(ភ្នំពេញ​)៖ អធិការនគរបាលខណ្ឌដូនពេញ លោក ហួត ចាន់យ៉ារ៉ាន់ បានបញ្ជាក់ឡើងវិញថា ករណីនារីវ័យក្មេង ៤នាក់ ជិះម៉ូតូម៉ាកហុងដាឌ្រីមមួយគ្រឿង ឌុបគ្នាចេញពីកន្លែងញុំាអាហារ នៅជិតកោះពេជ្រ ត្រូវបានជនសង្ស័យមានគ្នាជាង ១០នាក់ ស្ទាក់វាយប្លន់យកម៉ូតូ តែត្រូវកម្លាំងនគរបាល ពេលកំពុងល្បាតជួយទាន់ពេល និងដេញចាប់ឃាត់ខ្លួនបានចំនួន ២នាក់ភ្លាមៗនោះ តាមពិតមិនមែនជាករណីប្លន់នោះឡើយ ពោលជារឿងជម្លោះស្នេហា គឺខាងស្រីលួចមានសង្សាថ្មី។

លោក ហួត ចាន់យ៉ារ៉ាន់ បានបន្តថា «ករណីនេះក្រោយការសួរនាំរួច គឺផ្តើមចេញ ខាងនារីវ័យក្មេងទាំងនេះ លួចមានសង្សាថ្មី ដែលធ្វើឲ្យសង្សាចាស់របស់នាង ខឹង ហើយជិះម៉ូតូដេញ តាមពីក្រោយរហូតធាក់ផ្តួលតែម្តង បង្កឲ្យមានការភ្ញាក់ផ្អើលតែម្តង»។ បើតាមមន្រ្តីនគរបាលខណ្ឌដូនពេញ សម្រាប់ហេតុការណ៍ កម្លាំងសមត្ថកិច្ចនៅខណ្ឌចំការមន បានបាញ់ចំនួន ២គ្រាប់ផងដែរ ដើម្បីបំបែកក្រុមក្មេងស្ទាវទាំងនេះ កុំឲ្យបង្កភាពអនាធិបតេយ្យតាមដងផ្លូវ។

សូមបញ្ជាក់ថា ហេតុការណ៍ភ្ញាក់ផ្អើលនេះ បានកើតឡើង កាលពីវេលាម៉ោង១៖២០នាទី រំលងអាធ្រាត្រ ឈានចូលថ្ងៃទី១៥ ខែកញ្ញា ឆ្នាំ២០១៦ នៅចំណុចមុខណាហ្គា ស្ថិតក្នុង សង្កាត់ចតុមុខ​ ខណ្ឌដូនពេញ​។ តាមសំដីជនរងគ្រោះបានឱ្យដឹងថា នៅមុនពេលកើតហេតុពួកគេមានគ្នា៤នាក់ បានជិះម៉ូតូមួយគ្រឿង​ ឌុបគ្នាមកពីអង្គុយញុំាអាហារ នៅសួនជិតគល់ស្ពានកោះពេជ្រ ពេលញ៉ាំរួចហើយ ទើបនាំគ្នាចេញត្រលប់ទៅផ្ទះ ខណៈជិះមកដល់មុខណាហ្គា ស្រាប់តែមានជនសង្ស័យមួយក្រុមមានគ្នាជាង១០នាក់ ជិះម៉ូតូជាច្រើនគ្រឿង បានជិះម៉ូតូមកជិតហើយធាក់ផ្តួលម៉ូតូរបស់ពួកគេ។

ក្នុងពេលកម្លាំងនគរបាលកំពុងដើរល្បាត បានប្រទះឃើញហេតុការណ៍ខាងលើ ក៏បានចុះអន្តរាគមន៍ភ្លាមៗ ធ្វើឱ្យជនសង្ស័យភ័យ និងនាំគ្នាជិះម៉ូតូរត់រហូតដល់ចំណុចមុខវត្តកោះ ផ្លូវព្រះមុន្នីវង្ស ទើបកម្លាំងសមត្ថកិច្ចតាមទាន់ ហើយឃាត់បាន២នាក់ ក្នុងចំណោមពួកគេទាំង១០នាក់ ដកហូតបានម៉ូតូមួយគ្រឿងម៉ាកឌ្រឹមសង់ ស៊េរីឆ្នាំ២០១៦​ ពណ៌ខ្មៅ​ ពាក់ស្លាកលេខ ភ្នំពេញ 1DB-5649 ចំណែកបក្សពួកផ្សេងទៀតរត់គេចខ្លួនបាត់។

ក្រោយពេលកើតហេតុ ជនសង្ស័យទាំង២នាក់ រួមទាំងម៉ូតូ ត្រូវបានសមត្ថកិច្ចយកទៅប៉ុស្តិ៍រដ្ឋបាលនគរបាលចតុមុខ ធ្វើការសាកសួរ ដើម្បីកសាងសំណុំរឿង ទៅអធិការដ្ឋានចាត់ការបន្ត៕