(អាមេរិក)៖ ខណៈដែលសហរដ្ឋអាមេរិក កំពុងទន្ទឹងរងចាំព្រឹត្តការណ៍បោះឆ្នោតជ្រើសរើសប្រធានាធិបតី ដែលនឹងប្រព្រឹត្តទៅនៅខែវិច្ឆិកាខាងមុខនេះ បេក្ខជនប្រធានាធិបតីពីររូប គឺលោក Donald Trump ដែលមកពីបក្សសាធារណរដ្ឋ និងលោកស្រី Hillary Clinton ដែលមកពីបក្សប្រជាធិបតេយ្យ កំពុងប្រណាំងប្រជែងគ្នាដើម្បីទាក់ទាញសន្លឹកឆ្នោត។ ក្នុងនោះដែរយើងសង្កេតឃើញថា លោក Donald Trump ហាក់មានភាពលេចធ្លោ និងកំពុងទទួលបានប្រជាប្រិយភាពជាខ្លាំង ជាពិសេសលើគោលនយោបាយប្លែកៗរបស់លោកផ្ទាល់តែម្តង រហូតមានការចោទជាសំណួរថាតើ ឥរិយាបទ និងគោលនយោបាយថ្មីៗរបស់លោកTrump អាចឲ្យយកឈ្នះលើស្ត្រីជើងខ្លាំង Hillary Clinton បានដែរឬទេ? ខាងក្រោមនេះជាព័ត៌មានលម្អិតរបស់បេក្ខជនប្រធានាធិបតីរូបនេះ៖
ព័ត៌មានទូទៅ៖
• ទីកំនើត៖ កើតនៅទីក្រុង ញ៉ូវយ៉ក សហរដ្ឋអាមេរិក ថ្ងៃទី១៤ ខែមិថុនា ឆ្នាំ១៩៤៦ បច្ចុប្បន្នមានវ័យ៧០ឆ្នាំ
• ទីលំនៅបច្ចុប្បន្ន៖ ទីក្រុង ញ៉ូវយ៉ក
• មុខរបរ៖ ពាណិជ្ជករ តួអង្គល្បីក្នុងកម្មវិធីទូរទស្សន៍ និងអ្នកនយោបាយ
• បក្សនយោបាយ៖ បក្សសាធារណរដ្ឋ (ពីឆ្នាំ១៩៨៧-១៩៨៨ ពីឆ្នាំ២០០៩ដល់២០១១ ពីឆ្នាំ២០១២ដល់បច្ចុប្បន្ន) បក្សឯករាជ្យ (ពីឆ្នាំ២០១១ដល់២០១២) បក្សប្រជាធិបតេយ្យ (ឆ្នាំ១៩៨៧ ឆ្នាំ២០០១ដល់ឆ្នាំ២០០៩) បក្សកំណែទម្រង់ (ពីឆ្នាំ១៩៩៩ដល់២០០១)។
• ភរិយា និងកូន៖ លោកស្រី Ivana Zelnickova (រៀបការពីឆ្នាំ១៩៧៧ដល់១៩៩១មានកូនបីនាក់ គឺ លោក Donald Trump Jr. នាង Ivanka Trump លោក Eric Trump) លោកស្រី Marla Maples (រៀបការពីឆ្នាំ១៩៩៣ដល់ឆ្នាំ១៩៩៩មានកូនស្រីម្នាក់គឺអ្នកនាងTiffany Trump) លោកស្រី Melania Knauss (រៀបការនៅឆ្នាំ២០០៥ដល់បច្ចុប្បន្នមានកូនម្នាក់គឺ Barron Trump) និងមានចៅប្រាំបីនាក់។
• ឪពុកម្តាយ៖ លោក Fred Trump និងលោកស្រី Mary Anne MacLeod
• ខ្សែស្រឡាយ៖ លោក Trump មានឳពុកកាត់អាឡឺម៉ង់ ចំណែកម្តាយកាត់ជនជាតិស្កត់ឡែន។ ជីដូនជីតា ទាំងសងខាងសុទ្ធតែកើតនៅក្រៅដែនដីសហរដ្ឋអាម៉េរិក។
