(ពោធិ៍សាត់)៖ កម្លាំងចម្រុះរួមមាន ជំនាញរដ្ឋបាលព្រៃឈើពោធិ៍សាត់ នគរបាលប្រឆាំងបទល្មើសក្រសួងមហាផ្ទៃ ​ផ្នែកសឹករងខេត្ត និងអង្គការអភិរក្សធនធានធម្មជាតិ បានសហការគ្នាបង្រ្កាបរថយន្ត Camry ​១គ្រឿង ដឹកឈើគ្រញូងទម្ងន់ជិត ៦០០គីឡូក្រាម នាថ្ងៃទី១៦ ខែកញ្ញា ឆ្នាំ២០១៦នេះ នៅលើកំណាត់ផ្លូវជាតិលេខ៥៥ ស្ថិតក្នុងភូមិដប់បាត សង្កាត់លលក ក្រុងពោធិ៍សាត់ ខេត្តពោធិ៍សាត់។

លោក ងី វិរៈ នាយខណ្ឌរដ្ឋបាលព្រៃឈើពោធិ៍សាត់ បានប្រាប់អង្គភាព Fresh News ឲ្យដឹងថា ការបង្ក្រាបរថយន្តដឹកឈើគ្រញូង ជិត៦០០គីឡូក្រាមនាពេលនេះ ធ្វើឡើងដោយមានកិច្ចសហការពីកម្លាំងចម្រុះទើប​បង្រ្កាបបាន។ លោកនាយខណ្ឌបន្តថា ក្រោយមានការឃាត់រថយន្តដឹកឈើគ្រញូង ស្រាប់តែមានក្រុមមិនស្គាល់អត្តសញ្ញាណ​១ក្រុម ជិះរថយន្តម៉ាក ISUZU មួយបាំងកន្លះ​១គ្រឿង និងម៉ូតូ​១គ្រឿង បានមកស្ទាក់គ្រវែងដែកវែង ហើយបើករត់បាត់ ធ្វើឲ្យកម្លាំងសមត្ថកិច្ចរបួសម្នាក់ និងខូចរថយន្ត​១គ្រឿង នៅចំណុចផ្លូវជាតិលេខ៥ ស្ថិតក្នុងភូមិកំពែងស្វាយ ឃុំស្នាមព្រះ ស្រុកបាកាន ក្នុងគោលបំណងរំដោះរថយន្តដឹកឈើគ្រញូងនោះចេញ។

លោកនាយខណ្ឌបន្តទៀតថា វត្ថុតាងរថយន្ត​១គ្រឿង ម៉ាក Camry ពណ៌ស្ករ គ្មានស្លាកលេខ និងឈើគ្រញូងជិត ៦០០គីឡូក្រាម ត្រូវបានយកទៅរក្សាទុក នៅខណ្ឌរដ្ឋបាលព្រៃឈើពោធិ៍សាត់ ដើម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការបន្តតាមនីតិវិធី។

គួរបញ្ជាក់ថាម្ចាស់រថយន្ត Camry ដឹកឈើនោះ ត្រូវបានគេស្គាល់ឈ្មោះ រាក់ ជាឈ្មួញរកស៊ីដឹកជញ្ជូនឈើ រស់នៅភូមិដប់បាត សង្កាត់លលកស ក្រុងពោធិ៍សាត់ រីឯឈ្មួញចាំទទួលរកស៊ីដុះស្លែនោះ ឈ្មោះ ពៅ រស់នៅភូមិកំពែងស្វាយ ឃុំស្នាមព្រះ ស្រុកបាកាន ខេត្តពោធិ៍សាត់៕