹងប្រែងបន្ថែមទៀត ដើម្បីពង្រឹងកិច្ចសហប្រតិបត្តិការលើវិស័យពាណិជ្ជកម្ម ដោយផ្តោតលើសារៈសំខាន់នៃការពង្រីកទំនាក់ទំនងរវាងក្រសួងជំនាញ សភាពាណិជ្ជកម្ម និងវិស័យឯកជន តាមរយៈកិច្ចប្រជុំតាមអនឡាញ និងការផ្លាស់ប្តូរគណៈប្រតិភូ»។ ចំពោះវិស័យកសិកម្ម អនុរដ្ឋមន្ត្រីការបរទេស កាម៉េហូ បានសម្តែងអំណរគុណយ៉ាងជ្រាលជ្រៅរបស់គុយបាចំពោះជំនួយ និងការគាំទ្ររបស់កម្ពុជាក្នុងវិស័យស្រូវអង្ករ ពិសេសការលើកកម្ពស់វិស័យស្រូវអង្ករ និងសមត្ថភាពផលិតរបស់គុយបា។ ភាគីទាំងពីរបានឯកភាពជំរុញការអនុវត្តបានពេញលេញនូវការព្រមព្រៀងនានាដែលសម្រេចបានរវាងក្រសួងកសិកម្មទាំងពីរ និងពន្លឿនអនុស្សរណៈយោគយល់គ្នាស្តីពីការអភិវឌ្ឍស្រូវអង្ករនៅគុយបា។
ក្នុងវិស័យសុខាភិបាល លោករដ្ឋលេខាធិការ ជុំ សុន្ទរី បានថ្លែងអំណរគុណដល់គុយបា ដែលបានបន្តកិច្ចសហប្រតិបត្តិការជាមួយកម្ពុជា ជាពិសេសការផ្តល់អាហារូបករណ៍ដល់គ្រូពេទ្យទូទៅ ការលើកកម្ពស់វេជ្ជបណ្ឌិតឯកទេស ការផ្ទេរបច្ចេកវិទ្យាវេជ្ជសាស្ត្រ ការបញ្ជូនវេជ្ជបណ្ឌិតមកព្យាបាលជំងឺមហារីក ទឹកនោមផ្អែម និងជំងឺផ្សេងទៀត ព្រមទាំងការជួយបណ្តុះបណ្តាលវេជ្ជបណ្ឌិតកម្ពុជា។ លោកក៏បានវាយតម្លៃខ្ពស់ចំពោះកិច្ចសហប្រតិបត្តិការរបស់គុយបា ក្នុងការជួយកម្ពុជាបង្កើតមន្ទីរពេទ្យឯកទេសជំងឺមហារីក ដើម្បីបង្កើនសមត្ថភាពក្នុងការព្យាបាលជំងឺនេះប្រកបដោយប្រសិទ្ធភាព។
ទាក់ទងនឹងវិស័យអប់រំ លោករដ្ឋលេខាធិការ បានថ្លែងអំណរគុណដល់គុយបាដែលបានផ្តល់អាហារូបករណ៍ដល់និស្សិតកម្ពុជា និងបានស្នើឱ្យមានអាហារូបករណ៍បន្ថែមទៀតសម្រាប់ការបណ្តុះបណ្តាលផ្នែកវេជ្ជសាស្រ្ត បច្ចេកទេស និងភាសានៅប្រទេសគុយបា ជាពិសេសថ្នាក់ក្រោយឧត្តមសិក្សា។ លោកបានស្នើឱ្យក្រសួង/ស្ថាប័នអប់រំនៃប្រទេសទាំងពីរ សិក្សាពីគម្រោងមិនបាច់បង់ថ្លៃសិក្សា ដែលសិស្ស/និស្សិត រ៉ាប់រងការចំណាយរស់នៅ របស់ពួកគេដោយខ្លួនឯង ដែលបច្ចុប្បន្នកំពុងពេញនិយមក្នុងចំណោមប្រទេសនៅអាមេរិកឡាទីន ដើម្បីផ្តល់លទ្ធភាពឱ្យនិស្សិតកម្ពុជា កាន់តែច្រើនអាចទៅសិក្សានៅប្រទេសគុយបា ជាពិសេសក្នុងផ្នែកវេជ្ជសាស្ត្រ និងឱសថសាស្រ្ត។