លោក Donald John Trump ជាកូនទីពីរក្នុងចំណោមកូន៥នាក់របស់អ្នកស្រី Mary និងលោក Fred Trump។ បងប្អូនទាំងអស់សុទ្ធតែនៅមានជីវិត លើកលែងតែបងប្រុសបង្អស់គឺលោក Fred Jr. បានស្លាប់ក្នុងឆ្នាំ១៩៨១ដោយសារជាតិអាកុល។ ចំណុចនេះហើយដែលធ្វើឲ្យលោក Trump ស្បថខ្លួនឯងថាលោកនឹងមិនប៉ះពាល់ជាតិអាកុល និងបារីឡើយ។ ដោយសារមានបញ្ហាផ្នែកឥរិយាបទ លោក Trump បានឈប់រៀនតាំងពីអាយុ១៣ឆ្នាំ និងចុះឈ្មោះចូលរៀននៅសាលាយោធាក្នុងទីក្រុងញ៉ូវយ៉ក ព្រមទាំងចូលរួមធ្វើសមយុទ្ធ ពាក់ឯកសណ្ឋាន និងទទួលបានតួនាទីជាកាពីតែនថែមទៀតផង។ ឪពុករបស់លោកបានប្រាប់អ្នកសារព័ត៌មានថា លោកជាមនុស្សម្នាក់ដែលមានចរិតគ្រោតគ្រាតតាំងពីតូចមក។
លោក Trump បានចូលសិក្សានៅសកលវិទ្យាល័យ Fordham អស់រយៈពេលពីរឆ្នាំ ក្រោយមកត្រូវបានផ្ទេរទៅសាលា Wharton សិក្សាផ្នែកហិរញ្ញវត្ថុ និងពាណិជ្ជកម្ម នៅសកលវិទ្យាល័យ Pennsylvania ដែលផ្តល់ការបង្រៀនផ្នែកអចលនាទ្រពនៅសហរដ្ឋអាមេរិក។ ខណៈកំពុងសិក្សា លោកបានធ្វើការនៅក្រុមហ៊ុន មានលក្ខណៈជាក្រុមគ្រួសារមួយដែលមានឈ្មោះថា Elizabeth Trump & Son ជាឈ្មោះរបស់ជីដូនជីតាខាងឪពុករបស់លោក។ លោក Trump បញ្ចប់ការសិក្សាពីសាលា Wharton កាលពីខែឧសភា ឆ្នាំ១៩៦៨ ផ្នែកវិទ្យាសាស្ត្រ និងសេដ្ឋកិច្ច។ ក្នុងឆ្នាំ១៩៩៨ បន្ទាប់ពីលែងលះជាមួយភរិយាពីរនាក់មក លោក Trump ក៏ចាប់ផ្តើមទំនាក់ទំនងជាមួយនាង Melania Knauss ដែលជាតារាបង្ហាញម៉ូត និងជាជនជាតិស្លូវ៉ានី ដែលបច្ចុប្បន្នជាភរិយាទីបីរបស់លោក។ តាមសារព័ត៌មានមួយបានបង្ហើបឲ្យដឹងថា ភរិយារបស់លោកធ្លាប់ធ្វើជាស្ត្រីលក់ខ្លួនម្នាក់តែមិនបើកចំហនោះទេ។ ក្រោយមកពួកគេបានបង្កើតបានកូនប្រុសម្នាក់ មានឈ្មោះថា Barron William Trump ដែលក្រោយមកលោក Trump បានប្រើប្រាស់ ឈ្មោះនេះដាក់ជាឈ្មោះអាជីវកម្មថ្មីរបស់លោកថែមទៀតផង។
បេក្ខជនប្រធានាធិបតីរូបនេះ ជាមនុស្សដែលមានភាពខ្ពើមរអើមច្រើន ហេតុនេះលោកមិនចូលចិត្តវប្បធម៌ចាប់រលាក់ដៃឡើយ។ ក្នុងកម្មវិធី The Howard Stern Show លោក Trump បានពិភាក្សាជាមួយលោក Stern ពីហនីភ័យដែលបណ្តាលមកពីការឆ្លងរោគក្នុងពេលណាត់ជួបគ្នា។ លោក Trump បានក៏បានបង្ហាញពីបទពិសោធន៍ក្នុងទំនាក់ទំនងជាមួយស្ត្រីផ្សេងៗ។ លោកធ្លាប់មានពាក្យចចាមរ៉ាមថា បានណាត់ជួបជាមួយតារាម៉ូដែលល្បីៗដូចជា នាង Carla Bruni នាង Kara Young តាំងពីពាក់កណ្តាលរហូតដល់ចុងទសវត្សរណ៍ឆ្នាំ១៩៩០ តែត្រូវនាងបដិសេធថាបានជួបលោក Trump តែម្តងប៉ុណ្ណោះ។ លោកក៏បានអះអាងថាធ្លាប់បានជូនព្រះនាង Diana ជាមួយនឹងបាច់ផ្កាដ៏មានតម្លៃថ្លៃផងដែរ បន្ទាប់ពីព្រះនាងលែងលះពីព្រះអង្គម្ចាស់ Charles។
