(កណ្ដាល)៖ លោក អ៊ុំ សុភក្ដិ ព្រះរាជអាជ្ញារងអមសាលាដំបូងខេត្តកណ្ដាល បានសម្រេចចោទប្រកាន់ជនបរទេសចំនួន២នាក់ ករណីប្លន់រថយន្តពីជនជាតិខ្មែរនៅស្រុកកណ្ដាលស្ទឹង។ សំណុំរឿងនេះត្រូវបានបញ្ជូនទៅចៅក្រម ស៊ើបសួររួចរាល់ហើយ ក្រោមបទ «លួចមានស្ថានទម្ងន់» តាមបញ្ញត្តិមាត្រា ៣៥៧ ក្រមព្រហ្មទណ្ឌ។
នេះបើតាមលោក ខា ដែនណា អ្នកនាំពាក្យអយ្យការអមសាលាដំបូងខេត្តកណ្ដាល បានប្រាប់ភ្នាក់ងារព័ត៌មាន Fresh News ប្រចាំខេត្តកណ្តាល កាលពីថ្ងៃទី២៩ ខែឧសភា ឆ្នាំ២០២៤។ ដោយឡែកលោក សូ សារិន អ្នកនាំពាក្យសាលាដំបូងខេត្តកណ្ដាល ពុំអាចទាក់ទងបានឡើយ។ ដូច្នេះសំណុំរឿងនេះពុំបានដឹងទេថា នៅដៃចៅក្រមរូបណា និងសម្រេចចោទប្រកាន់យ៉ាងណានោះទេ។
ករណីប្លន់រថយន្តនេះ បានកើតឡើងកាលពីថ្ងៃទី២៧ ខែឧសភា ឆ្នាំ២០២៤ វេលាម៉ោង ១៨:៣០នាទី ចំណុចភូមិត្រពាំងវែង ឃុំ ត្រពាំងវែងស្រុក កណ្ដាលស្ទឹង ខេត្ត កណ្ដាល។ ជនរងគ្រោះមានឈ្មោះ យុង សុផាត ភេទប្រុស អាយុ៤៤ឆ្នាំ បច្ចុប្បន្នរស់នៅភូមិរកា សង្កាត់រកាខ្ពស់ក្រុងតាខ្មៅ ខេត្តកណ្ដាល មានមុខរបររត់ឡានស្នួល។ ចំណែកជនសង្ស័យចំនួន០៤នាក់រត់គេចខ្លួន ០២នាក់ មិនស្គាល់អត្តសញ្ញាណ។
ជនសង្ស័យដែលសមត្ថកិច្ចឃាត់ខ្លួនចំនួន២នាក់រួមមាន៖
*ទី១៖ ឈ្មោះ Nguyễn Thont Đồng ភេទប្រុស អាយុ២៣ឆ្នាំ ជនជាតិវៀតណាម
*ទី២៖ ឈ្មោះ Li Jun Wei ភេទប្រុស អាយុ៣៩ឆ្នាំ ជនជាតិចិន។
យោងតាមរបាយការណ៍របស់សមត្ថកិច្ច បានឱ្យដឹងថា កាលថ្ងៃទី២៧ ខែឧសភា ឆ្នាំ២០២៤ វេលាម៉ោង ០៨៖០០នាទី ជនរងគ្រោះបានបើករថយន្តចេញពីផ្ទះរបស់ខ្លួន យកទៅធ្វើនៅភ្នំពេញ និងទៅរកដឹកភ្ញៀវនៅមុខព្រលានយន្តហោះអន្តរជាតិភ្នំពេញ។
រហូតម៉ោង១០៖០០នាទី ក្រុមអ្នករត់តាក់ស៊ីដូចគ្នា បាននាំគ្នាលេងក្នុងគ្រុបឆាតថា មានជនជាតិចិន រកជួលរថយន្ត ពេលនោះជនរងគ្រោះបានឆាតទៅជនជាតិចិនខាងលើ រួចជនជាតិចិនបានដាក់ទីតាំងឱ្យជនរងគ្រោះទៅជួបម្តុំស្ពានអាកាសផ្សារដីហុយ។
ពេលទៅដល់ ជនរងគ្រោះបានជួបជនជាតិចិន ហើយជនរងគ្រោះ បានសួរជនជាតិចិនតាមរយៈទូរស័ព្ទបកប្រែភាសាថា «ចង់ទៅណា ហើយជនជាតិចិនបានតបវិញថា ទៅច្រកព្រំដែនព្រែកចាក (ទៅវិញទៅមក) រួចជនរងគ្រោះបានទារថ្លៃដឹកទៅវិញទៅមកក្នុងតម្លៃ១៩០ដុល្លារ»។