ក្នុងវិស័យកីឡា លោករដ្ឋលេខាធិការ បានថ្លែងនូវអំណរគុណដោយស្មោះរបស់កម្ពុជាចំពោះការគាំទ្ររបស់គុយបា ក្នុងអំឡុងការប្រកួតកីឡាស៊ីហ្គេមលើកទី៣២ នៅកម្ពុជា និងបានលើកទឹកចិត្តឱ្យមានការអនុវត្តពេញលេញនូវកិច្ចព្រមព្រៀងស្តីពីកិច្ចសហប្រតិបត្តិការក្នុងវិស័យវប្បធម៌អប់រំកាយ និងកីឡា ចុះហត្ថលេខានៅឆ្នាំ២០២២ រវាងក្រសួងអប់រំ យុវជន និងកីឡាកម្ពុជា និងវិទ្យាស្ថានជាតិកីឡា អប់រំកាយ និងការលេងកំសាន្តរបស់គុយបា។
ចំពោះវិស័យព័ត៌មាន ភាគីទាំងពីរ បានប្តេជ្ញាពង្រឹងកិច្ចសហប្រតិបត្តិការឱ្យស៊ីជម្រៅ តាមរយៈការពង្រីកការផ្លាស់ប្តូរព័ត៌មាន ដោយរួមបញ្ចូលនូវការផ្លាស់ប្តូរខ្លឹមសារផ្សាយបន្ថែមទៀតទាក់ទងនឹងវប្បធម៌ ប្រពៃណី ទេសចរណ៍ និងពាណិជ្ជកម្ម ក៏ដូចជាតាមរយៈការផ្លាស់ប្តូរទស្សនកិច្ចរវាងអ្នកសារព័ត៌មានមកពី ទីភ្នាក់ងារសារព័ត៌មានជាតិទាំងពីរ។ ភាគីទាំងពីរ បានឯកភាពជំរុញការអនុវត្តប្រកបដោយប្រសិទ្ធភាពនូវ អនុស្សរណៈយោគយល់គ្នាស្តីពីកម្មវិធីសហប្រតិបត្តិការ និងផ្លាស់ប្តូរវប្បធម៌ សម្រាប់ឆ្នាំ ២០២២-២០២៧ ដែលបានចុះហត្ថលេខារវាងក្រសួងវប្បធម៌នៃប្រទេសទាំងពីរ កាលពីខែតុលា ឆ្នាំ ២០២២។
កិច្ចប្រជុំក៏បានពិភាក្សាអំពីកិច្ចសហប្រតិបត្តិការក្នុងក្របខណ្ឌអាស៊ាន-គុយបា និងអង្គការសហប្រជាជាតិ និងបានផ្លាស់ប្តូរយោបល់លើបញ្ហាតំបន់ និងអន្តរជាតិមួយចំនួនដែលជាកង្វល់រួម។ ការពិគ្រោះយោបល់បានបញ្ចប់ដោយមានការប្តេជ្ញាចិត្តយ៉ាងមុតមាំចំពោះការបន្តកិច្ចសន្ទនា និងកិច្ចសហប្រតិបត្តិការ ហើយកិច្ចប្រជុំបន្ទាប់នឹងប្រព្រឹត្តទៅ នៅទីក្រុងភ្នំពេញ ក្នុងពេលវេលាមួយសមស្រប។
ក្នុងអំឡុងពេលស្នាក់នៅទីក្រុងឡាហាវ៉ាន រដ្ឋលេខាធិការ ជុំ សុន្ទរី ក៏បានជួបសម្តែង ការគួរសមជាមួយលោក ប្រ៊ូណូ រ៉ូឌ្រីហ្គេស ប៉ារីយ៉ា (Bruno Rodríguez Parrilla) រដ្ឋមន្ត្រីការបរទេសគុយបាផងដែរ។ លោកបានពាំនាំនូវការសួរសុខទុក្ខពី លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសនិងសហប្រតិបត្តិការអន្តរជាតិ ព្រមទាំងសាររបស់លោកឧបនាយករដ្ឋមន្ត្រី ទន្ទឹងរង់ចាំធ្វើការយ៉ាងជិតស្និទ្ធជាមួយលោករដ្ឋមន្ត្រី ប៉ារីយ៉ា ក្នុងការជំរុញកំរិតទំនាក់ទំនងរវាងប្រជាជាតិទាំងពីរឱ្យកើនឡើងកាន់តែខ្ពស់។