* ការប្រឡូងនយោបាយជាលើកដំបូង៖
លោក Trump តែងតែផ្លាស់ប្តូរគោលនយោបាយរបស់ខ្លួនជាច្រើនលើកច្រើនសារ និងផ្ទុយគ្នាពីមួយពេលទៅមួយពេល។ សារព័ត៌មាន Politifact ធ្លាប់បានរាប់ពីចំនួនដងនៃការនិយាយស្តីរបស់លោក Trump ហើយបានឲ្យដឹងថា រឿងខ្លះលោកធ្លាប់បាននិយាយ១៧ដង ប៉ុន្តែបន្ទាប់មកលោកបដិសេធថាខ្លួនមិនបាននិយាយក៏មាន។ លោក Trump ធ្លាប់បានបង្ហាញការចាប់អារម្មណ៍ក្នុងការឈរឈ្មោះបោះឆ្នោតជាលើកដំបូងតាំងពីឆ្នាំ១៩៨៧មកម្ល៉េះ ដោយលោកបានចំណាយប្រាក់រហូតដល់១០០ពាន់ដុល្លារ ដើម្បីចុះផ្សាយអត្ថបទលើសារព័ត៌មានរិះគន់ទៅលើគោលនយោបាយការពារជាតិសហរដ្ឋអាមេរិក ក្នុងកាសែតមួយចំនួន។ លោកបានបន្តអូសបន្លាយបំណងក្នុងការឈរឈ្មោះជាប្រធានាធិបតីរហូតដល់ឆ្នាំ១៩៨៨ ឆ្នាំ២០០៤ និងឆ្នាំ២០១២ និងមានបំណងឈរឈ្មោះធ្វើជាអភិបាលក្រុងញ៉ូវយ៉កក្នុងឆ្នាំ២០០៦ និងឆ្នាំ២០១៤ យ៉ាងនេះក្តីលោកមិនបានចូលរួមក្នុងការបោះឆ្នោតទាំងនោះឡើយ។
ភាពលេចធ្លោរបស់លោកTrump ក្នុងនាមជាបេក្ខជនឈរឈ្មោះបោះឆ្នោតក្នុងឆ្នាំ២០១២ដោយសារលោកជាពាណិជ្ជកម្នាក់ មិននិយាយ ឬគិតដូចអ្នកនយោបាយឡើយ។ ជាទូទៅលោកទទួលបានសម្លេងគាំទ្រទាបជាង១៧ភាគរយដែលលោក មិនអាចឲ្យក្លាយជាបេក្ខជនបក្សសាធារណរដ្ឋបានឡើយ។ នៅថ្ងៃទី១៦ ខែឧសភា ឆ្នាំ២០១១ លោកបានប្រកាសថាលោកនឹងមិនឈរឈ្មោះបោះឆ្នោតក្នុងឆ្នាំ២០១២ឡើយ ខណៈដែលពេលខ្លះលោកលើកឡើងទាំងអំណួតថាលោកប្រកដជាទទួលបានជោគជ័យ។
* យុទ្ធនាការបោះឆ្នោតឆ្នាំ២០១៦៖
នៅថ្ងៃទី១៦ ខែមិថុនា ឆ្នាំ២០១៥ លោកTrump បានប្រកាសពីបេក្ខភាពប្រធានាធិបតីសម្រាប់សហរដ្ឋអាមេរិក នៅអគារ Trump Tower ក្នុងទីក្រុងញ៉ូវយ៉ក។ ក្នុងពេលនោះលោកបានអូសទាញចំណាប់អារម្មណ៍លើបញ្ហាក្នុងស្រុកដូចជា វិបត្តិជនអន្តោប្រវេសន៍ខុសច្បាប់ វិបត្តិការងារ បំណុលជាតិ បទឧក្រិដ្ឋ ភេរវកម្មពួកឥស្លាមជាដើម។ ក្នុងពាក្យស្លោកក្នុងយុទ្ធនាការរបស់លោកបានសរសេរថា «ធ្វើឲ្យសហរដ្ឋអាមេរិកប្រសើរឡើងសារជាថ្មី»។ លោកបានចាត់ទុកខ្លួនឯងជាមនុស្សអភិរក្សនិយម ជាពិសេសលើផ្នែកពន្ធ និងសាសនា។ យុទ្ធនាការរបស់លោកក៏បានផ្តោតទៅលើភាពស្នេហាជាតិផងដែរ។ ក្នុងពេលធ្វើយុទ្ធនាការបោះឆ្នោតកន្លងមក មានការផ្ទុះអំពើហិង្សា បាតុកម្ម ព្រមទាំងមានការវាយប្រហារគ្នាទៅវិញទៅមក ដែលការប្រឈមមុខដាក់គ្នានេះបានកើតឡើងរវាងក្រុមអ្នកប្រឆាំង និងអ្នកគាំទ្រលោក Trump។
