(ហ្សឺណែវ)៖ លោកវេជ្ជបណ្ឌិត Saia Ma`u Piukala នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច (WPRO) បានកោតសរសើរកម្ពុជា ចំពោះការខិតខំប្រឹងប្រែងក្នុងការពង្រឹងវិស័យសុខាភិបាលឱ្យបានកាន់តែប្រសើរឡើង។

ការថ្លែងដូច្នេះរបស់នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច ក្នុងជំនួបពិភាក្សាការងារទ្វេភាគី ជាមួយលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាថ្ងៃទី២៨ ខែឧសភា ឆ្នាំ២០២៤ វេលាម៉ោង ១៥៖០០ នាទីសៀល (ម៉ោងទីក្រុងហ្សឺណែវ) នៅការិយាល័យកណ្តាល របស់អង្គការសហប្រជាជាតិ។ កិច្ចពិភាក្សានេះ គឺបានធ្វើឡើងបន្ទាប់ឆ្លៀតក្នុងឱកាសដ៏មមាញឹក នៃការចូលរួមមហាសន្និបាតសុខភាពពិភពលោក លើកទី៧៧។

លោកវេជ្ជបណ្ឌិត Saia Ma`u Piukala ក៏បានជម្រាបជូនពីការយកចិត្តទុកដាក់របស់ អង្គការសុខភាពពិភពលោក ក្នុងការជួយដល់វិស័យសុខាភិបាលកម្ពុជា ដោយតំណាងអង្គការសុខភាពពិភពលោកនៅកម្ពុជា បានចូលរួមរៀបចំការអនុវត្តយុទ្ធសាស្ត្រសហប្រតិបត្តិការនៅកម្ពុជា រៀងរាល់៥ឆ្នាំម្តង (Country Cooperative Strategy)។

ក្នុងឳកាសនោះ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែងអំណរគុណអង្គការសុខភាពពិភពលោក និងដៃគូអភិវឌ្ឍន៍អន្តរជាតិទាំងអស់ដែលបាន និងកំពុងបន្តចូលរួមចំណែកយ៉ាងសកម្មកជាមួយកម្ពុជា ក្នុងការអនុវត្តផែនការយុទ្ធសាស្ត្រសុខាភិបាល ដើម្បីចូលរួមក្នុងការសម្រេចគោលដៅផែនការយុទ្ធសាស្ត្រអភិវឌ្ឍន៍ជាតិនិង គោលដៅអភិវឌ្ឍន៍ប្រកបដោយចីរភាព។

លោកសាស្ត្រាចារ្យរដ្ឋមន្ត្រី បានជម្រាបសមភាគីអំពីអាទិភាពរបស់ក្រសួងសុខាភិបាល រួមមានអភិវឌ្ឍមូលធនមនុស្សដែលជាយុទ្ធសាស្ត្រស្នូលរបស់ រាជរដ្ឋាភិបាល ក្នុងការកែទម្រង់ និងការពង្រឹងអភិបាលកិច្ចឱ្យមានប្រសិទ្ធភាព ដើម្បីជាឧត្តមប្រយោជន៍របស់សង្គមជាតិ។

ជាមួយគ្នានេះ លោកសាស្ត្រាចារ្យរដ្ឋមន្ត្រី បានចែករំលែកបទពិសោធន៍ពាក់ព័ន្ធនឹងការដឹកនាំ គ្រប់គ្រង វិស័យសុខាភិបាលកម្ពុជា ការខិតខំប្រឹងប្រែងក្នុងការអភិវឌ្ឍហេដ្ឋារចនាសម្ព័ន្ធ ការពង្រីកវិសាលភាព និងការពង្រឹងគុណភាពសេវាសុខាភិបាល ដើមី្បសម្របទៅតាមការវិវត្តយ៉ាងឆាប់រហ័សនៃបច្ចេកវិទ្យាព័ត៌មាន និងឌីជីថលសុខាភិបាល។

លោកសាស្ត្រាចារ្យរដ្ឋមន្ត្រីក៏បានគូសរំលេចពីសារៈសំខាន់នៃភាពជាដៃគូសហប្រតិបត្តិការ និងការគាំទ្រដ៏មានតម្លៃរបស់អង្គការសុខភាពពិភពលោកចំពោះវិស័យសុខាភិបាលកម្ពុជា រួមមាន ការបង្ការជំងឺ ការលើកកម្ពស់សុខភាព និងការកសាងសមត្ថភាពជំនាញ។

ជំនួបខាងលើនេះផងដែរ ថ្នាក់ដឹកនាំទាំងពីរ បានសង្កត់ធ្ងន់លើភាពជាដៃគូដ៏រឹងមាំយូរអង្វែងរវាង ក្រសួងសុខាភិបាលកម្ពុជា និងអង្គការសុខភាពពិភពលោក និងបានប្តេជ្ញាចិត្តបន្តពង្រឹង និងពង្រីកកិច្ចសហប្រតិបត្តិការ គាំទ្រគ្នាទៅវិញទៅមក ដើម្បីបង្កើនប្រសិទ្ធភាពការងារ លើកកម្ពស់សុខភាព ពង្រឹងសន្តិសុខសុខភាព សម្រេចការគ្របដណ្តប់សុខភាពជាសកលនៅកម្ពុជា សំដៅឈានទៅសម្រេចបានគោលដៅអភិវឌ្ឍន៍ប្រកបដោយចីរភាព ដើមី្បជាឧត្តមប្រយោជន៍ជូនប្រជាជនកម្ពុជា៕