បន្ថែមពីនេះ រដ្ឋលេខាធិការ សុន្ទរី បានជម្រាបលោករដ្ឋមន្ត្រី ប៉ារីយ៉ា អំពីលទ្ធផលសំខាន់ៗ នៃកិច្ចពិគ្រោះយោបល់ទ្វេភាគីលើកទី៣ ដោយគូសបញ្ជាក់ពីការពិភាក្សាប្រកបដោយផ្លែផ្កាលើការពង្រឹង និងពង្រីកកិច្ចសហប្រតិបត្តិការទ្វេភាគី ជាពិសេសលើទំនាក់ទំនងការទូត នយោបាយ និងសេដ្ឋកិច្ច និងលើវិស័យសក្តានុពលមួយចំនួន រួមមានអប់រំ សុខាភិបាល កសិកម្ម វប្បធម៌ និងកីឡា។
ជាមួយគ្នានេះ លោករដ្ឋមន្ត្រី ប៉ារីយ៉ា និងរដ្ឋលេខាធិការ សុន្ទរី បានពិភាក្សាអំពីការប្តេជ្ញាចិត្តរួមក្នុងការពង្រឹងបន្ថែមនូវកិច្ចសហប្រតិបត្តិការ ក្នុងក្របខណ្ឌទំនាក់ទំនងអាស៊ាន-គុយបា អង្គការសហប្រជាជាតិ និងអង្គការអន្តរជាតិនានា ព្រមទាំងបានផ្លាស់ប្តូរយោបល់អំពីមធ្យោបាយពង្រឹងទំនាក់ទំនងបន្ថែមទៀតទាំងក្នុងក្របខ័ណ្ឌទ្វេភាគី និងពហុភាគី។
ជំនួបជាមួយលោកអនុរដ្ឋមន្ត្រីក្រសួងកសិកម្មគុយបា ក្នុងជំនួបជាមួយលោក ម៉ៅរី ហេឆាវ៉ារីយ៉ា បឺមូដេស (Maury Hechavarría Bermúdez) អនុរដ្ឋមន្ត្រីក្រសួងកសិកម្ម តាមសំណើរបស់ឯកឧត្តមអនុរដ្ឋមន្ត្រី ដើម្បីពិភាក្សាអំពីកិច្ចសហប្រតិបត្តិការក្នុងវិស័យកសិកម្ម លោករដ្ឋលេខាធិការ និងឯកឧត្តមអនុរដ្ឋមន្ត្រី បានសម្តែងការពេញចិត្តចំពោះវឌ្ឍនភាពដែលសម្រេចបានកន្លងមកក្នុងកិច្ចសហប្រតិបត្តិការលើវិស័យកសិកម្ម និងបានពិភាក្សាគ្នាអំពីវិធីក្នុងការពង្រឹងកិច្ចសហប្រតិបត្តិការនេះបន្ថែមទៀត។
ជាថ្មីម្ដងទៀត លោករដ្ឋលេខាធិការ សុន្ទរី បានពាំនាំនូវបំណងរបស់ក្រសួងកសិកម្មកម្ពុជា ក្នុងការជំរុញការអនុវត្តពេញលេញនូវការព្រមព្រៀងដែលសម្រេច បានរវាងក្រសួងកសិកម្មទាំងពីរ និងពន្លឿននីតិវិធីសម្រាប់ការចុះហត្ថលេខាលើអនុស្សរណៈយោគយល់គ្នាស្តីពី ការអភិវឌ្ឍស្រូវ នៅប្រទេសគុយបានាពេលឆាប់ៗខាងមុខ។ ការជួបជាមួយនិស្សិតជាការគួរកត់សម្គាល់ដែលនោះ អំឡុងពេលស្នាក់នៅទីក្រុងហាវ៉ាណា រដ្ឋលេខាធិការ សុន្ទរី និងគណៈប្រតិភូក៏បានជួបសំណេះសំណាល និងសួរសុខទុក្ខនិស្សិតកម្ពុជាដែលកំពុងសិក្សានៅប្រទេសគុយបាផងដែរ៕