គួរបញ្ជាក់ថា លោក Trump ជាមនុស្សទីពីរក្នុងនាមជាបេក្ខជនប្រធានាធិបតីក្នុងប្រវត្តិសាស្ត្រអាមេរិក ដែលមានបទពិសោធន៍ខ្ពស់ផ្នែកពាណិជ្ចកម្ម (ទីមួយគឺលោក Wendell Willkie)។ ប្រសិនបើជាប់ឆ្នោត លោកនឹងក្លាយជាប្រធានាធិបតីអាមេរិកទីមួយដែលគ្មានបទពិសោធន៍ផ្នែករដ្ឋាភិបាល ឬយោធា។ មេដឹកនាំសំខាន់របស់បក្សសាធារណរដ្ឋដូចជាលោក Paul Ryanជាដើម ហាក់មានភាពស្ទាក់ស្ទើរក្នុងការគាំទ្របេក្ខជនប្រធានាធិបតីរូបនេះតាំងពីការចាប់ផ្តើមមកម្ល៉េះ ដោយបារម្ភថាតើលោកអាចមានឱកាសឈ្នះឆ្នោតឬទេ ម្យ៉ាងទៀតពួកគេមានក្តីបារម្ភខ្លាចលោក Trump អាចក្លាយជារូបភាពអាក្រក់មួយដែលបង្កផលប៉ះពាល់ដល់បក្សសាធារណរដ្ឋទាំងមូល។
សេចក្តីថ្លែងការណ៍របស់លោក ក្នុងយុទ្ធនាការបោះឆ្នោត បានបង្កការវិវាទគ្នាជាខ្លាំង និងត្រូវបានគេពណ៌នាក្នុងរូបភាពខុសៗគ្នា ដោយអ្នកខ្លះចាត់ទុកថាជាភាពខុសឆ្គងទាំងស្រុងតែម្តង។ អង្គការត្រួតពិនិត្យការឃោសនាមួយចំនួនដូចជា អង្គការ PolitiFact និង FactCheck.org បានចាត់ទុកលោកតែម្នាក់គត់ដែលមានកំហុសច្រើនក្នុងពេលធ្វើសេចក្តីថ្លែងក្នុងអំឡុងនៃការធ្វើយុទ្ធនាការ បើប្រៀបធៀបនឹងបេក្ខជនប្រធានាធិបតីផ្សេងទៀត ដោយពឹងផ្អែកលើការវិភាគរបស់ពួកគេ។
អ្នកសារព័ត៌មាន James Oliphant និងEmily Flitter បានលើកឡើងថា លោក Trump ជាមនុស្សចូលចិត្តនិយាយបំផ្លើស ស្របពេលដែលសាស្ត្រាចារ្យ Lucas Graves បានបញ្ជាក់ថា លោក Trump តែងតែនិយាយបែបផ្តល់យោបល់ ដែលធ្វើឲ្យវាមានភាពមិនច្បាស់លាស់ថាតើលោកចង់មានន័យអ្វីឲ្យបា្រកដ។ ដោយឡែកលោក Trump បែរជាឆ្លើយតបវិញថា អ្នកសារព័ត៌មានតែងតែបំផ្លើសអ្វីដែលលោកមិនបាននិយាយទៅវិញ។
* មុខរបរ និងអាជីវកម្ម៖
• វិស័យអចលនទ្រព្យ៖ លោកTrump ចាប់ផ្តើមមុខរបរក្នុងវិស័យអចលនទ្រព្យនៅក្រុមហ៊ុនឪពុករបស់លោក តាំងពីមុនបញ្ចប់ការសិក្សាម្ល៉េះ។ នៅពេលលោកបញ្ចប់ការសិក្សាឆ្នាំ១៩៦៨ អាជីវករវ័យក្មេងរូបនេះមានប្រាក់ចំនួន២០ម៉ឺនដុល្លារ ដែលស្មើនឹង១,០២០,០០០ដុល្លារសម្រាប់ឆ្នាំ២០១៥។ ឆ្នាំ១៩៧២ លោកបានលក់វីឡាមួយក្នុងតម្លៃទឹកប្រាក់៦.៧៥លានដុល្លារ។ តែនៅក្នុងវ័យ២៣ឆ្នាំ លោកត្រូវបរាជ័យក្នុងមុខរបររបស់ខ្លួន។