ជនជាតិចិនបានតថ្លៃមកត្រឹម១៤០ដុល្លារ ហើយជនរងគ្រោះបានយល់ រួចក៏ដឹកជនជាតិចិននោះ ទៅច្រកព្រំដែនព្រែកចាក។ ពេលទៅដល់ ជនជាតិចិនខាងលើបានជួបនារីជនជាតិចិនដូចគ្នា។
ដោយឡែកជនរងគ្រោះ អង្គុយចាំនៅរថយន្ត។ ពេលហូបបាយរួច ជនជាតិចិន បាននាំគ្នាដើរចូលកន្លែងអនឡាញនៅទីនោះបាត់ប្រហែលមួយម៉ោង ទើបជនជាតិចិនដើរចេញមក និងនាំជនជាតិវៀតណាម៣នាក់ទៀត មកជាមួយតែពុំឃើញជនជាតិចិនស្រីនោះចេញមកទេ។
ពេលនោះជនរងគ្រោះ បានបើករថយន្តដឹកជនជាតិចិន និងជនជាតិវៀតណាម៣នាក់ទៀត ត្រឡប់មកភ្នំពេញវិញ ដោយបើករថយន្តតាមបណ្ដោយផ្លូវជាតិលេខ៣។ លុះដល់ចំណុចកើតហេតុ ជនជាតិវៀតណាមទាំង៣នាក់ បានព្រួតគ្នាវាយជនជាតិចិនតែម្តង។
ឃើញដូចនោះជនរងគ្រោះភ័យបានអែបរថយន្តចូលគៀន ហើយរត់ចុះពីរថយន្តតែពុំពន្លត់ម៉ាស៊ីនទេ ហើយជនរងគ្រោះបានដើរចូលទៅពន្លត់ម៉ាស៊ីនរថយន្តវិញ ក៏ត្រូវជនជាតិវៀតណាមចាប់ដៃ និងបានដណ្ដើមសោរថយន្តពីចង្កេះខោរបស់ជនរងគ្រោះ រួចបើករថយន្តគេចខ្លួន រហូតដល់ចំណុចឃុំគរគីធំ ស្រុកកៀនស្វាយ ទើបកម្លាំងនគរបាលស្រុកកៀនស្វាយ ឃាត់បានចំនួនពីរនាក់ ចំណែកជនជាតិវៀតណាម២នាក់ទៀត ចុះពីលើរថយន្តរួចគេចខ្លួនបាត់។ ជនសង្ស័យទាំង២នាក់ ត្រូវបានកម្លាំងអធិការដ្ឋាននគរបាលស្រុកកៀនស្វាយ ប្រគល់ជូនកម្លាំងផ្នែកជំនាញស្រុកកណ្ដាលស្ទឹង ដើម្បីធ្វើការសាកសួរ។
ក្រោយធ្វើការសាកសួររួច ជនសង្ស័យជនជាតិចិន បានឆ្លើយសារភាពថា ខ្លួនត្រូវបានមិត្តភ័ក្តិម្នាក់ទៀតឈ្មោះ Zhu bao ឱ្យទៅទទួលភ្ញៀវជនជាតិវៀតណាម៣នាក់ខាងលើ ពីច្រកព្រំដែនព្រែកចាក ដើម្បីទៅធ្វើការនៅច្រកព្រំដែនជ្រៃធំ។
ដោយឡែកជនជាតិវៀតណាម បានឆ្លើយសារភាពថា ខ្លួនត្រូវបានជនជាតិចិនលោះខ្លួន ចេញពីកន្លែងអនឡាញមួយកន្លែងនៅម្តុំច្រកព្រំដែនព្រែកចាក ដើម្បីទៅធ្វើការនៅកន្លែងផ្សេង ពេលជិះរថយន្តដល់ចំណុចកើតហេតុខាងលើបក្ខពួកខ្លួន០២នាក់ទៀត បានវាយមកលើជនជាតិចិន និងបានគំរាមឱ្យជូនខ្លួន និងបក្ខពួកត្រឡប់ទៅប្រទេសខ្លួនវិញ ទើបវាយជនរងគ្រោះដណ្តើមសោបើកគេចខ្លួន៕
