(ភ្នំពេញ)៖ លោក ហ្សង់ ហ្វ្រង់ស្វ័រ តាន់ រដ្ឋមន្រ្តីប្រតិភូអមនាយករដ្ឋមន្រ្តី បានលើកឡើងថា ប្រទេសកម្ពុជា គ្រាន់តែសិក្សាអំពីគំរូខ្លាំងរបស់សិង្ហបុរី ប៉ុន្តែកម្ពុជានឹងមិនយកតម្រាប់តាម១០០ភាគរយទេ។
មូលហេតុដែលលោក ហ្សង់ ហ្វ្រង់ស្វ័រ តាន់ អះអាងដូច្នេះ ដោយសារតែលោកយល់ថា សិង្ហបុរីជាសិង្ហបុរី ឯកម្ពុជាជាកម្ពុជា ដែលមានវប្បធម៌ អរិយធម៌ ប្រវត្តិសាស្ត្រ និងផ្នត់គំនិតប្រជាជនមិនដូចគ្នា។
ការលើកឡើងរបស់មន្រ្តីជាន់ខ្ពស់រាជរដ្ឋាភិបាលរូបនេះ បានធ្វើឡើងនៅក្នុងសន្និសីទសារព័ត៌មាន ស្តីពីលទ្ធផលទស្សនកិច្ចផ្លូវការ រយៈពេល២ថ្ងៃ របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅឯព្រលានយន្តហោះអន្តរជាតិភ្នំពេញ នាល្ងាចថ្ងៃទី១៩ ខែមិថុនា ឆ្នាំ២០២៤នេះ។
ឆ្លើយសំណួរអ្នកសារព័ត៌មានក្នុងសន្និសីទ លោក ហ្សង់ ហ្វ្រង់ស្វ័រ តាន់ បានបញ្ជាក់ដូច្នេះថា៖ «កម្ពុជាក្រោមការដឹកនាំរបស់ សម្តេចធិបតី ហ៊ុន ម៉ាណែត ច្បាស់ជាចាប់អារម្មណ៍ នេះជាការពិត ហើយច្បាស់ជាចង់រៀនសូត្រ ជុំវិញគំរូអភិវឌ្ឍនៃសាំងហ្គាព័រ ប៉ុន្តែកម្ពុជាគ្មានបំណងចង់ធ្វើតាមសាំងហ្គាព័រ១០០ភាគរយ គ្មានបំណងធ្វើតម្រាបតាមសាំងហ្គាព័រនោះទេ ពីព្រោះកម្ពុជាជាកម្ពុជា សិង្ហបុរីជាសិង្ហបុរី ប្រជាជនកម្ពុជាជាប្រជាជនកម្ពុជា ប្រជាជនសិង្ហបុរីជាប្រជាជនសិង្ហបុរី»។
លោកបានបន្តថា «វប្បធម៌ ប្រវត្តិសាស្ត្រ ផ្នត់គំនិតនៃប្រជាជនសិង្ហបុរី មិនដូចគ្នាទាល់តែសោះ នឹងវប្បធម៌ អរិយធម៌ និងប្រវត្តិសាស្ត្រកម្ពុជា ម្ល៉ោះហើយយើងអាចយកចំណុចខ្លាំងមកអនុវត្ត ប៉ុន្តែត្រូវចៀសវាង ហើយនេះជាការណ៍មួយ សម្តេចធិបតីធ្លាប់លើកឡើងថា យ៉ាងច្បាស់ យើងគួរចៀសវាងយកគំរូប្រទេសណាមួយ ១០០ភាគរយ ឬ២០០ភាគរយ យកចំណុចខ្លាំងមកសិក្សា ហើយអនុវត្តតាម»។
លោកបានប្រៀបធៀបថា ប្រទេសសិង្ហបុរីតាំងពីបង្កើតរដ្ឋនៅឆ្នាំ១៩៦៥មក មិនដែលធ្លាប់ជួបនូវសង្គ្រាមនោះទេ សូម្បីតែអស្ថិរភាពនយោបាយក៏សិង្ហបុរី មិនដែលស្គាល់នោះដែរ។ បើប្រទេសនេះលង់ខ្លួនដូចកម្ពុជា ក្នុងសង្គ្រាមឥណ្ឌូចិនទី២ រួចហើយឆ្លងកាត់សង្គ្រាមឥណ្ឌូចិនទី៣ ហើយឆ្លងកាត់របបប្រល័យពូជសាសន៍ ម្ល៉េះនឹងខ្ទេចដូចកម្ពុជាអតីតកាលដែរ៕
