(វ៉ាស៊ីតោន)៖ លោក សាយ សំអាល់ រដ្ឋមន្ត្រីក្រសួងបរិស្ថាន បានបញ្ជាក់ប្រាប់អន្តរជាតិថា រាជរដ្ឋាភិបាលកម្ពុជា បាននិងកំពុងអនុវត្តកម្មវិធីកំណែទម្រង់ស៊ី ជម្រៅក្នុងវិស័យបរិស្ថាន​ ដើម្បីលើក កម្ពស់កិច្ចគាំពារបរិស្ថាន​ ការគ្រប់គ្រងធនធានធម្មជាតិ ការអភិរក្សជីវៈចម្រុះ​ និងការអភិវឌ្ឍដោយចីរភាព​ ដែលរួមចំណែកយ៉ាងសំខាន់ ដល់ការធានាសុវត្ថិភាពសមុទ្រ​ និងតំបន់ឆ្នេរ។

លោកបានបន្តថា «ជាក់ស្តែង​ រាជរដ្ឋាភិបាលបានដាក់ចេញនូវបទបញ្ជា០១ នៅខែឧសភា​ ឆ្នាំ២០១២​ ការត្រួតពិនិត្យ និងវាយតម្លៃគម្រោងវិនិយោគអភិវឌ្ឍន៍សម្បទានដីសេដ្ឋកិច្ច ការបង្រ្កាបបទល្មើស ព្រៃឈើ ការកែសម្រួលតួនាទីភារកិច្ច ពាក់ព័ន្ធនឹងការងារអភិរក្សនិងអភិវឌ្ឍន៍ ការបង្កើតឧទ្យានសមុទ្រនិងតំបន់ការពារថ្មីៗនៅតាមតំបន់ឆ្នេរ ការពង្រឹងសមត្ថភាពស្ថាប័ន ការរៀបចំក្រមបរិស្ថានការរៀបចំ យុទ្ធសាស្ត្រនិងផែនការសកម្មភាពបរិស្ថានជាតិ ការផ្ទេរមុខងារគ្រប់គ្រងបរិស្ថាន ទៅឱ្យរដ្ឋបាលថ្នាក់ក្រោមជាតិ ការចូលជាសមាជិកនៃមជ្ឈមណ្ឌលជីវៈចម្រុះអាស៊ាន និងពិធីសារណាហ្គោយ៉ាការកែលម្អ ប្រព័ន្ធចុះបញ្ជីនាវា និងការរៀបចំផ្តល់សច្ចាប័នដល់កិច្ចព្រមព្រៀង​ ទីក្រុងប៉ារីស ស្តីពីការប្រែប្រួលអាកាសធាតុ»។

លោក សាយ សំអាល់ បានបញ្ជាក់បែបនេះ ខណៈលោកចូលរួមថ្លែងសុន្ទរកថានៅក្នុងសន្និសីទ «មហាសមុទ្រយើងលើកទី៣» ដែលបានប្រព្រឹត្ត ទៅនៅថ្ងៃទី១៥ ខែកញ្ញា ឆ្នាំ២០១៦ នៅទីក្រុងវ៉ាស៊ីតោន សហរដ្ឋអាមេរិក។

ជាមួយគ្នានោះ រដ្ឋមន្ត្រីក្រសួងបរិស្ថាន ក៏បានអំពាវនាវឱ្យប្រទេសទាំងអស់​ នៅក្នុងពិភពលោកបង្កើនការប្តេជ្ញាចិត្តបន្ថែមទៀត ក្នុងការដោះស្រាយបញ្ហាប្រឈមជាសកលទាំងនេះ តាមរយៈការពង្រឹង កិច្ចសហប្រតិបត្តិការអន្តរជាតិ ការផ្តល់ហិរញ្ញប្បទាន​ និងការផ្ទេរបច្ចេកវិទ្យាដល់បណ្តាប្រទេសកំពុងអភិវឌ្ឍ ការបង្កើតយន្តការរួមគ្នាដើម្បីតាមដានការអនុវត្តច្បាប់ និងវឌ្ឍនភាពការងារ។

គួរបញ្ជាក់ថា សន្និសីទនេះមានអ្នកចូលរួមប្រមាណ៥០០ នាក់មកពីបណ្តាប្រទេសទូទាំងពិភពលោក និងអង្គការអន្តរជាតិពាក់ព័ន្ធ ហើយបានទទួលការស្វាគមន៍ពីលោក John Kerry រដ្ឋមន្ត្រីក្រសួង ការបរទេសសហរដ្ឋអាមេរិក និងការថ្លែងសុន្ទរកថាគន្លឹះរបស់លោក Barack Obama ប្រធានាធិបតីសហរដ្ឋអាមេរិក ព្រមទាំងបទអន្តរាគមន៍ និងបទបង្ហាញសំខាន់ៗ ពីតំណាងប្រទេស​ និងអង្គការ​ក៏ ដូចជា សកម្មជនបរិស្ថានជាច្រើនរូបទៀត។

នៅវេលាថ្ងៃត្រង់នេះដែរ​ លោក រដ្ឋមន្ត្រី​ និងសមាជិកគណៈប្រតិភូ ក៏បានចូលរួមពិសារអាហារថ្ងៃត្រង់ នៅទីស្នាក់ការកណ្តាលរបស់អង្គការអភិរក្សអន្តរជាតិ​ ដោយមានការអញ្ជើញចូលរួមពីថ្នាក់ដឹកនាំ ស្ថាប័នរដ្ឋាភិបាលសហរដ្ឋអាមេរិក​ និងអង្គការពាក់ព័ន្ធនានា​ផងដែរ៕