• អគារ Trump Tower ៖ ក្នុងឆ្នាំ១៩៨៣ លោកបានសាងសង់អគារនេះ ដែលមានកំពស់៥៨ជាន់ និងខ្ពស់ជាខ្លាំង ក្នុងទីក្រុង ញ៉ូវយ៉ក។
• Trump Plaza ៖ ជាសណ្ឋាគារ និងកាស៊ីណូដែលត្រូវបានកសាងឡើងដោយលោក Trump ក្នុងទីក្រុង អាត្លង់ទិកនាឆ្នាំ១៩៨៤ ដោយមានលោកស្រី Ivana ភរិយាទីមួយរបស់លោកគ្រប់គ្រង។ ក្រៅពីនេះ លោក Trump នៅមានទីតាំង និងអាជីវកម្មជាច្រើនទៀត។
* ការដួលរំលំ៖
ក្នុងនាមជាម្ចាស់សណ្ឋាគារ និងកាស៊ីណូ លោកបានប្រកាសពីការដួលរលំរហូតដល់៤ដងចាប់ពីឆ្នាំ១៩៩១ដល់ឆ្នាំ២០០៩ ដោយធ្វើកិច្ចចរចាជាច្រើនលើកអំពីបំណុលជាមួយធនាគារ ម្ចាស់ភាគហ៊ុន និងប័ណ្ណបំណុល។ តែដោយកាលនោះអាជីវកម្មបានប្រើប្រាស់ច្បាប់នៃការដួលរលំជំពូកទី១១ ដែលចែងថា គេអនុញ្ញាតឲ្យអាជីវកម្មបន្តសកម្មភាពរបស់ខ្លួនដដែលក្នុងដំណើរការនៃកិច្ចចរចា។ លោក Trump បានលើកឡើងថា«ខ្ញុំបានបន្តអាជីវកម្មជាមួយច្បាប់នៃការដួលរលំ វាពិតជាល្អមែនទែនសម្រាប់ខ្ញុំដែលអាចប្រើប្រាស់ជាមធ្យោបាយក្នុងការដោះស្រាយបំណុល។
* កេរ្តិ៍មរតក និងអ្វីដែលទទួលបាន៖
ក្នុងឆ្នាំ១៩៩៦ លោក ទទួលបានអគារចាស់មួយនៅ Wall Street ដែលបច្ចុប្បន្នមាន៧០ជាន់។ បន្ទាប់ពីឪពុករបស់លោកស្លាប់ទៅ លោកព្រមទាំងបងប្អូនទទួលបានកេរ្តិ៍មរតក ដែលមានតម្លៃជាទឹកប្រាក់ម្នាក់ៗប្រហែល២៥០លាន ទៅ៣០០លានដុល្លារអាមេរិក។ ក្នុងឆ្នាំ២០០១ លោកសម្រេចបាននូវការសាងសងអគារ Trump World Tower ដែលកំពស់មាន៧២ជាន់។ មិនតែប៉ុណ្ណោះលោកក៏គ្រោងនឹងកសាងអគារ Trump Place ដែលស្ថិតនៅតាមបណ្តោយដងទន្លេ Hudsonផងដែរ។ មិនតែប៉ុណ្ណោះលោកនៅតែបន្តកសាងអគារសំខាន់ៗជាច្រើនទៀត ដែលមានតម្លៃកប់ពពក។ មានភាពស្មុគស្មាញជាច្រើនពាក់ព័ន្ធនឹងប្រាក់ចំណូលក្នុងអាជីវកម្មរបស់លោកធ្វើឲ្យ ការវិភាគបានលើកឡើងថាលោក ជាមនុស្សដែលអំណួតខ្លាំងទាំងទៅលើភាពបរាជ័យ និងជោគជ័យលើអាជីវកម្មរបស់ខ្លួន។
* បញ្ហាសង្គម៖
លោក Trump បានចាត់ខ្លួនឯងជាមនុស្សដែលប្រឆាំងការពន្លូតកូន លើកលែងតែក្នុងករណីរំលោភ សាហាយស្មន់ និងសុខភាពរបស់ម្តាយ។ លោកគាំទ្រចំពោះការរៀបការតាមបែបប្រពៃណី តែប្រឆាំងសេចក្តីសម្រេចរបស់តុលាការដែលបានផ្តល់ភាពស្របច្បាប់ដល់ការរៀបការភេទដូចគ្នា ដោយបញ្ជាក់ថាសេចក្តីសម្រេចនេះគួរតែត្រូវបានលុបចោល។ លោកប្រឆាំងការកែច្នៃសារធាតុកញ្ឆា ប៉ុន្តែគាំទ្រចំពោះថ្នាំដែលមានសារធាតុកញ្ឆា។ លោក ក៏មានជាមនុស្សដែលគាំទ្រទោសប្រហារជីវិតផងដែរ។
