(កំពត)៖ លោក ម៉ៅ ធនិន អភិបាលខេត្តកំពត បានស្នើឱ្យក្រុមប្រឹក្សា និងអាជ្ញាធរស្រុក បំពេញភារកិច្ច តួនាទីក្នុងការធានានូវភាពសុខដុមរម្យនា និងភាពកក់ក្តីអចិន្ត្រៃ ជូនពលរដ្ឋក្នុងមូលដ្ឋាន។

ការស្នើបែបនេះ ខណៈលោក តាក់ ហាប់ ប្រធានក្រុមប្រឹក្សាខេត្ត និងលោកអភិបាលខេត្តកំពត ម៉ៅ ធនិន ចូលរួមជាអធិបតីក្នុងពិធីប្រកាសចូលកាន់មុខតំណែង ក្រុមប្រឹក្សាស្រុកអង្គរជ័យ និងស្រុកបន្ទាយមាស អាណត្តិទី៤ នាថ្ងៃទី១១ ខែមិថុនា ឆ្នាំ២០២៤។

លោកអភិបាលខេត្តកំពត បានលើកបញ្ជាក់ទៀតថា តួនាទីដែលមន្ត្រីទទួល គឺជាអំរែក ហើយតួនាទីដែលបានមកនាពេលនេះ គឺកើតឡើងដោយសារការស្រឡាញ់ពេញចិត្តតាមរយៈសន្លឹកឆ្នោតគាំទ្រពីសំណាក់ប្រជាពលរដ្ឋ។ ដូច្នេះក្រុមប្រឹក្សាស្រុក ដែលទើបតែងតាំងថ្មី ក៏ដូចជាអាជ្ញាធរស្រុក ត្រូវតែប្រើប្រាស់តួនាទីភារកិច្ចនេះឱ្យបានត្រឹមត្រូវ ដើម្បីផ្តល់ភាពកក់ក្តៅ និងបម្រើផលប្រយោជន៍ជូនប្រជាពលរដ្ឋក្នុងមូលដ្ឋាន ដែលជាម្ចាស់សន្លឹកឆ្នោតវិញ។

លោកអភិបាលខេត្ត បន្តថា ក្នុងនាមជាអ្នកបម្រើប្រជាពលរដ្ឋ យើងមិនត្រូវយកតួនាទីដែលទទួលបានពីប្រជាពលរដ្ឋ ទៅគាបសង្កត់ កេងប្រវ័ញ្ច ឬរំលោភបំពានលើពលរដ្ឋនោះទេ ព្រោះកត្តាទាំងនោះ ធ្វើឱ្យពលរដ្ឋបាត់បង់ទំនុកចិត្ត ចំពោះការដឹកនាំរបស់រាជរដ្ឋាភិបាល។

អភិបាលខេត្ត ក៏បានជំរុញឱ្យក្រុមប្រឹក្សាដែលទើបតែងតាំងថ្មី និងអាជ្ញាធរដែនដីគ្រប់លំដាន់ថ្នាក់ក្នុងស្រុក ត្រូវរួមសហការគ្នាឱ្យបានស្អិតរមួតក្នុងការបម្រើប្រជាពលរដ្ឋ ដោយក្តីពេញចិត្ត ចេញពីបេះដូង ពិសេសត្រូវចុះឱ្យ បានដល់ខ្នងផ្ទះ ប្រជាពលរដ្ឋក្នុងមូលដ្ឋានរបស់ខ្លួន ដើម្បីបានដឹងពីសុខទុក្ខ និងតម្រូវការជាក់ស្តែងរបស់ពួកគាត់ និងត្រូវដោះស្រាយរាល់បញ្ហា សំណើរ សំណូមពរផ្សេងៗ ឱ្យបានទាន់ពេលវេលា ដោយមានចិត្តគិតគូរឿងសុខទុក្ខ និងផលប្រយោជន៍ប្រជាពលរដ្ឋជាធំ។

សូមបញ្ជាក់ថា ពិធីប្រកាសចូលកាន់តំណែងក្រុមប្រឹក្សាស្រុកនាពេលនេះ សម្រាប់ស្រុកអង្គរជ័យ មានប្រធាន និងសមាជិកក្រុមប្រឹក្សាចំនួន១៩នាក់ ចំណែកស្រុកបន្ទាយមាសមានប្រធាន និងសមាជិកក្រុមប្រឹក្សាចំនួន ១៩នាក់ ដែលពិធីប្រកាសនេះបានធ្វើឡើងក្នុងបរិវេណសាលាស្រុកទាំងពីរ៕