(ភ្នំពេញ)៖ អគ្គស្នងការដ្ឋាននគរបាលជាតិ នៅថ្ងៃទី២៥ ខែមិថុនា ឆ្នាំ២០២៤នេះ បានចេញមកច្រានចោលគណនី TikTok ក្លែងក្លាយចំនួន២ ឈ្មោះ «Sar Theth» ដែលត្រូវបានគេបង្កើតឡើងដោយប្រើប្រាស់ឈ្មោះ និងរូបថតរបស់នាយឧត្តមសេនីយ៍ ស ថេត អគ្គស្នងការនគរបាលជាតិ។

ក្រៅពីគណនី TikTok អគ្គស្នងការដ្ឋាននគរបាលជាតិ ច្រានចោលគណនី Facebook មួយទៀតដូចគ្នា ដែលប្រើប្រាស់ឈ្មោះ នាយឧត្តមសេនីយ៍ ស ថេត ជាភាសាអង់គ្លេស «Theth Sar» និងដាក់តាំងរូបរបស់នាយឧត្តមសេនីយ៍។ ករណីទាំង២នេះ កម្លាំងសមត្ថកិច្ចជំនាញកំពុងធ្វើការស្រាវជ្រាវ និងចាត់វិធានការតាមផ្លូវច្បាប់។

គេហទំព័ររបស់អគ្គស្នងការដ្ឋាននគរបាលជាតិ បានបញ្ជាក់យ៉ាងដូច្នេះថា «សូមជម្រាបជូន អ្នកចូលចិត្តលេងបណ្ដាញសង្គមថា គណនី (Account) ទាំង៣ខាងក្រោមនេះជា គណនី (Account) ក្លែងក្លាយ‌។ សមត្ថកិច្ចជំនាញកំពុងចាត់វិធានការស្រាវជ្រាវ សូមបងប្អូនកុំយកទៅចែករំលែក (Share) បន្ត គឺជាអំពើខុសច្បាប់»៕