(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា កម្ពុជា-សិង្ហបុរី គោលបំណងធ្វើឱ្យភាពជាដៃគូមិត្តភាពរវាងប្រទសទាំងពីរ កាន់តែស៊ីជម្រៅ ខណៈដែលឆ្នាំក្រោយនេះ ជាខួបលើកទី៦០ឆ្នាំ នៃទំនាក់ទំនងការទូតរវាងប្រទេសទាំងពីរ។

ទំនាក់ទំនងការទូតរវាងកម្ពុជា-សិង្ហបុរី ត្រូវបានបង្កើតឡើងកាលពីថ្ងៃទី១០ ខែសីហា ឆ្នាំ១៩៩៥ ដែលរហូតមកដល់ពេលនេះរយៈពេល៥៩ឆ្នាំមកហើយ មុនពេលប្រទេសសិង្ហបុរីទទួលបានឯករាជ្យ លោក លី ក្វាន់យូ អតីតនាយករដ្ឋមន្រ្តីសិង្ហបុរី និងអតីតព្រះមហាក្សត្រ នរោត្តម សីហនុ បានផ្លាស់ប្តូរទស្សនកិច្ចទៅវិញទៅមក។ កម្ពុជាក៏ស្ថិតក្នុងចំណោមប្រទេសដំបូងគេ ដែលទទួលស្គាល់ឯករាជ្យភាពដ៏សំខាន់របស់ប្រទេសសិង្ហបុរីក្នុងឆ្នាំ១៩៦៥។

ថ្លែងក្នុងសន្និសីទរួមជាមួយ នាយករដ្ឋមន្រ្តីសិង្ហបុរី នៅថ្ងៃទី១៨ ខែមិថុនា ឆ្នាំ២០២៤ ម្សិលមិញនេះ សម្តេចបានលើកឡើងថា ជាច្រើនទសវត្សរ៍មកហើយ ទំនាក់ទំនងរបស់ប្រទេសទាំងពីរបានរីកចម្រើន និងមានភាពចម្រុះ។ ការផ្លាស់ប្តូរទស្សនកិច្ចជាទៀងទាត់រវាងថ្នាក់ដឹកនាំ និងមន្ត្រីរបស់ប្រទេសទាំងពីរ តែងតែត្រូវបានធ្វើឡើងរវាងប្រជាជនទាំងពីរ។ វិស័យទេសចរណ៍ និងការអប់រំ បានពង្រឹងការយល់ដឹង និងការសហការគ្នាទៅវិញទៅមក។

សម្តេចបានបញ្ជាក់ដូច្នេះថា៖ «នៅពេលដែលយើងខិតជិតដល់ខួបលើកទី៦០ នៃទំនាក់ទំនងការទូតរបស់យើង យើងមានមហិច្ឆតាពង្រីកការផ្លាស់ប្តូរទាំងនេះនៅទូទាំងវិស័យផ្សេងៗ»។

សិង្ហបុរី គឺជាដៃគូដ៏សំខាន់របស់កម្ពុជា លើវិស័យផ្សេងៗ រួមទាំងពាណិជ្ជកម្ម សេដ្ឋកិច្ច ហេដ្ឋារចនាសម្ព័ន្ធ ការអភិវឌ្ឍ និងទំនាក់ទំនងរវាងប្រជាជន និងប្រជាជន។

សម្តេចធិបតី បានបញ្ជាក់ទៀតថា៖ «ឆ្ពោះទៅមុខ យើងមានគោលបំណងធ្វើឱ្យភាពជាដៃគូនេះកាន់តែស៊ីជម្រៅ ដោយស្វែងរកមធ្យោបាយថ្មីៗ រួមទាំងក្នុងការអភិវឌ្ឍធនធានមនុស្ស សន្តិសុខស្បៀង សន្តិសុខថាមពល និងផ្នែកសំខាន់ៗផ្សេងទៀតដែលស្របតាមអាទិភាពរួមរបស់យើង និងសេចក្តីប្រាថ្នានាពេលអនាគត»។

សម្តេចបានថ្លែងអំណរគុណយ៉ាងជ្រាលជ្រៅចំពោះការរួមចំណែកយ៉ាងច្រើនរបស់រដ្ឋាភិបាលសិង្ហបុរី ក្នុងការអភិវឌ្ឍធនធានមនុស្សរបស់ប្រទេសកម្ពុជា ជាពិសេសតាមរយៈអាហារូបករណ៍ និងកម្មវិធីបណ្តុះបណ្តាលចម្រុះ ព្រមទាំងការថែទាំ និងសុខុមាលភាពដែលបានពង្រីកដល់កម្មកររបស់យើង។ មូលនិធិអន្តរជាតិសិង្ហបុរី ក៏បានចូលរួមចំណែកជាច្រើន តាមរយៈគម្រោងមនុស្សធម៌នៅក្នុងព្រះរាជាណាចក្រកម្ពុជា។

សម្តេចបានបញ្ជាក់ទៀតថា «យើងប្តេជ្ញារួមគ្នាបន្តកិច្ចខិតខំប្រឹងប្រែងក្នុងការធ្វើឱ្យកាន់តែស៊ីជម្រៅនូវភាពជាដៃគូសេដ្ឋកិច្ច ជំរុញសមាហរណកម្មក្នុងតំបន់ គាំទ្រសន្តិសុខ និងស្ថិរភាពក្នុងតំបន់ និងលើកកម្ពស់វិបុលភាព សុខុមាលភាព និងនិរន្តរភាពរបស់ប្រជាជនយើង និងលើសពីនេះទៀត»។

សម្តេចក៏ទន្ទឹងរង់ចាំទទួលលោកនាយករដ្ឋមន្ត្រីសិង្ហបុរី ក្នុងការមកបំពេញទស្សនកិច្ចនៅកម្ពុជា។ សម្តេចបញ្ជាក់ថា វត្តមានរបស់លោកគឺជាសក្ខីភាពមួយចំពោះភាពជាដៃគូដ៏យូរអង្វែងរបស់ប្រទេសទាំងពីរ និងការប្តេជ្ញាចិត្តរួមគ្នាក្នុងការកសាងភាពជាដៃគូសហប្រតិបត្តិការដ៏រឹងមាំ ដែលបំពេញតាមសេចក្តីប្រាថ្នារបស់ប្រទេសទាំងពីរ៕