* បញ្ហាសេដ្ឋកិច្ច៖
លោក Trump ត្រូវបានគេចាត់ទុកថាថា «អ្នកជំនួញបែបសេរី» ប៉ុន្តែបញ្ជាក់ថា ការធ្វើជំនួញ ត្រូវតែមានហេតុផលត្រឹមត្រូវ។ លោកជាមនុស្សដែល «ការពារនិយម» (លើកកម្ពស់ការប្រើប្រាស់ផលិតផលក្នុងស្រុក តាមរយៈការបង្កើនពន្ធនាំចូល)។ លោកបានលើកឡើងថា កិច្ចព្រមព្រៀងពាណិជ្ជកម្មសេរីអាមេរិក ខាងជើង ជាទំនាក់ទំនងពាណិជ្ជកម្មដ៏ខាតបង់មួយ។ លោកក៏បានស្នើបង្កើនពន្ធនាំចូលពីសំណាក់ប្រទេសចិនរហូតដល់៤៥ភាគរយព្រមទាំងបានលើកឡើងនូវគំនិតក្នុងការបង្កើនពន្ធ៣៥ភាគរយសម្រាប់ ការនាំចូលពីប្រទេស ម៉ិចស៊ិក។ លោកបានចាត់ទុកអង្គការពាណិជ្ជកម្មពិភពលោក WTO ថាជាគ្រោះ មហន្តរាយ និងមានបំណងចង់ធ្វើកិច្ចចរចាសម្រាប់សហរដ្ឋអាមេរិកក្នុងការចាកចេញពីអង្គការពិភពលោកមួយនេះថែមទៀតផង លើកលែងតែអង្គការនេះអនុញ្ញាតតាមសំណើររបស់លោកក្នុងការបង្កើនពន្ធនាំចូល។
* វិស័យសុខាភិបាល ការអប់រំ និងបរិស្ថាន៖
លោក Trump មានបំណងចង់លុបចោលឬផ្លាស់ប្តូរគោលនយោបាយសុខាភិបាលរបស់លោក អូបាម៉ា ជំនួសវិញដោយគម្រោងទីផ្សារសេរីfree-market plan ដែលគម្រោងនេះ អនុញ្ញាតឲ្យមានការលក់ធានារ៉ាប់រងសុខភាព អាចឲ្យប្រជាពលរដ្ឋម្នាក់ៗកាត់បន្ថយការចំណាយ ពង្រីកគណនីសន្សំសំចៃលើវិស័យសុខាភិបាល និងបង្កើនការគ្រប់គ្រងលើផ្នែកឱសថ។ ចំពោះវិស័យអប់រំ លោកបានគាំទ្រចំពោះគោលនយោបាយគ្រប់គ្រងលើសាលាថ្នាក់បឋម និងមធ្យម។ ប៉ុន្តែលោកប្រឆាំងនឹងគោលការ Common Core State Standards Initiative (តម្រូវឲ្យសិស្សត្រូវចេះភាសាអង់គ្លេស និងគណិតវិទ្យា) សម្រាប់ថ្នាក់បឋម និងថ្នាក់មធ្យម ព្រមទាំងចាត់ទុកគោលនយោបាយនេះថាជារឿងដ៏អាក្រក់ ដែលត្រូវតែលុបបំបាត់។ លោកបានបញ្ជាក់ថា លោកនឹងបញ្ចប់គោលនយោបាយនេះ នៅគ្រប់ស្ថាប័នអប់រំទាំងអស់។
ទាក់ទងនឹងបញ្ហាបរិស្ថាន លោកបានបង្ហាញការបដិសេធចំពោះការលើកឡើងពីបញ្ហាបម្រែបម្រួលអាកាសធាតុ ព្រមទាំងអះអាងម្តងហើយម្តងទៀតថាវិបត្តិកំណើតកំដៅផែនដី ជាការបោកបញ្ឆោត។ លោកសន្យាថានឹងកាត់កញ្ចប់ថវិកាមកវិញទាំងអស់។ លោកក៏បានសន្យាផងដែរក្នុងការលុបចោលនូវកិច្ចព្រមព្រៀងទីក្រុង ប៉ារីស ដែលទាមទារឲ្យកាត់បន្ថយការបញ្ចេញសារធាតុកាបូន ក្នុង១៧០ប្រទេស ដោយប្រកាសថា កិច្ចព្រមព្រៀងនេះមានលក្ខណៈមិនស្មើភាព និងហាក់លំអៀងទៅប្រទេសមួយចំនួនទៀតដូចជាចិនជាដើម។
