(ភ្នំពេញ)៖ អយ្យការអមសាលាដំបូងរាជធានីភ្នំពេញ បានសេចក្តីប្រកាសព័ត៌មានស្តីពី ការចោទប្រកាន់លើជនសង្ស័យចំនួន ៦នាក់ ពាក់ព័ន្ធនឹងគ្រឿងញៀនប្រមាណ ១គីឡូក្រាម ពីបទជួញដូរ និងរក្សាទុកដោយខុសច្បាប់នូវសារធាតុញៀន បទល្មើសព្រហ្មទណ្ឌ និងត្រូវផ្តន្ទាទោសតាមបញ្ញត្តិមាត្រា ៤០ មាត្រា ៤៨ នៃច្បាប់ស្តីពីការត្រួតពិនិត្យគ្រឿងញៀន។

នៅក្នុងសេចក្តីប្រកាសព័ត៌មានរបស់អយ្យការអមសាលាដំបូងរាជធានីភ្នំពេញ ដែលបណ្តាញព័ត៌មាន Fresh Newsទទួលបាននៅល្ងាចថ្ងៃទី០៦ ខែមិថុនា ឆ្នាំ២០២៤នេះ បានឱ្យដឹងថា កាលពីថ្ងៃទី៣១ ខែឧសភា ឆ្នាំ២០២៤ សមត្ថកិច្ចនៃការិយាល័យប្រឆាំងគ្រឿងញៀន កងរាជអាវុធហត្ថ រាជធានីភ្នំពេញ បានបង្ក្រាបករណីគ្រឿងញៀននៅចំណុចទីតាំងទី១ លើផ្លូវបេតុង ភូមិទ្រា សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។ ទីតាំងទី២ នៅចំណុចបន្ទប់លេខ១១ ផ្ទះសំណាក់ដំរីឆ្លាត ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ ទីតាំងទី៣ នៅចំណុចបន្ទប់ជួលលេខ ០៥B ជាន់ទី៤ ផ្លូវបេតុង ភូមិអ័រគីដេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ទីតាំងទី៤ នៅចំណុចមុខបន្ទប់ជួល ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ និងទីតាំងទី៥ នៅចំណុចផ្ទះជួលលេខ៣៦C ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។

ក្នុងរង្វង់ប្រតិបត្តិការ សមត្ថកិច្ចបានឃាត់ខ្លួនជនសង្ស័យចំនួន០៦ នាក់ និងដកហូតវត្ថុតាងពីជនសង្ស័យដូចជា៖ ឈ្មោះ ម៉ង់ រិទ្ធី ហៅ ធី ភេទប្រុស អាយុ៣១ឆ្នាំ, ឈ្មោះ ហម ចាន់លាភ ហៅ យ៉ា ភេទស្រី អាយុ៣២ឆ្នាំ, ឈ្មោះ សុខ រដ្ឋា ហៅណូ ភេទប្រុស អាយុ៣២ឆ្នាំ, ឈ្មោះ សយ សោភ័ណ្ឌ ហៅ ប៊ី ភេទប្រុស អាយុ ៤៤ឆ្នាំ, ឈ្មោះ គាត សុផាត ហៅថាច់ ភេទប្រុស អាយុ១៨ឆ្នាំ និងឈ្មោះ លឹម កុយ ហៅ មាន់ ភេទប្រុស អាយុ២៦ឆ្នាំ។

ក្នុងប្រតិបត្តិការនេះ បានរកឃើញនូវសារធាតុញៀនជាក្រាមពណ៌សថ្លាចំនួន ២០កញ្ចប់ ប្រភេទ មេតំហ្វេតាមីន ទម្ងន់ ៨៧.៤៤ ក្រាម ម្សៅកញ្ចប់ Grape Fruit Tea ចំនួន ៣៧ កញ្ចប់ ទម្ងន់ ៣៣៧.៤១ ក្រាម ម្សៅពណ៌ស ចំនួន ០៨ កញ្ចប់ ទម្ងន់ ១៥៤.២៩ក្រាម ជាប្រភេទ កេតាមីន ម្សៅកញ្ចប់រូបផ្លែ ត្របែក ចំនួន ២៣ កញ្ចប់ទម្ងន់១៩៩.៩៩ ក្រាម និងម្សៅកញ្ចប់ពណ៌ខ្មៅ ចំនួន ១៨កញ្ចប់ ទម្ងន់ ២៧៣.២៩ ក្រាម ជាប្រភេទ កេតាមីន និងប្រភេទ ហេរ៉ូអ៊ុន។

បន្ទាប់ពីបញ្ចប់ប្រតិបត្តិការនេះ សមត្ថកិច្ចបានកសាងសំណុំរឿង និង បញ្ជូនជនសង្ស័យទាំង០៦នាក់ខាងលើមកកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី។ ចំណែកឯបក្ខពួកដែលពាក់ព័ន្ធនឹងករណីគ្រឿងញៀនខាងលើសមត្ថកិច្ចបាននឹងកំពុងស្រាវជ្រាវបន្ត៕