(ភ្នំពេញ)៖ ក្រុមសហជីពមួយចំនួននៅកម្ពុជា បានសម្តែងការព្រួយបារម្ភ ចំពោះការលូកដៃរបស់អ្នកនយោបាយ ទៅក្នុងការចរចាតំឡើងប្រាក់ខែដល់កម្មករ-កម្មការិនី ដែលកំពុងប្រព្រឹត្តិនៅអំឡុងខែកញ្ញានេះ។

ការព្រួយបារម្ភ របស់ក្រុសហជីព នាពេលនេះ បានធ្វើឡើង ក្រោយពេលដែល លោក សម រង្ស៊ី ប្រធានគណបក្សសង្រ្គោះជាតិ បានបង្ហោះម្តងហើយម្តងទៀត នៅតាម Facebook ដោយបានអំពាវនាវ ឲ្យកម្មករ-កម្មការិនី ទាមទារតំឡើងប្រាក់ខែគោល ឲ្យបាន១៨០ដុល្លារ ក្នុងមួយខែ សម្រាប់ឆ្នាំ២០១៧ ខាងមុខនេះ។

លោក សោម អូន ប្រធានសហជីពជាតិកម្ពុជា បានប្រាប់អង្គភាព Fresh News នៅរសៀលថ្ងៃទី១៥ ខែកញ្ញា ឆ្នាំ២០១៦នេះថា អ្នកនយោបាយមិនគួរលូកដៃរឿងដំឡើងប្រាក់ខែកម្មករឡើយ។ លោកបន្តថា មូលហេតុដែលអ្នកនយោបាយមិនគួរលូកដៃ ដោយសារតែ អ្នកនយោបាយ គ្មានបច្ចេកទេសច្បាស់លាស់ ក្នុងការដំឡើងប្រាក់ខែ ទី២ គ្មានជំនាញ និងទី៣ អ្នកនយោបាយ មិនមែនជា ភាគីពាក់ព័ន្ធ។

ចំណែក លោក ហ្វា សាលី ប្រធានសហព័ន្ធសហជីពជាតិ បានបញ្ជាក់ឲ្យដឹងថា លោកពិតជាមានការព្រួយបារម្ភយ៉ាងខ្លាំងហើយនឹងមិនគាំទ្រដាច់ខាតដែលអ្នកនយោបាយ លូកដៃចូលក្នុងការចរចាតំឡើងប្រាក់ឈ្នួលដល់កម្មករ កម្មការិនី។ លោកបន្តថា អ្នកនយោបាយជាពិសេស គណបក្សប្រឆាំងមិនគួរកេងចំណេញនយោបាយរបស់ខ្លួនដោយការអំពាវនាវឲ្យ កម្មករតវ៉ា ឫធ្វើបាតុកម្មឡើយ។ បើសិនជា កម្មករ-កម្មការិនី តវ៉ាទាមទារតំឡើងប្រាក់ខែ តាមការអំពាវនាវរបស់ ថ្នាក់ដឹកនាំគណបក្សប្រឆាំង នឹងធ្វើឲ្យអ្នកវិនិយោគិនដែលចង់បណ្តាក់ទុន នៅកម្ពុជាផ្លាស់ប្តូរចិត្តទៅវិនិយោគនៅប្រទេសដទៃវិញ។

នៅលើទំព័រ Facebook លោក សម រង្ស៊ី ប្រធានគណបក្សសង្រ្គោះជាតិ នាពេលនេះ កំពុងបង្ហោះ ជំរុញឱ្យកម្មករទាមទារប្រាក់ឈ្នួល ១៨០ដុល្លារ សម្រាប់ឆ្នាំ២០១៧ ខណៈដែលភាគីពាក់ព័ន្ធ ក្នុងការចរចាប្រាក់ឈ្នួល ចាប់ផ្តើមពិភាក្សាអំពីការដំឡើង ប្រាក់ឈ្នួលអប្បបរមាដល់កម្មករកាត់ដេរកម្ពុជា។ លោក សម រង្ស៊ី ដែលកំពុងនិរទេសខ្លួន បានចាត់ទុកថា ទាល់តែមានប្រាក់ឈ្នួល ១៨០ដុល្លារ ទើបជីវភាពរបស់កម្មករបានប្រសើរឡើង។

កាលពីឆ្នាំ២០១៣ ថ្នាក់ដឹកនាំគណបក្សសង្រ្គោះជាតិ ក៏ធ្លាប់បានញុះញង់ឲ្យកម្មករ កម្មការិនី ទាមទារប្រាក់ខែរបស់ខ្លួន ១៦០ដុល្លារផងដែរ ដែលធ្វើឱ្យ ការចរចាតំឡើងប្រាក់ខែរបស់កម្មករ កម្មការិនី កាលនោះ បានអូសបន្លាយពេលយូរខែ ហើយមានបាតុកម្មជាច្រើនលើកច្រើនសារ៕