* គោលនយោបាយការបរទេស៖
លោក Trump ត្រូវបានគេចាត់ទុកថា ជាមនុស្សជាតិនិយម ប្រឆាំងគោលនយោបាយអន្តរជាតិនិយម។ លោកគាំទ្រចំពោះការចំណាយលើវិស័យយោធាក្នុងប្រទេស តែចង់កាត់បន្ថយការចំណាយលើអង្គការណាតូ និងក្នុងតំបន់ប៉ាស៊ីហ្វិក។
បេក្ខជនប្រធានាធិបតីដ៏ចម្លែករូបនេះ បានបញ្ជាក់ថា យើងគួរតែសំលឹងពីផ្ទៃក្នុងប្រទេស ចាប់ផ្តើមប្រើប្រាស់ធនធានដើម្បីបំពេញតម្រូវការក្នុងស្រុកឲ្យបានគ្រប់គ្រាន់។ បុគ្គលស្នេហាជាតិរូបនេះ បានលើកឡើងថា ប្រសិនបើលោកជាប់ជាប្រធានាធិបតី លោកនឹងពង្រីកការធានារ៉ាប់រងសន្តិសុខសម្រាប់ប្រទេសជាសមាជិករបស់អង្គការណាតូ មិនតែប៉ុណ្ណោះលោកអាចពិចារណាចាកចេញពីអង្គការ NATO ថែមទៀតផង លើកលែងតែមានកំណែទម្រង់លើប្រទេសសម្ព័ន្ធមិត្ត។ ជាមួយគ្នានេះដែរ លោកបានស្នើរដ្ឋាភិបាលជប៉ុនជួយចំណាយលើមូលដ្ឋានយោធាអាមេរិកដែលដាក់ពង្រាយនៅទីនោះ ព្រមទាំងលើកឡើងថា ជប៉ុនគួរតែអភិវឌ្ឍន៍អាវុធនុយក្លេអ៊ែរ ក្នុងគោលដៅការពារខ្លួនពីការគំរាមកំហែងរបស់ប្រទេស កូរ៉េខាងជើង។
ពាក់ព័ន្ធនឹងការទប់ស្កាត់ពួកឧទ្ទាមISIS លោកបានស្នើបញ្ជូនយោធាអាមេរិកពី២០ពាន់ ទៅ៣០ពាន់នាក់បន្ថែមទៅកាន់តំបន់។ លោកក៏បានទាមទារផងដែរឲ្យប្រទេសជាសម្ព័ន្ធមិត្តដូចជាអារ៉ាប៊ីសាអូឌីតជាដើមគួរតែបញ្ជូនយោធាចូលរួមក្នុងការវាយប្រហារនេះ។ លោកគិតថា តំបន់ប្រេងក្រោមការគ្រប់គ្រងរបស់ISIS គួរតែត្រូវបានទម្លាក់គ្រាប់បែកកំទេចចោល។
ក្នុងករណីលោកជាប់ជាប្រធានាធិបតី លោក Trump នឹងបញ្ឈប់ផ្តោតការយកចិត្តទុកដាក់ទៅលើកិច្ចព្រមព្រៀងនុយកេ្លអ៊ែរជាមួយប្រទេសអ៊ីរ៉ង់។ ដោយឡែកពាក់ព័ន្ធនឹងជម្លោះរវាងអ៊ីស្រាអែល និងប៉ាឡេស្ទីន លោកTrump បានបញ្ជាក់ថា វាពិតជាមានសារៈសំខាន់ជាទីបំផុតក្នុងការប្រកាន់ជំហរអព្យាក្រឹត ប៉ុន្តែការពិតទៅលោកជាអ្នកគាំទ្រផ្កាប់មុខទៅលើប្រទេស អ៊ីស្រាអែល។
ពាក់ព័ន្ធជាមួយបញ្ហារុស្ស៊ីវិញលោកហាក់មានលំអៀងទៅរុស្ស៊ី ដោយបញ្ជាក់ថាលោកអាចនឹងពិចារណាពីការដកទណ្ឌកម្មពីប្រទេសនេះ។ មិនតែប៉ុណ្ណោះរុស្ស៊ី អាចជួយសហរដ្ឋអាមេរិកក្នុងការបង្ក្រាបពួក ISISផងដែរ។ ក្នុងបទសម្ភាសន៍ដដែល លោក សង្ឃឹមថា រុស្ស៊ី អាចជួយរកឃើញសាររបស់លោកស្រី Hillary Clinton ដែលបានបាត់នាពេលកន្លងមក ដោយបានថ្លែងទៅកាន់រុស្ស៊ីថា ប្រសិនបើរុស្ស៊ីយកចិត្តទុកដាក់ទៅលើរឿងនេះ រុស្ស៊ីអាចជួយរកសាររបស់លោកស្រីដែលបានបាត់រហូតដល់៣ម៉ឺនសារ។ ប៉ុន្តែនៅថ្ងៃបន្ទាប់ លោកបានលើកឡើងថា នេះជាការបញ្ឈឺចិត្តប៉ុណ្ណោះ។
