(ភ្នំពេញ)៖ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំងលោក ប្រាងហង្ស សេរីរិទ្ធ ជានាយកវិទ្យាស្ថានតេជោសែន សាធារណការ និងដឹកជញ្ជូន។
ព្រះរាជក្រឹត្យត្រាស់បង្គាប់តែងតាំង ត្រូវបានធ្វើឡើងកាលពីថ្ងៃទី១ ខែមិថុនា ឆ្នាំ២០២៤កន្លងទៅនេះ។
លោក ប្រាងហង្ស សេរីរិទ្ធ ជាបញ្ញវន្តខ្មែរមួយរូប ដែលបញ្ចប់ការសិក្សាថ្នាក់បរិញ្ញាបត្រជាន់ខ្ពស់នៅចក្រភពអង់គ្លេស។ លោក ប្រាងហង្ស សេរីរិទ្ធ បានកាន់តួនាទីជានាយករងវិទ្យាស្ថានតេជោសែន សាធារណការ និងដឹកជញ្ជូនច្រើនឆ្នាំមកហើយ។
លោក សេរីរិទ្ធី ក៏ធ្លាប់បានបំពេញតួនាទីជាប្រធាននាយកដ្ឋាន នៅអគ្គនាយកដ្ឋានភស្តុភារកម្មផងដែរ។
បន្ថែមពីលើតួនាទីខាងលើ លោកក៏ជាជាប្រធានក្រុមការងារសហភាពសហព័ន្ធយុវជនកម្ពុជា ប្រចាំវិទ្យាស្ថានតេជោសែនសាធារណការ និងដឹកជញ្ជូន ហើយក៏ជាប្រធានក្រុមរដ្ឋបាលយុវជនបក្សប្រចាំខេត្តអ៊ុនតារីយ៉ូ ប្រទេសកាណាដាផងដែរ។
សូមបញ្ជាក់ថា វិទ្យាស្ថានតេជោសែន សាធារណការ និងដឹកជញ្ជូន គឺជាគ្រឹះស្ថានឧត្តមសិក្សាសាធារណៈមួយស្ថិតក្រោមការគ្រប់គ្រងរបស់ក្រសួងសាធារណការ និងដឹកជញ្ជូន។ វិទ្យាស្ថាន បានទទួលនិស្សិតចូលសិក្សានៅឆ្នាំ២០២១។
វិទ្យាស្ថានតេជោសែនសាធារណការ និងដឹកជញ្ជូន ត្រូវបានបង្កើតឡើងក្នុងគោលបំណងបណ្តុះបណ្តាលធនធាន មនុស្ស ប្រកបដោយជំនាញច្បាស់លាស់ ចំណេះដឹងទូលំទូលាយ និងមានសីលធម៌ អត្តចរិក ចរិយាសម្បត្តិត្រឹមត្រូវ ដើម្បីដោះស្រាយបញ្ហាវិបត្តិកង្វះអ្នកជំនាញបច្ចេកទេស ក្នុងវិស័យសាធារណការ និងដឹកជញ្ជូន នាពេលបច្ចុប្បន្ន និងទៅអនាគត សំដៅចូលរួមចំណែក អភិវឌ្ឍសេដ្ឋកិច្ច និងសង្គមជាតិ (ជំនាញ ចំណេះដឹង និងសីលធម៌)។
វិទ្យាស្ថាននេះ កំពុងបណ្តុះបណ្តាលនិស្សិតលើជំនាញចំនួន ០៦ រួមមាន៖ ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ, ជំនាញប្រព័ន្ធចម្រោះទឹកកខ្វក់, ជំនាញសេដ្ឋកិច្ច និងគ្រប់គ្រងការដឹកជញ្ជូនផ្លូវគោក, ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់, ជំនាញបើកបរនាវា និងជំនាញម៉ាស៊ីននាវា៕
