​(ប៉ារីស)៖ អាជ្ញាធរបារំាងបានឱ្យដឹងថា ក្រុមបាតុករយ៉ាងហោចណាស់ ៦២នាក់ ត្រូវបានឃាត់ខ្លួន ដោយក្នុងនោះមាន ៣២នាក់ត្រូវបានឃុំខ្លួនបណ្ដោះអាសន្ន នៅក្រោយពេលអំពើហិង្សាផ្ទុះឡើងរវាង ក្រុមបាតុករនិងប៉ូលិស នៅទីក្រុងប៉ារីស ក្នុងបាតុកម្មតវ៉ាទាមទារឱ្យមានការធ្វើ វិសោធនកម្ម ច្បាប់ការងារថ្មី (El-Khomri) ដែលទើបតែត្រូវបានប្រកាសចេញកាលពីថ្ងៃទី០៨ ខែ សីហា កន្លងទៅនេះ។  នេះបើយោងតាមការចុះផ្សាយ របស់សារព័ត៌មានបារំាង Le Figaro​ នៅព្រឹកថ្ងៃសុក្រ ទី១៦​ ខែកញ្ញា ឆ្នាំ ២០១៦។

សារព័ត៌មានបានបន្តទៀតថា មនុស្សជាង ១៣,០០០ នាក់បានចូលរួមក្នុងបាតុកម្មតវ៉ានេះ ​​និង ៤០,០០០នាក់ ជាតួរលេខដែលត្រូវបានផ្ដល់ដោយក្រុមសហជីព CGT​។ ដោយឡែកទាក់ទិននឹង បាតុកម្មតវ៉ានេះដែរ រដ្ឋមន្ត្រីមហាផ្ទៃបារំាង លោក Bernard Cazeneuve បាននិយាយនៅក្នុង សេចក្ដីប្រកាសព័ត៌មានថា«គិតចាប់តំាងពីមាន បាតុកម្មតវ៉ាប្រឆំាងនឹងច្បាប់ការងារមក ប៉ូលិសនិង កងកម្លាំងរក្សាសណ្ដាប់ធ្នាប់ជាង ៦២០ នាក់បានរងបួស​ ហើយបាតុកម្មតវ៉ានៅលើកនេះបានបង្ក ឱ្យប៉ូលិស ១៥នាក់ និង បាតុករបួននាក់បានរងរបួស​ ខណៈអំពើហិង្សានេះជារឿងដែលមិនអាច ទទួលយកបាននោះទេ ទើបជម្រុញឱ្យអាជ្ញាធរ ចាប់ខ្លួនមនុស្ស៦២នាក់ ក្នុងនោះ៣២នាក់ត្រូវឃុំខ្លួនបណ្ដោះអាសន្ន»។  

គួរបញ្ជាក់ថាតាមការលើកឡើងរបស់លោក Cazeneuve ថា លោកពិតជាមានការសោកស្ដាយ ដែលអំពើហិង្សាជាច្រើនលើកបានកើតឡើង នៅក្នុងទីក្រុងប៉ារីស រួមទំាងទីក្រុង ណង់រូអង់ ទូលូ និង ទីក្រុងម៉ង់ពើលីយ៉េ ជាដើម៕