* គោលនយោបាយជនអន្តោប្រវេសន៍៖
គោលនយោបាយជនអន្តោប្រវេសន៍របស់លោក Trump ត្រូវបានគេលើកយកមកពិភាក្សាយ៉ាងផុសផុលក្នុងចំណោម គោលនយោបាយផ្សេងៗទៀតក្នុងយុទ្ធនាការឃោសនាបោះឆ្នោត។ លោកបានប្តេជ្ញាក្នុងការកសាងជញ្ជាំងនៅតាមបន្ទាត់ព្រំដែនរវាងសហរដ្ឋអាមេរិក និងម៉ិចស៊ិក ដើម្បីទប់ស្កាត់ជនអន្តោប្រវេសន៍ខុសច្បាប់ ដែលលោកនឹងចំណាយដោយផ្ទាល់ទៅលើការសាងសង់ទាំងអស់។ លោកក៏នឹងបង្កើតកងកម្លាំងពិសេស ដើម្បីបណ្តេញជនអន្តោប្រវេសន៍១១លាននាក់ដែលរស់នៅសហរដ្ឋអាមេរិក ដោយបញ្ជាក់ថា «នៅថ្ងៃទីមួយរបស់លោកក្នុងនាមជាប្រធានាធិបតី ជនអន្តោប្រវេសន៍ខុសច្បាប់ ទាំងអស់នឹងត្រូវចាកចេញយ៉ាងឆាប់រហ័ស»។ ជាមួយគ្នានេះដែរ លោកក៏បានបង្ហាញការប្រឆាំងចំពោះការទទួលបានសិទ្ធជាប្រជាពលរដ្ឋដោយសារការចាប់កំណើតនៅអាមេរិកផងដែរ។
កាលពីចុងខែសីហាកន្លងទៅនេះ លោក បានស្នើនិរទេសគ្រប់ជនអន្តោប្រវេសន៍ដែលគ្មានឯកសារត្រឹមត្រូវ។ នៅថ្ងៃទី៣១ ខែសីហា ឆ្នាំ២០១៦កន្លងទៅនេះ លោកបានធ្វើទស្សនកិច្ចនៅប្រទេស ម៉ិចស៊ិក ព្រមទាំងជួបជាមួយប្រធានាធិបតី Enrique Peña Nieto doy ដើម្បីបង្ហាញពីបំណងដែលលោកចង់បង្កើនទំនាក់ទំនងជាមួយប្រទេសនេះ។ យ៉ាងនេះក្តីក្នុងកិច្ចពិភាក្សានារាត្រីនោះ លោក បានបង្ហាញពីគម្រោង១០ចំណុច ដែលក្នុងនោះរួមទាំងការកសាងជញ្ជាំងតាមបណ្តោយបន្ទាត់ព្រំដែនផងដែរ ដោយលោកផ្ទាល់ជាអ្នកចំណាយទាំងអស់។ លោកបញ្ជាក់ផងដែរថា កងកម្លាំងពិសេសទទួលបន្ទុកផ្នែកជនអន្តោប្រវេសន៍ នឹងត្រូវដាក់ទោសពីបទឧក្រិដ្ឋទៅលើជនអន្តោប្រវេសន៍ណា ដែលស្នាក់នៅក្នុងដែនដីសហរដ្ឋអាមេរិកជាមួយទិដ្ឋាការលើសសុពលភាព។
អ្វីដែលជាសំណើររបស់លោកTrumpដែលកំពុងមានភាពវិវាទជាខ្លាំងនោះគឺ គម្រោងហាមឃាត់ជាបណ្តោះអាសន្នទៅលើជនបរទេសមូស្លីមក្នុងដែនដីសហរដ្ឋអាមេរិក។ តែក្រោយមកលោកបានផ្លាស់ប្តូរគោលនយោបាយនេះវិញដោយលើកឡើងថា ការហាមឃាត់នេះនឹងធ្វើឡើងសម្រាប់តែប្រជាពលរដ្ឋមូស្លីម ដែលមកពីបណ្តាប្រទេសធ្លាប់មានប្រវត្តិបង្កការវាយប្រហារភេរវកម្មប្រឆាំងសហរដ្ឋអាមេរិក និងសម្ព័ន្ធមិត្តរបស់ខ្លួន ឬប្រទេសដែលមានជម្រកពួកភេរវករ៕
